ជាតិ
នយោបាយជាតិ
×![]()
ភ្នំពេញ៖ នៅម៉ោង៩ ព្រឹកថ្ងៃទី១៤ ខែសីហា នេះ ក្រុមការងារស្រាវជ្រាវព្រំដែនកម្ពុជា នៃ រាជបណ្ឌិត្យសភាកម្ពុជា បានចាប់ផ្តើមបើកពិនិត្យផ្ទៀងផ្ទាត់ផែនទីនានា ដែលពួកគេទទួលពីភាគីពាក់ព័ន្ធ កន្លងទៅ នៅរាជបណ្ឌិត្យសភាកម្ពុជា។ក្រុមលោក សុខ ទូច បានសម្រេចច្រានចោលផែនទី២ផ្ទាំងក្នុងចំណោម២៦ផ្ទាំងរបស់គណបក្សសង្គ្រោះជាតិ ដោយមូលហេតុថាផែនទីនោះខុសពីផែនទីរដ្ឋាភិបាលមិនអាចផ្ទៀងផ្ទាត់បាន។មន្ត្រីជាន់ខ្ពស់គណបក្សសង្គ្រោះជាតិ លោក អ៊ូ ច័ន្ទឬទ្ធិ បានបញ្ជាក់ថា គណបក្សសង្គ្រោះជាតិនឹងស្រាវជ្រាវរកផែនទីចំនួន២ផ្ទាំងទៀត មកផ្ទៀងផ្ទាត់ជាមួយផែនទីរដ្ឋាភិបាល។
ប្រធានក្រុមការងារស្រាវជ្រាវព្រំដែន លោក សុខ ទូច ថ្លែងថា ក្រុមការងាររបស់លោក ទទួលផែនទីទាំងនេះ ពីភាគីពាក់ព័ន្ធ ក្នុងនោះ រួមមាន ផែនទីរបស់រដ្ឋាភិបាលចំនួន ២៦ផ្ទាំង គណបក្សសង្គ្រោះជាតិចំនួន ២៦ផ្ទាំង ផែនទីរបស់អង្គការសហប្រជាជាតិ (UN) និងផែនទីក្នុងបណ្ណាល័យនៅប្រទេសបារាំង ជាដើម។ ការចាប់ផ្តើមពិនិត្យដំបូង ក្រុមលោក សុខ ទូច បានសម្រេចច្រានចោលផែនទី២ផ្ទាំងក្នុងចំណោម២៦ផ្ទាំងរបស់គណបក្សសង្គ្រោះជាតិ។ ក្រុមការងាររាជបណ្ឌិត្យសភា កត់សម្គាល់ឃើញថា ផែនទីមួយផ្ទាំងរបស់គណបក្សសង្គ្រោះជាតិ គឺទាក់ទងនឹងទឹកដីវៀតណាមសុទ្ធសាធដែលមិនអាចយកមកធ្វើការស្រាវជ្រាវបានឡើយ រីឯផែនទីមួយទៀត គឺជាផែនទីរួម។
លោក អ៊ូ ច័ន្ទឬទ្ធិ ដែលបានចូលរួមផ្ទៀងផ្ទាត់ផែនទីរបស់គណបក្សខ្លួន និងផែនទីរដ្ឋាភិបាលនោះ បានបញ្ជាក់ថា លោកនឹងលើកបញ្ហានៃខ្វះផែនទីពីផ្ទាំងនេះ ទៅពិភាក្សាជាមួយថ្នាក់ដឹកនាំគណបក្សសង្គ្រោះជាតិ ដើម្បីស្វែងរកផែនទី២ផ្ទាំងបន្ថែមទៀត យកមកផ្ទៀងផ្ទាត់ជាមួយផែនទីរដ្ឋាភិបាល។ ខណៈដែលផែនទី២៤ផ្ទាំង ក្នុងចំណោម២៦ផ្ទាំងរបស់គណបក្សសង្គ្រោះជាតិដូចគ្នានឹងផែនទីរដ្ឋាភិបាលក៏ដោយ តែលោក អ៊ូ ច័ន្ទឬទ្ធិ មិនទាន់អាចបញ្ជាក់ពីការសម្រេចយកផែនទីរួមជាមួយរដ្ឋាភិបាលនៅឡើយទេ ដោយរងចាំការពិភាក្សាជាមួយថ្នាក់ដឹកនាំគណបក្សសង្គ្រោះជាតិជាមុនសិន។
ផែនទីដែលត្រូវបានយកផ្ទៀតផ្ទាត់នៅព្រឹកនេះរួមមាន ផែនទីមានប្រភពមកពីវិទ្យាសា្ថនភូមិសាស្ត្រជាតិបារាំង (IGN) ផែនទីអង្គការសហប្រជាជាតិ ផែនទីរបស់រដ្ឋាភិបាល និងផែនទីរបស់គណបក្សសង្គ្រោះជាតិ។
ភាគីពាក់ព័ន្ធនានា បានចូលរួមក្នុងពិធីពិនិត្យផែនទី នាព្រឹកនេះ រួមមាន តំណាងព្រឹទ្ធសភា តំណាងរដ្ឋសភា តំណាងគណបក្សទាំងពីរ ក្រុមប្រឹក្សាធម្មនុញ្ញ រួមទាំងអ្នកពាក់ព័ន្ធមួយចំនួនទៀត៕
Tag:
សុខ ទូច
ផែនទី
ព្រំដែន
© រក្សាសិទ្ធិដោយ thmeythmey.com
