ជាតិ
សង្គមជាតិ
ក្រសួងទេសចរណ៍បរាជ័យដោះស្រាយរឿងការដំឡើងថ្លៃសេវាពេលបុណ្យទាន
× សៀមរាប៖ ការដំឡើងថ្លៃផ្ទះសំណាក់ សណ្ឋាគារ និងម្ហូបអាហារ វាសឹងក្លាយជារឿងសាមញ្ញទៅហើយនៅតាមបណ្តាខេត្តទេសចរណ៍ក្នុងប្រទេសកម្ពុជា។ ក្នុងរដូវបុណ្យទានម្តងៗ គេតែងឮការរអ៊ូរទាំពីសំណាក់ភ្ញៀវទេសចរ ដែលពិបាករកកន្លែងស្នាក់នៅ និងម្ហូបឡើងថ្លៃកប់ពពក។ ក្រសួងទេសចរណ៍ ដែលរ៉ាប់រងនឹងបញ្ហាខាងដើមនេះ ជានិច្ចកាលតែងស្នើឲ្យម្ចាស់អាជីវកម្មទាំងអស់ ធ្វើយ៉ាងណាមិនត្រូវដំឡើងសេវាថ្លៃផ្ទះសំណាក់ សណ្ឋាគារ និងម្ហូបអាហារពេលមានបុណ្យធំៗ ដូចជាពិធីបុណ្យចូលឆ្នាំ និងព្រឹត្តិការណ៍អង្គរសង្ក្រាន្តជាដើម។ យ៉ាងណាមិញ បញ្ហាដដែលនេះនៅតែមាន ហើយរាល់កិច្ចប្រជុំតែងលើកឡើង តែត្រង់ថា ក្រសួងមិនទាន់មានចំណាត់ការជាក់លាក់ ដើម្បីដោះស្រាយបញ្ហានេះបាននៅឡើយទេ។
រដ្ឋមន្ត្រីក្រសួងទេសចរណ៍លោក ថោង ខុន បានទទួលស្គាល់ចំពោះភាពបរាជ័យរបស់លោកក្នុងការទប់ស្កាត់ ការដំឡើងថ្លៃសេវាកម្មក្នុងរដូវបុណ្យសំខាន់ម្តងៗ ។ លោក ថោង ខុន បន្ថែមថា លោកតែងតែណែនាំដល់ម្ចាស់សេវាកម្មទាំងអស់ ពិចារណាចំពោះការដំឡើងថ្លៃ ព្រោះថាពួកគេនឹងត្រូវបាត់បង់អតិថិជនទំាងនោះនៅពេលក្រោយ។ បើតាមការអះអាងរបស់លោក ថោង ខុន បញ្ហានេះក៏បានរង្គោះរង្គើដល់កំណើនភ្ញៀវទេសចរនៅកម្ពុជាផងដែរ ហើយពួកគេអាចបង្វែរទិសដៅទៅប្រទេសដទៃ នៅពេលមានបុណ្យសំខាន់ៗ ។
ក្នុងកិច្ចប្រជុំពិភាក្សាវិស័យទេសចរណ៍ ជាមួយផ្នែកឯកជននៅសាលាខេត្តសៀមរាបនៅព្រឹកថ្ងៃទី២០ កក្កដា លោក ថោង ខុន បានពន្យល់ដល់ផ្នែកឯកជន ជាពិសេសមគ្គុទ្ទេសក៍ទេសចរណ៍ ដែលមានចម្ងល់ជុំវិញបញ្ហាខាងលើថា លោកនឹងខិតខំបន្ថែមដើម្បីធ្វើយ៉ាងណា ទប់ស្កាត់ការដំឡើងថ្លៃសេវាអំឡុងពេលមានពិធីបុណ្យទាននេះ។ លោករដ្ឋមន្ត្រីពន្យល់ថា ក្រៅពីការចុះអប់រំ ក្នុងនោះដំណោះស្រាយ និងនយោបាយថ្មីដែលត្រូវអនុវត្តនោះ គឺត្រូវបំផុសឲ្យប្រជាពលរដ្ឋចេះរៀបចំផ្ទះទទួលភ្ញៀវ ដែលមានចំនួនច្រើនពេលមានបុណ្យទានម្តងៗ ។
«ធម្មតានៅពេលមានបុណ្យទាន តម្រូវការ និងការប្រើប្រាស់ មិនស្របគ្នាទេ។ ការបំផុសឲ្យពលរដ្ឋចេះរៀបចំផ្ទះ ដើម្បីទទួលភ្ញៀវទេសចរ គឺជានយោយបាយថ្មី ហើយប្រទេសជាច្រើនក៏គេបានអនុវត្តរួចហើយដែរ មានប្រទេសកូរ៉េខាងត្បូងជាដើម...»។ នេះជាការបញ្ជាក់បន្ថែមរបស់លោករដ្ឋមន្ត្រីក្រសួងទេសចរណ៍។
សូមស្តាប់ការពន្យល់របស់លោក ថោង ខុន រដ្ឋមន្ត្រីក្រសួងទេសចរណ៍ជុំវិញបញ្ហាការដំឡើងថ្លៃសេវា ក្នុងរដូវបុណ្យសំខាន់ៗ និងការខ្វះខាតផ្គត់ផ្គង់ម្ហូបអាហារនៅតាមអាហារដ្ឋានមួយចំនួន
© រក្សាសិទ្ធិដោយ thmeythmey.com