អន្តរជាតិ
នយោបាយអន្តរជាតិ
លោក អូបាម៉ាត្រៀមប្រើអំណាចការពារកិច្ចព្រមព្រៀងអ៊ីរ៉ង់នៅសភា មិនខ្វល់ពីអ៊ីស្រាអែល
× ប្រធានាធិបតីអាមេរិកលោក បារ៉ាក់ អូបាម៉ា ម្សិលមិញនេះបញ្ជូនកិច្ចព្រមព្រៀងនុយក្លេអ៊ែរអ៊ី រ៉ង់ទៅស្ថាប័ននីតិបញ្ញត្តិដើម្បីផ្តល់សច្ចាប័ន។ គេសង្កេតឃើញថា នាយករដ្ឋមន្ត្រីអ៊ីស្រាអែល Benjamin Netanyahu បានអំពាវនាវឲ្យសភាអាមេរិកទាត់ចោលកិច្ចព្រមព្រៀងនេះ ដោយអះអាងថាវានឹងជួយឲ្យក្រុងតេហេរ៉ង់បង្កើនសកម្មភាពភេរវកម្មរបស់ខ្លួនក្នុងតំបន់។ យ៉ាងណាក៏ដោយលោក អូបាម៉ា បានព្រមានហើយថា លោកនឹងប្រើអំណាចជំទាស់របស់លោកប្រ ឆាំង រាល់ចេតនាទាត់ចោលកិច្ចព្រមព្រៀងនេះរបស់សមាជិកសភាផង។
សូមស្ដាប់ព័ត៌មានលម្អិត៖
ក្រោយមហាអំណាច៦ និងអ៊ីរ៉ង់ ឯកភាពគ្នាទទួលយកកិច្ចព្រមព្រៀងមួយ ស្តីពីកម្មវិធីនុយក្លេអ៊ែរអ៊ីរ៉ង់ គេមើលឃើញថា អ៊ីរ៉ង់អាចមានលទ្ធភាពកសាងទំនាក់ទំនងការទូត នយោបាយ និងសេដ្ឋកិច្ចជាមួយពិភពខាងក្រៅ។ អ៊ីរ៉ង់អាចរួចផុតពីទណ្ឌកម្ម និងអាចមានលទ្ធភាពបង្កើនកិច្ចសហប្រតិបត្តិការសេដ្ឋកិច្ច ដែលនាំឲ្យសេដ្ឋកិច្ចរបស់អ៊ីរ៉ង់រីកលូតលាស់ទៅមុខរហ័ស។ គេឃើញរដ្ឋមន្ត្រីក្រសួងសេដ្ឋកិច្ចអាល្លឺម៉ង់ Sigmar Gabriel ដឹកនាំក្រុមប្រតិភូមួយក្រុម ទៅទស្សនកិច្ចនៅទីក្រុងតេហេរ៉ង់។ វត្តមានមន្ត្រីជាន់ខ្ពស់អាល្លឺម៉ង់ គ្មានអ្វីក្រៅពីពិភាក្សាលើចំណងសេដ្ឋកិច្ចរវារដ្ឋទាំងពីរ ត្រៀមលក្ខណៈមុន មានការដកការហ៊ុំព័ទ្ធសេដ្ឋកិច្ចចេញនាពេលខាងមុខ។
យ៉ាងណាក៏ដោយ បញ្ហាកិច្ចព្រមព្រៀងអ៊ីរ៉ង់នេះ នៅមានរឿងចម្រូងចម្រាសច្រើនត្រូវដោះស្រាយ ជាពិសេសការផ្តល់សច្ចាប័នលើកិច្ចព្រមព្រៀងនេះ ដោយស្ថាប័នសភាអាមេរិកនៅពេលខាងមុខ។ លោកអូបាម៉ា បានបញ្ជូនកិច្ចព្រមព្រៀងនុយក្លេអ៊ែរ ដែលលោក ចន ឃឺរី ចុះហត្ថលេខាទៅសភាហើយកាលពីម្សិលមិញ ដើម្បីឲ្យសមាជិកសភាទាំងនោះ បោះឆ្នោតផ្តល់សច្ចាប័ន។ សម្ព័ន្ធមិត្តអាមេរិក គឺអ៊ីស្រាអែល ដង្ហើយឲ្យសមាជិកសភាអាមេរិកបោះឆ្នោតទាត់ចោលកិច្ចព្រមព្រៀងនេះ ដើម្បីបញ្ចៀសបញ្ហាធំកើតឡើង។
បើទោះមានការសាទរ និងគាំទ្រកិច្ចព្រមព្រៀងអ៊ីរ៉ង់ច្រើនក៏ដោយ អ្នកនយោបាយអាមេរិក និងសម្ព័ន្ធមិត្តអ៊ីស្រាអែលមិនបានត្រេកអរជាមួយឡើយ។ នាយករដ្ឋមន្ត្រីអ៊ីស្រាអែលលោក Benjamin Netanyahu បានហៅកិច្ចព្រមព្រៀងនេះថាជាកំហុសប្រវត្តិសាស្ត្រមួយ ហើយលោកព្រមានថា អ៊ីស្រាអែលមិនទទួលស្គាល់កិច្ចព្រមព្រៀងនេះទេ។ កន្លងមក សមាជិកសភាអាមេរិក មើលឃើញពីគ្រោះថ្នាកធំដែលនៅពេលដែលកិច្ចព្រមព្រៀង ផ្ទុយពីរដ្ឋាភិបាលលោក បារ៉ាក់ អូបាម៉ា។ គ្រោះថ្នាក់គឺដោយសារអ៊ីរ៉ង់ជារដ្ឋមហាអំណាចតំបន់ ដែលសកម្មក្នុងការជ្រោមជ្រែងរដ្ឋដែលប្រឆាំងអាមេរិកដូចជាស៊ីរី និងក្រុមប្រដាប់អាវុធមួយចំនួនដែលអាមេរិកចាត់ទុកជាក្រុមភេវជន (ដូចជាក្រុមហាម៉ាសប៉ាឡេស្ទីន ក្រុមហេស្បូឡាលីបង់ និងក្រុមហ៊ូធីនៅយេម៉ែន)។
ក្រោយមានការសម្រេចយកកិច្ចព្រមព្រៀងអ៊ីរ៉ង់ភ្លាម សមាជិកព្រឹទ្ធសភានិងបេក្ខជនប្រធានាធិបតីលោក Rand Paul បានប្រកាសថា លោកនឹងបោះឆ្នោតប្រឆាំងការផ្តល់សច្ចាប័នកិច្ចព្រមព្រៀងនុយក្លេអ៊ែរអ៊ីរ៉ង់នាពេលខាងមុខ។ ក្រៅពីព្រឹទ្ធសមាជិកនេះ គេឃើញសមាជិកសភាមកពីបក្សសាធារណៈច្រើនផ្សេងទៀតត្រៀមបោះឆ្នោតប្រឆាំងដែរ។
យ៉ាងណាក៏ដោយលោក អូបាម៉ា បានព្រមានថា លោកនឹងប្រើអំណាចជំទាស់ទាត់ចោលរាល់ចេតនារារាំងការឈានទៅអនុវត្តកិច្ចព្រមព្រៀងនុយក្លេអ៊ែរអ៊ីរ៉ង់របស់ក្រុមសមាជិកសភា។ លោក អូបាម៉ា ចង់ដោះស្រាយបញ្ហានេះ តាំងពីពេលលោកឡើងកាន់តំណែងដំបូងម្ល៉េះ ហើយលោកជឿជាក់ថា ការភ្ជាប់ទំនាក់ទំនងជាមួយអ៊ីរ៉ង់ឲ្យកាន់តែស្និទ្ធ មិនត្រឹមតែសាងបានសន្តិភាពប៉ុណ្ណោះទេ វាក៏នឹងជួយផ្លាស់ប្តូរសង្គមអ៊ីរ៉ង់ក្នុងពេលខាងមុខដូចគ្នា។
សូមរម្លឹកថា ទំនាក់ទំនងអាមេរិកនិងអ៊ីរ៉ងប្រេះឆា ក្រោយចលនាបដិវត្តន៍ផ្តួលរបបរាជានិយមនៅអ៊ីរ៉ង់ឆ្នាំ១៩៧៩ និងការចាប់ចំណាប់ខ្មាំងអាមេរិកដោយវាយប្រហារស្ថានទូតអាមេរិកបន្តបន្ទាប់គ្នាផង។ តាំងពីពេលនោះមក អ៊ីរ៉ង់ក្លាយជាសត្រូវដ៏ធំរបស់រដ្ឋអាមេរិកនៅមជ្ឈិមបូព៌ា និងជាគ្រោះថ្នាក់សម្រាប់អ៊ីស្រាអែល ដែលជាសម្ព័ន្ធរបស់អាមេរិក៕
© រក្សាសិទ្ធិដោយ thmeythmey.com