លោក សម រង្ស៊ី ថា ស្ថានការណ៍នយោបាយល្អ ខណៈសកម្មជនបក្សខ្លួន១១នាក់ជាប់ពន្ធនាគារ

ជាតិ

នយោបាយជាតិ

លោក សម រង្ស៊ី ថា ស្ថានការណ៍នយោបាយល្អ ខណៈសកម្មជនបក្សខ្លួន១១នាក់ជាប់ពន្ធនាគារ

22, Jul 2015 , 12:39 pm

រូបភាព

ដោយ: រំដួល ចិត្រា (Romdoul Chetra)

ប្រធានគណបក្សសង្គ្រោះជាតិលោក សម រង្ស៊ី មានប្រសាសន៍ថា ស្ថានការណ៍នយោបាយនៅប្រទេសកម្ពុជា មានភាពល្អប្រសើរជាងមុន គួរឲ្យកត់សម្គាល់ ខណៈដែលថ្ងៃទី២២ កក្កដានេះ គឺជាខួប១ឆ្នាំ នៃការចុះហត្ថលេខាលើកិច្ចព្រមព្រៀងនយោបាយរវាងគណបក្សជាប់ឆ្នោតទាំងពីរ គឺគណបក្សប្រជាជនកម្ពុជា និងគណបក្សសង្គ្រោះជាតិ។

លោក សម រង្ស៊ី ប្រធានគណបក្សសង្គ្រោះជាតិ បានសរសេរលើទំព័រហ្វេសបុករបស់ខ្លួនថា ទោះជានៅមានបញ្ហាជាច្រើនទៀត ដែលគណបក្សទាំងពីរមិនទាន់ឯកភាពគ្នានៅឡើយ និងទោះជាមានព្យុះភ្លៀងនិងផ្គរក៏ដោយ ក៏គណបក្សសង្គ្រោះជាតិនៅតែខិតខំរក្សា និងពង្រឹងវប្បធម៌សន្ទនា ដែលបានកើតចេញពីកិច្ចព្រមព្រៀងខាងលើនេះ។ លោក សម រង្ស៊ី ដែលនៅតែបញ្ជាក់ពីជំហររបស់ខ្លួននៅក្នុងការថែរក្សាវប្បធម៌សន្ទនា ដែលបង្កើតឡើងដោយរូបលោក និងលោក ហ៊ុន សែន នោះ បានបញ្ជាក់យ៉ាងដូច្នេះថា៖« ថ្ងៃនេះ ជាខួបទីមួយនៃការចុះហត្ថលេខាលើកិច្ចព្រមព្រៀង ស្តីពីដំណោះស្រាយនយោបាយ រវាងគណបក្សប្រជាជនកម្ពុជា និងគណបក្សសង្គ្រោះជាតិ កាលពីថ្ងៃទី ២២ ខែកក្កដា ឆ្នាំ ២០១។ ក្នុងរយៈពេលមួយឆ្នាំកន្លងមកនេះ ស្ថានការណ៍នយោបាយនៅប្រទេសកម្ពុជា មានភាពល្អប្រសើរជាងមុន គួរឲ្យកត់សម្គាល់»។

ការកត់សម្គាល់របស់លោក សម រង្ស៊ី ជុំវិញស្ថានការណ៍នយោបាយរយៈពេល១ឆ្នាំ នៃកិច្ចព្រមព្រៀងនយោបាយនេះ ធ្វើឡើងមួយថ្ងៃ បន្ទាប់ពីតុលាការក្រុងភ្នំពេញបានសម្រេចសាលក្រម សំណុំរឿងលោក មាជ សុវណ្ណារ៉ា និងសកម្មជនគណបក្សសង្គ្រោះជាតិចំនួន១០រូបទៀត ឲ្យជាប់ពន្ធនាគារ ៧ឆ្នាំ ទៅ២០ឆ្នាំ ពីពីបទ «ដឹកនាំកូបកម្ម និងអំពើចូលរួមក្នុងអំពើកូបកម្ម» ពាក់ព័ន្ធនឹងករណីប៉ះទង្គិចគ្នាដោយហិង្សា នៅក្បែរស្ពាននាគ កាលពីថ្ងៃទី១៥ កក្កដា ឆ្នាំ២០១៤ ។

ការសម្រេចសាលក្រមរបស់តុលាការនេះ ត្រូវបានសង្គមស៊ីវិលយល់ថា ជារឿងពាក់ព័ន្ធបញ្ហានយោបាយ ក្រោយពីគណបក្សសង្គ្រោះជាតិ បានសើរើរឿងព្រំដែនឡើងវិញ៕