ជាតិ
នយោបាយជាតិ
ធ្លាប់តែហូបបាយជាមួយកឹម សុខា ពេលនេះកឹម សុខា មិននៅ សម រង្ស៊ី ហូបបាយជាមួយ ហ៊ុន សែន
×![]()
វាពិតជាមានការភ្ញាក់ផ្អើលណាស់ នៅពេលដែលសាធារណៈជនឃើញគ្រួសាររបស់មេដឹកនាំកំពូលបក្សនយោបាយទាំងពីររូប ណាត់ជួបពិសាបាយជុំគ្នា ដើម្បីបង្កើតភាពស្និទ្ធស្នាលរវាងគ្រួសារក្រកូល ហ៊ុន និងត្រកូល សម។ ទន្ទឹមនឹងនេះ អ្នកនយោបាយចាស់វស្សារបស់កម្ពុជាទាំងពីរ ដែលធ្លាប់មើលមុខគ្នាមិនចំនោះ ថែមទាំងឆ្លៀតថតរូប Selfie ជាមួយគ្នាទៀតផង។
នៅពេលដែលឃើញសកម្មភាពរបស់លោក សម រង្ស៊ី និងលោក ហ៊ុន សែន ក្នុងពិធីពិសាអាហារជុំគ្នា កាលពីម្សិលមិញ គេក៏នឹកឃើញផងដែរ ដល់តួអង្គ លោក កឹម សុខា ដែលជាដៃគូស្លាប់រស់របស់លោក សម រង្ស៊ី។ តាមរយៈរូបថត សេលហ្វី (Selfie) និងពិធីពិសាបាយជុំគ្នារវាងគ្រួសារលោកប្រធានគណបក្សធំៗទាំងពីរ បានបញ្ជាក់ថា លោក ហ៊ុន សែន និងលោក សម រង្ស៊ី កំពុងតែល្អូកល្អិននឹងគ្នាយ៉ាងខ្លាំង ខណៈដែលលោក កឹម សុខា អនុប្រធានគណបក្សសង្គ្រោះជាតិកំពុងបំពេញបេសកកម្មការងារនៅប្រទេសស្វីស។
លោក សម រង្ស៊ី ដែលជាញឹកញាប់ តែងតែអង្គុយពិសាបាយ និងដើរលំហែកាយ ជុំគ្នាជាមួយលោក កឹម សុខា នោះ បានប្តូរមកអង្គុយតុពិសាបាយជុំគ្នាជាមួយលោក ហ៊ុន សែន ដែលធ្លាប់ជាសត្រូវនឹងគ្នា វិញម្តង។ លោក កឹម សុខា និងលោក ហ៊ុន សែន កន្លងមកមើលមុខគ្នាមិនសូវចំនោះទេ។ លោក ហ៊ុន សែន ធ្លាប់រិះគន់លោក កឹម សុខា ថា ជាមនុស្សក្បាលរឹង និងធ្លាប់ព្រមានបោះឆ្នោតទម្លាក់លោក កឹម សុខា ពីអនុប្រធានរដ្ឋសភា ព្រមទាំងធ្លាប់ និយាយពីបុណ្យសពលោក កឹម សុខា ខណៈដែលលោក កឹម សុខា មិនទាន់ស្លាប់ផង។
ដូច្នេះតើលោក កឹម សុខា មានអារម្មណ៍ត្រេកអរ ឬអន់ចិត្តខ្លះដែរ នៅពេលដែលឃើញមហាមិត្តរបស់លោក គឺលោក សម រង្ស៊ី ដែលធ្លាប់ស្បថជាមួយគ្នាថា លោកទាំងពីរគ្មានថ្ងៃបែកបាក់គ្នានោះ ថតរូបSelfie និងពិសាបាយជុំគ្នាជាមួយលោក ហ៊ុន សែន យ៉ាងល្អូកល្អិន?
តែយ៉ាងណាក្នុងនាមជាអ្នកនយោបាយ ហើយជាជនជាតិខ្មែរដូចគ្នា ការចាប់ដៃគ្នា ញញឹមដាក់គ្នា ពិភាក្សាគ្នារបស់អ្នកនយោបាយដទៃទៀត ដើម្បីប្រយោជន៍ប្រទេសជាតិ គឺជារឿងដែលគួរសាទរ៕
© រក្សាសិទ្ធិដោយ thmeythmey.com
