ជាតិ
សង្គមជាតិ
យុវជននាំគ្នាដាំដើមឈើនៅក្រុងកែបដើម្បីទប់ទល់នឹងគ្រោះធម្មជាតិ
× កែប៖សភាយុវពាណិជ្ជករអន្តរជាតិសាខាចតុមុខបានធ្វើការរៀបចំយុទ្ធនាការដាំដើមឈើមួយ ដែលមានឈ្មោះថា «យើងនាំគ្នាដាំដើម ឈើ ក្រុងកែប ២០១៥!» ក្នុងខេត្តកែប ដោយមានការចូលរួមពីសមាជិកចាស់ និងថ្មី សហការី ប្រជាពលរដ្ឋ អ្នកទេសចរ និងភាគីពាក់ព័ន្ធសំខាន់ៗផ្សេងទៀត ជាង ១ពាន់នាក់កាលពីដើមខែសីហា ឆ្នាំ២០១៥ ។
នាឆ្នាំ២០១១ JCI កម្ពុជា (www.jcicambodia.com)អង្គការថ្នាក់ជាតិរបស់យើងខ្ញុំ បានធ្វើយុទ្ធនាការដូចគ្នានេះដែរនៅក្នុងខេត្តសៀមរាប ប្រកបដោយលទ្ធផលវិជ្ជមានបំផុត ព្រមទាំងការចូលរួមយ៉ាងសកម្មពីភាគីពាក់ព័ន្ធជាច្រើន ហើយនៅឆ្នាំ២០១៤ JCI ចតុមុខបានរំលឹកស្មារតីស្រឡាញ់បរិស្ថាននេះ តាមរយៈគម្រោង «តោះយើងនាំគ្នាដាំដើមឈើ ក្រុងព្រះសីហនុ ដោយមានអ្នកចូលរួម ដល់ទៅ២ពាន់នាក់ និងមានការគាំទ្រពីគ្រប់ស្ថាប័ន និងពលរដ្ឋ។
ក្នុងឆ្នាំដដែលនេះដែរ ដើម្បីរួមចំណែកដល់ការពារឆ្នេរកែប សភាយុវពាណិជ្ជករអន្តរជាតិ សាខាចតុមុខ កំពុងដាក់ចេញនូវយុទ្ធនាការដាំដើមកោងកាងចំនួន២ពាន់ដើម និងដើមឈើសម្រាប់រុក្ខវិថី និងទីសាធារណៈប្រមាណ៤រយ ដើមនៅក្នុងខេត្តកែប ដែលមានលក្ខណៈទ្រង់ទ្រាយធំ ដោយរួមបញ្ចូលសកម្មភាពអប់រំ និងកម្សាន្ត ដែលត្រូវបានរៀបចំនៅលើឆ្នេរសមុទ្ររួមទាំងនៅសាលារៀនផ្សេងៗជាមួយពលរដ្ឋនៅទីនោះទាំងក្មេង ទាំងចាស់។
កម្មវិធីនេះក៏មានការចូលរួមជាពិសេសអំពីអភិបាលនៃគណៈអភិបាលខេត្តកែប លោក កែន សត្ថា និង រដ្ឋលេខាធិការ ក្រសួង បរិស្ថាន លោក ស៊ូ សាវុធ។ ដោយឡែក គម្រោងនេះអាចប្រព្រឹត្តទៅបានយ៉ាងរលូន ដោយសហការជាមួយ សហភាព សហព័ន្ធយុវជនកម្ពុជា (ស.ស.យ.ក.) និង AISEC Cambodia។ ក្នុងនោះ ក្រសួងបរិស្ថានបានឧបត្ថម្ភដើមកោងកាងចំនួន២ពាន់ដើមនិងដើមរុក្ខវិថីប្រមាណ៤រយដើម។ ស.ស.យ.ក. ជាក្រុមរៀបចំការបោះជុំរុំ សម្រាប់អ្នកចូលរួមពីភ្នំពេញ អប់រំពីការដាំដើមកោងកាង និងសម្របសម្រួលដល់ការដាំដើមឈើផ្ទាល់ផង។ រីឯ AISEC Cambodia មានភារកិច្ចខាងផ្នែក កម្សាន្តសម្រាប់កម្មវិធីរាត្រីថ្ងៃទី០៨ ខែសីហា។
ក្រោមកិច្ចពិភាក្សារបស់ក្រុមបឹក្សាភិបាល និង សមាជិករបស់ សភាយុវពាណិជ្ជករអន្តរជាតិ សាខាចតុមុខបានស្វែងយល់ថា ដើមកោងកាង ជារុក្ខជាតិដែលបន្ស៊ាំនឹងការរស់នៅក្នុងទឹកប្រៃ ហើយលូតលាស់ក្នុងតំបន់ចន្លោះជំនោរ ហើយដើរតួនាទីសំខាន់ ជារបាំងការពារតំបន់ឆ្នេរ។ ដើមកោងកាងមានដុះសឹងគ្រប់កន្លែងតាមឆ្នេរសមុទ្រកម្ពុជា និងទ្រទ្រង់ដល់សេដ្ឋកិច្ចជាតិ និងតំបន់ ក៏ដូចជាបរិស្ថានឆ្នេរតាមរយៈ៖ ការផ្តល់ជាសម្ភារសំណង់និងថាមពល ការផ្តល់ជម្រកដល់ត្រីពង និងកន្លែងភ្ញាស់កូន ការផ្តល់ជាជម្រកដល់ បក្សីទឹក និងថនិកសត្វនានា ការការពារតំបន់ឆ្នេរពីការសឹករិចរិល ការកាត់បន្ថយគ្រោះធម្មជាតិដូចជាព្យុះ និងរលក ព្រមទាំងរក្សាលំនឹងបរិស្ថានធម្មជាតិនៅតំបន់ឆ្នេរទៀតផង។
សភាយុវពាណិជ្ជករអន្តរជាតិ កម្ពុជា ត្រូវបានរដ្ឋាភិបាលនៃព្រះរាជាណាចក្រកម្ពុជាទទួលស្គាល់នៅឆ្នាំ ២០១០ ដោយមានសាខាក្នុងស្រុកចំនួនបីនៅក្នុងទីក្រុងភ្នំពេញ (ភ្នំពេញ ចតុមុខ និង មេគង្គ) និងមានសមាជិកជាង200 ហើយសាខាចតុមុខត្រូវបង្កើតឡើងនៅឆ្នាំ២០១១ ។
JCI ត្រូវបានបង្កើតឡើងរយៈពេល១០០ឆ្នាំ នៅក្នុងប្រទេសចំនួន១២៤ ទូទាំងពិភពលោក ហើយមានសមាជិកប្រមាណ ២០០.០០០នាក់៕
អត្ថបទផ្តល់អោយដោយក្រុមនិស្សិត
Tag:
ធម្មជាតិ
ព្រៃឈើ
សង្គម
© រក្សាសិទ្ធិដោយ thmeythmey.com