ជាតិ
សង្គមជាតិ
×![]()
ដោយ: ម៉ៅ សុផា
កញ្ញា ឯក សុជាតា ហៅសាសា សម្តែងអារម្មណ៍សប្បាយចិត្ត និងអរគុណ លោក ស ខេង រដ្ឋមន្ត្រីក្រសួងមហាផ្ទៃ ដែលបានប្រកាសឲ្យមន្ត្រីនគរបាលទាំងអស់តាមចាប់ខ្លួនលោក សុខ ប៊ុន ដែលប្រើអំពើហិង្សាលើកញ្ញា មកដោះស្រាយតាមផ្លូវច្បាប់។ ការប្រកាសរបស់លោក ស ខេង ធ្វើឡើងក្នុងសិក្ខាសាលាស្តីពីបញ្ហាបច្ចុប្បន្នភាពព្រំដែនកម្ពុជា-វៀតណាម នាពេលព្រឹក ថ្ងៃនេះ។
ការប្រកាសរបស់លោក ស ខេង ដែលបញ្ជាឲ្យអគ្គស្នងការនគរបាលជាតិ និងមន្ត្រីនគរបាលទាំងអស់តាមចាប់ លោក សុខ ប៊ុន ពិតជាធ្វើឲ្យកញ្ញា សាសា ធូរចិត្ត និងកក់ក្តៅយ៉ាងខ្លាំង។ កញ្ញាសម្តែងពីអារម្មណ៍ខ្លួនយ៉ាងនេះថា៖ «ខ្ញុំសប្បាយចិត្តមែនទែន ពេលដែលដឹងថា ឯកឧត្តម ស ខេង ប្រកាសឲ្យចាប់ខ្លួនលោក សុខ ប៊ុន។ ខ្ញុំពិតជាអរគុណគាត់ខ្លាំងណាស់ ដែលគាត់ជួយអន្តរាគមន៍។ ពេលគាត់ជួយរកយុត្តិធម៌ឲ្យខ្ញុំអីចឹង ធ្វើឲ្យខ្ញុំ និងស្ត្រីដទៃទៀតមានទំនុកចិត្ត ចំពោះអជ្ញា និងសមត្ថកិច្ច ហើយក៏ជាការព្រមានកុំឲ្យអ្នកមានលុយ មានអំណាចធ្វើអ្វីតាមតែអំពើចិត្តលើអ្នកទន់ខ្សោយជាងខ្លួន»។
ការប្រកាសរបស់ឧបនាយករដ្ឋមន្ត្រីរូបនេះ ស្របពេលដែលលោក សុខ ប៊ុន ចេញលិខិតសុំទោសកញ្ញា សាសា ជាសាធារណៈ និងសងជំងឺចិត្ត ចំនួន ១០ម៉ឺន ដុល្លារ ព្រមទាំងលាលែងចេញពីដំណែងទាំងអស់។ បើទោះបីជា លោក សុខ ប៊ុន សុំទោសកញ្ញាសាសា ជាសាធារណៈ និងសម្តែងការសោកស្តាយចំពោះទង្វើរបស់ខ្លួន យ៉ាងណាក៏ដោយ ក៏កញ្ញាសាសា មិនត្រជាក់ចិត្តសូម្បីតែបន្តិច។
កញ្ញាបញ្ជាក់ប្រាប់សារព័ត៌មានថ្មីៗថា៖ «ក្រៅពីដោះស្រាយតាមផ្លូវច្បាប់ អ្វីក៏ខ្ញុំមិនអាចទទួលយកបានដែរ។ បើរឿងលុយ ខាងខ្ញុំមិននិយាយតែម្តង ទោះជាប៉ុនណាក៏ដោយ។ អ្វីដែលខ្ញុំចង់បានធំបំផុត គឺសុំឲ្យលោក សុខ ប៊ុន ចេញមុខមកដោះស្រាយជាមួយខ្ញុំតាមផ្លូវច្បាប់ មិនត្រូវលាក់ខ្លួនអីចឹងទេ»៕
© រក្សាសិទ្ធិដោយ thmeythmey.com
