ជាតិ
សិល្បះ
រឿង«៣.៥០»ដ៏ចម្រូងចម្រាស នឹងចាក់បញ្ចាំងនៅថ្ងៃទី១០ខែកញ្ញា
×
ខ្សែភាពយន្តរឿង«បីកន្លះ»ឬ«៣.៥០» ដ៏ចម្រូងចម្រាស នឹងចាក់បញ្ចាំងនៅរោងភាពយន្តក្នុងប្រទេសកម្ពុជា នៅថ្ងៃទី១០ខែកញ្ញាខាងមុខនេះ។ រោងភាពយន្តចំនួន៦នៅរាជធានីភ្នំពេញ និងខេត្តសៀមរាប នឹងចាក់បញ្ជាំងខ្សែភាពយន្តនេះព្រមគ្នានៅថ្ងៃទី១០ខែក្រោយនេះ។
ខ្សែភាពយន្ត ដែលឆ្លុះបញ្ចាំងពីអំពើជួញដូរផ្លូវភេទនិងមនុស្សខុសច្បាប់នៅកម្ពុជា បានទទួលភ្លើងខៀវពីក្រសួងវប្បធម៌និងវិចិត្រសិល្បៈ ឲ្យចាក់ផ្សាយឡើងវិញកាលពីខែមេសាកន្លងទៅ បន្ទាប់ពីរដ្ឋាភិបាលហាមឃាត់មិនឲ្យចាក់ផ្សាយតាំងពីឆ្នាំ២០១៣មក ក្រោមហេតុផលថាប៉ះពាល់ដល់សីលធម៌និងសេចក្តីថ្លែថ្នូររបស់ស្ត្រីកម្ពុជា។
ដោយមើលឃើញពីការចាប់អារម្មណ៍បញ្ហាសង្គមរបស់ពលរដ្ឋខ្មែរ ជាពិសេសយុវជន ផលិតករភាពយន្តរឿង «៣.៥០» លោក ឆាយ បូរ៉ា រំពឹងថាភាពយន្តមួយដែលឆ្លុះបញ្ជាំងពីការរំលោភបំពានផ្លូវភេទលើស្ត្រី និងការជួញដូរផ្លូវភេទដែលធ្លាប់មាន និងកំពុងកើតមាននៅកម្ពុជានេះ នឹងទទួលបានគាំទ្រច្រើន ប្រហាក់ប្រហែលទៅនឹងរឿង«ឃ្លាតទៅសែនឆ្ងាយ»ឬ «Lost Loves» ដែរ។
ប្រធានសមាគមភាពយន្តកម្ពុជារូបនេះ បានបញ្ជាក់ប្រាប់សារព័ត៌មានថ្មីៗនៅថ្ងៃនេះថា សន្និសីទសារព័ត៌មានស្តីពីការដាក់បញ្ជាំងរឿង»៣.៥០» នឹងរៀបចំធ្វើនៅថ្ងៃទី៧ខែកញ្ញា នៅរោងភាពយន្តMajor Cineplix ផ្សារទំនើបEAON។
បើតាមលោក ឆាយ បូរ៉ា បើទោះបីក្រសួងអនុញាតឲ្យចាក់ផ្សាយមែន ប៉ុន្តែក្រសួងតម្រូវឲ្យកាត់នាទីចោលខ្លះ នៅឈុតមួយនៅក្នុងសាច់រឿង គឺឈុត«ដេរសន្ទះព្រហ្មចារី» មកនៅត្រឹម១នាទី ដែលដើមឡើយឆុតនេះ មានរយៈពេល៣នាទីនោះ។
ក្រៅពីការចាក់បញ្ជាំងនៅតាមបណ្តារោងភាពយន្ត ម្ចាស់ផលិតកម្មដើមត្នោតរូបនេះ ចង់ឲ្យរឿង«៣.៥០» បានដាក់បញ្ជាំងនៅតាមស្ថានីយទូរទស្សន៍ផងដែរ ព្រោះអាចឲ្យប្រជាជនខ្មែរទូទាំងប្រទេសបានទស្សនា និងយល់ពីទិដ្ឋភាពដែលកើតមាននៅក្នុងសង្គមខ្មែរ។
កន្លងមកភាពយន្តដែលនិយាយពីតម្លៃរបស់ក្មេងស្រីម្នាក់ស្មើនឹងប្រាក់ ៣.៥០ដុល្លារ ដើម្បីទទួលបានសេវាកម្មផ្លូវភេទដ៏ចម្រូងចម្រាសមួយនេះ ធ្លាប់បានចាក់បញ្ជាំងនៅក្នុងប្រទេសផ្សេងទៀតនៅអាស៊ី និងអឺរ៉ុប និងអាមេរិកផងដែរ ដូចជាប្រទេសសិង្ហបុរី អេស្ប៉ាញ និងនៅសាកលវិទ្យាល័យ Harvard សហរដ្ឋអាមេរិក ហើយទទួលបានការគាំទ្រយ៉ាងច្រើនផងដែរ៕
© រក្សាសិទ្ធិដោយ thmeythmey.com