ជាតិ
សង្គមជាតិ
សមាគមចុងភៅមិនបោះបង់មហិច្ឆតាចង់ធ្វើអាមុកយក្សទម្ងន់មួយតោន
× សៀមរាប៖ អាមុកយក្សដែលមានទម្ងន់មួយតោន គ្រោងនឹងបង្ហាញខ្លួនក្នុងព្រឹត្តិការណ៍អង្គរសង្ក្រាន្តឆ្នាំ២០១៦ខាងមុខនេះហើយ។ សមាគមចុងភៅកម្ពុជា ដែលគេស្គាល់ថា បានបង្កើតព្រឹត្តិការណ៍ដ៏អស្ចារ្យសម្រាប់ប្រទេសកម្ពុជា ដែលបានធ្វើនំអន្សមយក្សទម្ងន់ជាង៤ពាន់គីឡូក្រាមនោះ មានមហិច្ឆតាធ្វើអាមុកទម្ងន់មួយតោន ក្នុងបំណងយកប្រភេទម្ហូបខ្មែរ បង្ហាញដល់អន្តរជាតិបានស្គាល់។
«ប្រសិនព្រឹត្តិការណ៍អង្គរសង្ក្រាន្តឆ្នាំ២០១៦នៅតែបន្តធ្វើ តាមគោលបំណងរបស់យើង គឺធ្វើអាមុកយក្សទម្ងន់មួយតោនម្តង»។ នេះជាការលើកឡើងរបស់លោក ឡង់ បូរ៉ា អនុប្រធានសមាគមចុងភៅកម្ពុជា។ ក្នុងពិធីទទួលបណ្ណសរសើរពីរដ្ឋមន្ត្រីក្រសួងទេសចរណ៍ ចំពោះការខិតខំប្រឹងប្រែងផលិតនំអន្សមយក្សឲ្យអន្តរជាតិបានស្គាល់ ដោយធ្វើឲ្យនំអន្សមទម្ងន់ជាង៤ពាន់ ចូលទៅក្នុងកំណត់ត្រាសៀវភៅ ហ្គីណេស កាលពីថ្ងៃទី២០ កក្កដា លោក បូរ៉ា បញ្ជាក់ថា សមាគមចុងភៅរបស់លោក មានគម្រោងរួចជាស្រេច រាល់ការរៀបចំធ្វើអាមុកយក្ស។
បើទោះជាមានមហិច្ឆតាយ៉ាងមុតមាំយ៉ាងណាក្តី តែរាល់ការចំណាយ និងធនធានឧបត្ថម្ភដើម្បីធ្វើអាមុក អនុប្រធានសមាគមចុងភៅ លោក បូរ៉ា មិនទាន់អាចបញ្ជាក់បាននៅឡើយទេ។ លោកពន្យល់ថា៖« យើងមិនទាន់សិក្សាឲ្យលម្អិតថាអស់ប៉ុន្មានទេ។ ក្នុងនោះត្រូវចំណាយលើការធ្វើពុម្ព សាច់ត្រីដែលយើងគ្រោងចំណាយអស់ ៧០០គីឡូ ផ្សិត ស្លឹកញ៉ និងគ្រឿងផ្សំផ្សេងៗទៀត សរុបទាំងអស់ សាច់អាមុកអាចមានទម្ងន់ប្រហាក់ប្រហែលមួយតោន»។
លោក ឡង់ បូរ៉ា ពន្យល់ពីមូលហេតុដែលធ្វើឲ្យសមាគមចុងភៅរបស់លោកធ្វើអាមុកយក្សនេះថា៖« យើងចង់យកផ្នែកម្ហូបចូលរួម (សៀវភៅហ្គីណេស) ម្តង ព្រោះថាផ្នែកនំយើងបានចូលរួមរួចហើយ។ គោលបំណងសំខាន់ គឺចង់យកប្រភេទម្ហូបខ្មែរ បង្ហាញឲ្យអន្តរជាតិស្គាល់បានកាន់តែច្រើន»។ អាមុកយក្សទម្ងន់មួយតោន ដែលសមាគមចុងភៅគ្រោងធ្វើនៅឆ្នាំក្រោយនេះ អាចនិយាយបានថា គ្រាន់តែជាការសាកល្បងតែប៉ុណ្ណោះ។ ប្រសិនបើបានជោគជ័យក្នុងការផលិត សមាគមចុងភៅគ្រោងនឹងស្នើសុំយកអាមុកយក្ស ចុះទៅក្នុងសៀវភៅកំណត់ត្រាពិភពលោក Guinness World Records ផងដែរ។
គួរបញ្ជាក់ថា សមាគមចុងភៅកម្ពុជា បានប្រកាសភ្លាមៗក្រោយទទួលបានជោគជ័យក្នុងការធ្វើនំអន្សមយក្សទម្ងន់ ៤០៤០គីឡូ នៅទីលានជល់ដំរី ខេត្តសៀមរាប ថាខ្លួននឹងធ្វើអាមុកយក្ស ដើម្បីចូលរួមក្នុងព្រឹត្តិការណ៍អង្គរសង្ក្រាន្តឆ្នាំ២០១៦ខាងមុខ៕
© រក្សាសិទ្ធិដោយ thmeythmey.com