ជាតិ
សង្គមជាតិ
ការលើកស្ទួយទេសចរណ៍ជនជាតិដើមភាគតិចកម្ពុជាជួយកាត់បន្ថយភាពក្រីក្រក្នុងសហគមន៍
×![]()
×![]()
សិក្ខាសាលាពិគ្រោះយោបល់ជុំវិញការអភិវឌ្ឍទេសចរណ៍ជនជាតិដើមភាគតិចភាគឥសាន្តប្រទេសកម្ពុជា ត្រូវបានរៀបចំឡើងនៅក្នុងខេត្តរតនគីរី និងមណ្ឌលគីរី ដោយសកលវិទ្យាល័យភូមិន្ទភ្នំពេញ សហការជាមួយវិទ្យាស្ថានអភិវឌ្ឍន៍កូរ៉េខាងត្បូង (ReDI) ។ សិក្ខាសាលានេះមានកម្មវត្ថុបង្ហាញពីសមិទ្ធផលគម្រោងស្រាវជ្រាវអភិវឌ្ឍន៍ទេសចរណ៍ជនជាតិដើម ដើម្បីជំរុញឲ្យ ការរក្សាអត្តសញ្ញាណជនជាតិដើម បង្កើនចំណូល និងជួយកាត់បន្ថយភាពក្រីក្រក្នុងសហគមន៍ជនជាតិដើមភាគតិចតាមរយៈការអភិវឌ្ឍវិស័យទេសចរណ៍ផងដែរ។
សិក្ខាសាលាចំនួនពីរត្រូវបានរៀបចំឡើងនៅថ្ងៃ៤ និងថ្ងៃ ៦ខែសីហាកន្លងទៅនៅក្នុងខេត្តរតនគីរី និងមណ្ឌលគីរី ដោយផ្តោតលើការពិគ្រោះយោបល់លើការជំរុញការអភិវឌ្ឍន៍តំបន់ទេសចរណ៍ជនជាតិដើមភាគតិចនៅភូមិភាគឥសាន្តប្រទេសកម្ពុជា។ សិក្ខាសាលានេះត្រូវបានរៀបចំឡើងដោយមានការសហការគ្នារវាងសាកលភូមិន្ទភ្នំពេញ ក្រសួងទេសចរណ៍ និង វិទ្យាស្ថានអភិវឌ្ឍន៍របស់កូរ៉េ ក្រោមជំនួយឧបត្ថម្ភរបស់ទីភ្នាក់ងារសហប្រតិបត្តិការអន្តរជាតិកូរ៉េ (KOICA)។ យោងតាមសេចក្តីប្រកាសព័ត៌មានរបស់ដេប៉ាតឺម៉ង់អភិវឌ្ឍន៍សហគមន៍នៃសាកលវិទ្យាល័យភូមិន្ទភ្នំពេញ សិក្ខាសាលាដែលត្រូវបានរៀបចំឡើងពីរថ្ងៃនេះគឺដើម្បីបង្ហាញសមិទ្ធផលសម្រេចបានក្រោយពីអនុវត្តគម្រោងស្រាវជ្រាវស្តីពី«យុទ្ធសាស្ត្រអភិវឌ្ឍន៍ទេសចរណ៍ជនជាតិភាគតិចនៅភាគឥសាន្តប្រទសកម្ពុជា»អស់ប្រហែល៦ខែមកហើយនោះ។
សិក្ខាសាលាត្រូវបានគេរៀបចំឡើងរយៈពេលពីរថ្ងៃដាច់ពីគ្នា ដោយថ្ងៃទី ៤សីហា សិក្ខាសាលាធ្វើឡើងនៅមន្ទីរទេសចរណ៍ខេត្តរតនគីរី និងថ្ងៃទី៦សីហា សិក្ខាសាលានេះត្រូវបានប្រាព្ធឡើងនៅខេត្តមណ្ឌលគីរី។ គេឃើញមានវត្តមានសាកលវិទ្យាធិការរងសាកលវិទ្យាល័យភូមិន្ទភ្នំពេញលោក សុខ វណ្ណី ប្រធានវិទ្យាស្ថានអភិវឌ្ឍន៍ Lee Tae Joo នាយិការងទីភ្នាក់ងារ KOICA ក៏ដូចជាមន្ត្រីជំនាញមកពីមន្ទីរវប្បធម៌ មន្ទីរកសិកម្ម មន្ទីរបរិស្ថាន អង្គការក្រៅរដ្ឋាភិបាល និងអភិបាលរងខេត្តទាំងពីរ។យោងតាមប្រសាសន៍សាកលវិទ្យាធិការរងនៃសាកលវិទ្យាល័យភូមិន្ទភ្នំពេញលោក សុខ វណ្ណី គម្រោងស្រាវជ្រាវនេះអាចជួយឲ្យសហគមន៍ជនជាតិដើមភាគតិចលើកកម្ពស់អត្ដសញ្ញាណខ្លួនឯង អាចស្វែងរកប្រាក់ចំណូលបន្ថែមក្នុងគ្រួសារ និងការកាត់បន្ថយភាពក្រីក្រក្នុងសហគមន៍ជនជាតិដើមភាគិតិចកម្ពុជាផង តាមរយៈការលើកស្ទួយផលិតផលទេសចរណ៍តាមបែបជនជាតិដើមភាគតិចផង។
ទីតាំងសំខាន់ៗចំនួនពីរក្នុងខេត្តរតនគីរីនិងមណ្ឌលគីរីត្រូវបានគេជ្រើសរើសសម្រាប់ការស្រាវជ្រាវ ហើយអ្នកទេសចរប្រហែល៥០០នាក់ត្រូវបានជ្រើសរើសសម្រាប់ការស្ទង់មតិ។ ក្រោយអនុវត្តគម្រោងអស់ពេល៦ខែមកនេះ ស្ថាប័នពាក់ព័ន្ធបង្កើតបានរបាយកាណ៍មួយដែលបង្ហាញពីលទ្ធភាពនៃការអភិវឌ្ឍន៍វិស័យទេសចរណ៍ជនជាតិដើមភាគតិច ព្រមទាំងបញ្ហាប្រឈមនានាដែលចាំត្រូវដោះស្រាយផង។ អ្វីដែលសំខាន់របាយការណ៍ស្រាវជ្រាវបានផ្តល់ជាអនុសាសន៍ឬផែនការយុទ្ធសាស្ត្រសំខាន់ៗជាច្រើនសម្រាប់ស្ថាប័នពាក់ព័ន្ធមកប្រើប្រាស់ជំរុញឲ្យការអភិវឌ្ឍន៍ទេសចរណ៍ជនជាតិដើមភាគតិចនៅភូមិភាគឥសាន្តប្រទេសកម្ពុជាអាចសម្រេចជោគជ័យនិងប្រកបដោយចីរភាព។
ក្រោយអ្នកជំនាញធ្វើបទបង្ហាញ ដោយលើកឡើងពីសមិទ្ធផលនៃការស្រាវជ្រាវនិងអនុសាស្ត្រជាយុទ្ធសាស្ត្រដើម្បីសម្រេចឲ្យបាននូវការអភិវឌ្ឍវិស័យទេសចរណ៍ជនជាតិដើមភាគតិចនៅភាគឥសាន្តប្រទេសកម្ពុជា មន្ត្រីតំណាងអាជ្ញាធខេត្តនិងក្រសួងពាក់ព័ន្ធបានបង្ហាញក្តីរីករាយនិងគាំទ្រយ៉ាងខ្លាំងផងដែរ។ គេរំពឹងថាគម្រោងស្រាវជ្រាវនេះនឹងចូលរួមចំណែកយ៉ាងសំខាន់ក្នុងការលើកកម្ពស់ការអភិវឌ្ឍន៍វិស័យទេសចរណ៍ជនជាតិដើមភាគតិច និងជំរុញឲ្យវិស័យនេះក្លាយជាវិស័យដែលមានសក្តានុពលទាក់ទាញភ្ងៀវទេសចរនិងបង្កើនចំណូលប្រជាជនក្នុងតំបន់ដែរ៕
Tag:
ទេសចរណ៍ជនជាតិដើមភាគតិច
RUPP
© រក្សាសិទ្ធិដោយ thmeythmey.com
