ជាតិ
លោក ហ៊ុន សែន បញ្ជាឲ្យចាប់ខ្លួនសមាជិកព្រឹទ្ធសភាម្នាក់របស់គណបក្ស សម រង្ស៊ី លោក ហុង សុខហួរ សមាជិកព្រឹទ្ធសភា គណបក្ស សម រង្ស៊ី
× លោកនាយករដ្ឋមន្ត្រី ហ៊ុន សែន នាពិធីចែកសញ្ញាបត្រនៅវិទ្យាស្ថានជាតិអប់រំ នៅព្រឹកថ្ងៃព្រហស្បតិ៍នេះ បានបញ្ជាឲ្យចាប់ខ្លួនសមាជិកព្រឹទ្ធសភាម្នាក់របស់គណបក្ស សម រង្ស៊ី ដែលបានបកស្រាយពីបញ្ហាព្រំដែន ជាពិសេសទាក់ទងនឹងកិច្ចព្រមព្រៀងរវាងកម្ពុជា និងវៀតណាម។ ប្រមុខរដ្ឋាភិបាលកម្ពុជា បានវាយតម្លៃថា សមាជិកព្រឹទ្ធសភា គណបក្សប្រឆាំង បានបកស្រាយខុសពីការពិត ដោយបានចុះផ្សាយការបកស្រាយរបស់ខ្លួននៅបណ្តាញសង្គមហ្វេសប៊ុក។
លោក ហ៊ុន សែន បានលើកឡើងថា ការបកស្រាយបែបនេះ គឺជាបទល្មើសក្បត់ជាតិ។ លោកក៏បានហាមផងដែរចំពោះការធ្វើអន្តរាគមន៍នានាពីបណ្តាទូតបរទេស និងគណបក្សនយោបាយ ព្រោះនេះគ្រាន់តែជារឿងបុគ្គលម្នាក់ប៉ុណ្ណោះ។
ប្រធានគណបក្សប្រជាជនកម្ពុជា មិនបានលើកឡើងពីឈ្មោះសមាជិកព្រឹទ្ធសភានោះឡើយ ប៉ុន្តែគេអាចប៉ាន់ស្មានថា ជាលោក ហុង សុខហួរ ដែលកាលពីថ្ងៃពុធម្សិលមិញ សមាជិកព្រឹទ្ធសភារូបនេះ បាននិយាយចោទប្រកាន់លោក ហេង សំរិន ប្រមុខរដ្ឋសម័យសាធារណរដ្ឋប្រជាមានិតកម្ពុជា និងភាគីវៀតណាម អំពីការរំលាយព្រំដែនប្រទេសទាំងពីរនាឆ្នាំ១៩៧៩ តាមរយៈសន្ធិសញ្ញា៕
© រក្សាសិទ្ធិដោយ thmeythmey.com