ពីនេះ ពីនោះ
សតិសម្បជញ្ញៈបញ្ញវន្តនៃប្រទេសរំដួល ប្រែប្រួលតាមអំណាចទឹកប្រាក់ និងអំណាចបុណ្យស័ក្តិ!
×
នៅក្នុងប្រទេសជឿនលឿនស៊ីវិល័យដែលការអប់រំមានកម្រិតខ្ពស់ និងមានសីលធម៌ល្អ បញ្ញវន្ត គឺជាក្រុមមនុស្សដែលហ៊ានចេញមុខតស៊ូមតិ ឬចេញមុខតវ៉ាជាមួយមេដឹកនាំនៃប្រទេសរបស់ខ្លួនណាដែលដឹកនាំប្រទេសបែបផ្តាច់ការ ឬរុញច្រានប្រទេសអោយចូលទៅក្នុងរណ្តៅនៃភាពក្រីក្រ។ បញ្ញវន្តនៃប្រទេសទាំងនោះ ទិញមិនលក់ សំឡុតមិនខ្លាច តែផ្ទុយទៅវិញ ពួកគេរឹតតែហ៊ានប្រឆាំងទៅនឹងអំពើផ្តាច់ការបន្ថែមទៀត។ នៅក្នុងប្រទេសថៃ ជាឧទាហរណ៍ស្រាប់ លោកថាក់ស៊ីន ស៊ីណាវ៉ាត់ត្រា មិនអាចស្ថិតនៅក្នុងតំណែងបាន គឺដោយសារ ចលនាបញ្ញវន្តនៅក្នុងប្រទេសថៃមានជំហរខ្លាំង និងពិតប្រាកដ។
ងាកមកនិយាយពីបញ្ញវន្តនៅក្នុងប្រទេសរំដួលវិញ។ បញ្ញវន្តនៃប្រទេសមួយនេះ ត្រូវបានគេមើលឃើញថា មិនមានជំហរអ្វីពិតប្រាកដឡើយ។ ពួកគេអះអាងថា ពួកគេស្នេហាជាតិ, មិនលក់ឧត្តមគតិ, ស្មោះត្រង់, នៅពេលណាដែលលាភសក្ការៈមិនទាន់មកដល់។ ប៉ុន្តែ ប្រសិនបើលាភសក្ការៈមកដល់ហើយ មិនថា លាភនោះជាប្រាក់ ឬជាអំណាចទេ សតិសម្បជញ្ញៈ, ឧត្តមគតិស្នេហាជាតិ, ភាពស្មោះត្រង់, បានរសាត់ឆ្ងាយបន្តិចម្តងចេញពីខួរក្បាលបញ្ញវន្តនៃប្រទេសរំដួលហើយ៕
© រក្សាសិទ្ធិដោយ thmeythmey.com