អន្តរជាតិ
អ្នកទេសចរបារាំងពីរនាក់ប្តីប្រពន្ធសុខចិត្តស្លាប់ ដោយទុកទឹកសង្គ្រោះជីវិតកូន
សហរដ្ឋអាមេរិក ៖ អ្នកទេសចរពីរនាក់ប្តីប្រពន្ធបានស្លាប់ នៅពេលដែលពួកគេដើរកម្សាន្តនៅក្នុងតំបន់វាលរហោឋាននៃរដ្ឋ New Mexico ដែលស្ថិតនៅភាគនិរតីសហរដ្ឋអាមេរិក។ ដោយសារតែកម្តៅឡើងខ្ពស់ពេក ប្តីប្រពន្ធមួយគូនេះសុខចិត្តសង្គ្រោះជីវិតកូន ដោយទុកទឹកឲ្យកូនផឹក នេះបើតាមការបញ្ជាក់របស់ប៉ូលិស កាលពីថ្ងៃសុក្រនេះ។
លោក David Steiner អាយុ ៤២ ឆ្នាំ និងភរិយា Ornella Steiner អាយុ ៥១ ឆ្នាំមកពីតំបន់ Bourgogne ប្រទេសបារាំង បាននាំគ្នាដើរលេងនៅក្នុងឧទ្យានជាតិ White Sands កាលពីរសៀលថ្ងៃអង្គារកន្លងទៅនេះ ដោយមានទឹកតែពីរដបជាប់ជាមួយខ្លួនប៉ុណ្ណោះ។ ពេលនេះ លទ្ធផលនៃកោសលវិច័យមិនទាន់ត្រូវបានបង្ហាញនៅឡើយទេ តែជាការសន្និដ្ឋាន ពួកគេបានស្លាប់ដោយសារតែកម្តៅខ្ពស់ពេក នេះបើតាមការអះអាងរបស់ប៉ូលិសស៊ើបអង្កេតមួយរូបទៅកាន់ទីភ្នាក់ងារ AFP ។
ប៉ូលិសរូបនេះបញ្ជាក់ថា នៅពេលដែលក្រុមការងារឧទ្យានជាតិដើរមើលជុំវិញតំបន់នោះ ដំបូង ពួកគេប្រទះឃើញសាកសពរបស់ស្ត្រីជាម្តាយ។ ពួកគេក៏បើកមើលម៉ាស៊ីនថតរូប ហើយឃើញថា ស្ត្រីនេះមានគ្នាពីរនាក់ទៀត។ បន្ទាប់ពីដើរតាមដានជើង នៅទីបំផុត ពួកគេក៏រកឃើញបុរសជាឪពុកដែលបានបាត់បង់ជីវិតទៅហើយនៅក្បែរកូនប្រុសអាយុ ៩ ឆ្នាំម្នាក់។
ក្មេងប្រុសនេះនៅមានដង្ហើម តែខ្វះជាតិទឹកក្នុងខ្លួន។ ក្មេងនេះត្រូវបានបញ្ជូនភ្លាមៗទៅកាន់មន្ទីរពេទ្យមួយក្នុងតំបន់។ ជីតារបស់ក្មេងប្រុសបានមានប្រសាសន៍ថា៖ « David និង Ornella បានឲ្យទឹកដែលពួកគេមានចុងក្រោយទៅកូន ដើម្បីឲ្យកូនរស់រាន »។ បើតាមជីតារូបនេះ ក្មេងបានផុតពីគ្រោះថ្នាក់ហើយ ហើយនឹងត្រឡប់ទៅ Roissy ប្រទេសបារាំងជាមួយជីដូនវិញ។
បើតាមសារព័ត៌មាន Alamogordo Daily News ក្រុមគ្រួសារជនជាតិបារាំងនេះបានដើរកម្សាន្តនៅសហរដ្ឋអាមេរិក នៅតំបន់វាលរហោឋានដែលមានសីតុណ្ហភាពប្រមាណ ៣៨ អង្សាសេ។ នៅទីនោះ គឺមានតែវាលខ្សាច់លាតសន្ធឹងល្វឹងល្វើយ គ្មានម្លប់ដើមឈើ ហើយក៏គ្មានប្រភពទឹកដែរ៕
© រក្សាសិទ្ធិដោយ thmeythmey.com