ជាតិ
បទយកការណ៍ / បទសម្ភាសន៍
កញ្ញា ហឿន សុភ័ក្ត្រ៖ ស្នើអាហារូបករណ៍បរទេសបន្តថ្នាក់អនុបណ្ឌិត ៥លើក ទើបជាប់
×![]()
ភ្នំពេញ៖ មានវ័យ ២៧ឆ្នាំ កញ្ញា ហឿន សុភ័ក្ត្រ ទើបនឹងទទួលបានអាហារូបករណ៍ Fullbright ទៅបន្តការសិក្សាថ្នាក់អនុបណ្ឌិត លើជំនាញប្រព័ន្ធផ្សព្វផ្សាយ និងគមនាគមន៍ នៅ University of Missouri សហរដ្ឋអាមេរិក។ សុភ័ក្ត្រ និយាយថា មុនពេលនាងទទួលបានអាហារូបករណ៍ Fullbright របស់រដ្ឋាភិបាលអាមេរិក នៅឆ្នាំ២០១៥នេះ នាងធ្លាប់បានដាក់ពាក្យស្នើ អាហារូបករណ៍បរទេសចំនួន ៤លើក តែពេលនោះនាងពុំជាប់អាហារូបករណ៍នោះទេ។ កញ្ញាក៏មិនបោះបង់ឆន្ទៈនេះដែរ ទឹកចិត្តស្រលាញ់ និងចង់បន្តការសិក្សានៅក្រៅប្រទេស បានជំរុញឲ្យកញ្ញា សុភ័ក្ត្រ ព្យាយាមសិក្សាភាសាអង់គ្លេស ធ្វើការងាររកពិសោធន៍បន្ថែមទៀត ដើម្បីបន្តដាក់អាហារូបករណ៍។ តើ កញ្ញា ហឿន សុភ័ក្ត្រ ធ្វើដូចម្តេចទើបទទួលបាន អាហារូបករណ៍ Fulbright អាមេរិក ដែលត្រូវបានបង្កើតឡើង តាំងពីឆ្នាំ ១៩៤៦ មក?
ជាបន្តសូមស្តាប់បទសម្ភាសន៍រវាងលោក រឿន ភារុន អ្នកសារព័ត៌មានអេឡិចត្រូនិចថ្មីៗ និងកញ្ញា ហឿន សុភ័ក្ត្រ និស្សិតអាហារូបករណ៍ Fullbright ៖
សំឡេង
កញ្ញា សុភ័ក្ត្រ បានស្វែងរកអាហារូបករណ៍បន្តថ្នាក់អនុបណ្ឌិត ទៅក្រៅប្រទេស ចាប់តាំងពី កញ្ញាបានបញ្ចប់ការសិក្សាថ្នាក់បរិញ្ញាបត្រជំនាញសេដ្ឋកិច្ច និងព័ត៌មាន នៅសាកលវិទ្យាល័យ ភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច ក្នុងឆ្នាំ ២០១០មកម្លេះ។ ប៉ុន្តែការដាក់ស្នើសុំ អាហារូបករណ៍មួយលើកជាពីរ តាមរយៈគេហទំព័រកម្មវិធីអាហារូបករណ៍នោះ នាងមិនជាប់នោះទេ។ សុភ័ក្ត្រ និយាយថា នាងបានដាក់ពាក្យស្នើអាហារូបករណ៍ ទៅក្រៅប្រទេសធ្លាក់ចំនួន ៤លើក តែនាងមិនបានគិតថា នាងគ្មានសមត្ថភាពរហូតនោះទេ។
ការដាក់អាហារូបករណ៍ជាមុនៗ បានក្លាយជាបទពិសោធន៍សម្រាប់នាង ក្នុងឈានរកអាហា រូបករណ៍បន្តទៀត។ មានដើមកំណើតមកពីខេត្តកំពង់ចាម សុភ័ក្ត្រ តែងជំរុញទឹករបស់នាងថា នាងអាចទទួលបានអាហារូបករណ៍សិក្សាថ្នាក់បរិញ្ញាបត្រ ដូចនេះ នាងក៏អាចយកអាហា រូបករណ៍ថ្នាក់អនុបណ្ឌិតដែរ។
សុភ័ក្ត្រ បានប្រាប់ពីបទពិសោធន៍ដើម្បីទទួលបានអាហារូបករណ៍ថា ទីមួយ, បេក្ខជនត្រូវមាន ពិន្ទុភាសាអង់គ្លេស TOELT iBT យ៉ាងហោចណាស់ ៨៨ ឬពិន្ទុ IELTS យ៉ាងហោចណាស់ ៧.០។ ទីពីរ, បេក្ខជនត្រូវរៀបរាប់ពីប្រវត្តិរូបការងារ ការសិក្សាមុខវិជ្ជាដែលចង់ទៅរៀន សំណេររៀបរាប់ពីខ្លួនឯង (Personal Statement) សំណេររៀបរាប់ពីគោលបំណងនៃការសិក្សា (Study Objectives) និងលិខិតអំណះអំណាងពីសាស្ត្រាចារ្យអ្នករួមការងារ ឬប្រធាននៅកន្លែងធ្វើការជាដើម។ ការដាក់ពាក្យគឺធ្វើតាមប្រព័ន្ធអ៊ីនធឺណិតទាំងអស់។ បេក្ខជនគ្រាន់តែផ្ញើពាក្យតាមអ៊ីនធឺណិតហើយចាំដំណឹងទៅថាជាប់ ឬមិនជាប់។ បើមិនឮដំណឹងអ្វីមកវិញសោះមានន័យថាធ្លាក់។ ប្រសិនបើជាប់ទៅវគ្គបន្ទាប់បេក្ខជននឹងត្រូវឆ្លងកាត់ការសម្ភាសន៍នៅក្នុងស្ថានទូតអាមេរិក៕
© រក្សាសិទ្ធិដោយ thmeythmey.com
