សន្តិសុខឧបទ្វីបកូរ៉េកាន់តែផុយស្រួយ ខណៈកូរ៉េខាងជើងត្រៀមបាញ់មីស៊ីលចម្ងាយឆ្ងាយជាថ្មី

អន្តរជាតិ

សន្តិសុខឧបទ្វីបកូរ៉េកាន់តែផុយស្រួយ ខណៈកូរ៉េខាងជើងត្រៀមបាញ់មីស៊ីលចម្ងាយឆ្ងាយជាថ្មី

23, Jul 2015 , 11:39 am

រូបភាព

ដោយ:

ទោះបីប្រទេសកំពុងតែស្ថិតនៅក្រោមទណ្ឌកម្មរបស់អង្គការសហប្រជាជាតិក៏ដោយ រដ្ឋាភិបាលកូរ៉េខាងជើងនៅតែបន្តមហិច្ឆតារបស់ខ្លួនក្នុងការបង្កើនសមត្ថភាព និងផលិតសព្វាវុធទំនើប។ ស្របពេលខួបលើកទី៧០ នៃការបង្កើតប្រទេសជិតមកដល់នោះ រដ្ឋាភិបាលកូរ៉េខាងជើង បានសាងសង់មូលដ្ឋានមីស៊ីលថ្មីដែលមានឥទ្ធិពលខ្លាំង និង អាចបាញ់បានចម្ងាយឆ្ញាយជាងមុនដែរ។ គេរំពឹងថា គេអាចបាញ់មីស៊ីលបាននៅក្នុងថ្ងៃគំរប់ខួបខាងមុខនេះដែរ។

រដ្ឋាភិបាលក្រុងព្យ៉ុងយ៉ាង បានសាងសង់មូលដ្ឋានសម្រាប់បាញ់មីស៊ីលថ្មីដែលមានសមត្ថភាពខ្ពស់និង អាចបាញ់បានចម្ងាយកាន់តែឆ្ញាយជាងមុនទៀត។ ការសាងសង់នេះ ទំនងជាត្រៀមសម្រាប់បាញ់មីស៊ីល នៅក្នុងថ្ងៃខួបរំលឹកនៃការកកើតឡើងនៃសាធារណៈរដ្ឋប្រជាមានិតប្រជាធិបតេយ្យកូរ៉េផងដែរ។ នេះបើយោងតាមភា្នក់ងារសារពត៌មានកូរ៉េខាងត្បូង Yonhap ។

មូលដ្ឋានមីស៊ីលដែលមានកម្ពស់ប្រមាណ៦៧ម៉ែត្រ នឹងត្រូវបានប្រើប្រាស់ដើម្បីបាញ់កាំជ្រួចមីស៊ីលថ្មី ពិតជាមានឥទ្ធិពលខ្លាំង និង អាចបាញ់ចេញទៅលំហកាន់តែខ្ពស់ ដើម្បីជាការសាទរនៃខួបលើកទី៧០ នៃការបង្កើតគណបក្សកម្មករ។ ថ្វីត្បិតព័ត៌មាននេះមិនទាន់ត្រូវបានបញ្ជាក់ច្បាស់ក៏ដោយ លទ្ធភាពនៃការអាចកើតឡើងគឺមានច្រើន ព្រោះតាមទម្លាប់កូរ៉េខាងជើងមិនងាយជូនដំណឹងឬ ផ្សាយពីការបាញ់មីស៊ីលរបស់ខ្លួនជាមុនឡើយ ។

ជាក់ស្តែងកាលពីឆ្នាំ ២០១២ កូរ៉េខាងជើង បានធ្វើពិភពលោកភ្ញាក់ផ្អើលដោយសារតែការមីស៊ីលទៅក្នុងលំហម្តងរួចហើយ។ លើសពីនេះទៅទៀតកូរ៉េខាងជើង ក៏សម្រេចបានមីស៊ីលយុទ្ធសាស្ត្រដែលអាចបាញ់ចេញពីនាវាមុជទឹកផងដែរកន្លងមក។ សកម្មភាពផលិតអាវុធទំនើបៗទាំងនេះ សុទ្ធសឹងតែធ្វើឡើងដោយសម្ងាត់ និង មិនមានជូនដំណឹងមុនឡើយ។

យ៉ាងណាក៏ដោយ ប្រសិនបើរដ្ឋាភិបាលក្រុងព្យ៉ុងយ៉ាង ពិតជាបាញ់មីស៊ីលមែននោះ សន្តិសុខនៅឧបទ្វីបកូរ៉េដែលកំពុងតានតឹងស្រាប់នោះ នឹងត្រូវស្ថិតក្រោមការគំរាមកំហែងខ្លាំង។ ជាពិសេសនោះ កូរ៉េខាងជើង អាចនឹងទទួលរងនូវទណ្ឌកម្មថ្មីបន្ថែមទៀត បន្ថែមលើទណ្ឌកម្មអង្គការសហប្រជាជាតិដែលមានស្រាប់នោះ ព្រោះតែការបន្តសកម្មភាពផលិតអាវុធប្រល័យលោករបស់ខ្លួន៕