ពីនេះ ពីនោះ
បង្ក្រាបអារម្មណ៍ខឹងក្រោធ ត្រូវប្រើចិត្ត ឬគំនិត?
× មនុស្សរស់នៅចាំបាច់ត្រូវមានទំនាក់ទំនង រាប់អាន បង្កើតមិត្តភាពជាមួយគ្នាទៅវិញទៅមក។ ការទំនាក់ទំនងនេះគ្មានអ្វីឋិតថេរនោះទេ វារមែងតែមានការប្រទាំងប្រទើសពាក្យសម្តីគ្នា ដោយចេតនា ឬអចេតនា។ នៅពេលដែលមនុស្សប្រទាក់សម្តីគ្នាខ្លាំងៗ ប្រើទឹកមុខ កាយវិការនិងប្រតិកម្មអវិជ្ជមាននានាដាក់គ្នារបែបនេះ ធ្វើឲ្យក្បាលរបស់បុគ្គលទាំងនោះបិទបាំងមិនឲ្យគិតអ្វីចេញទាំងអស់ គឺមានតែកំហឹងខឹងក្រោធ ឬអាចកើតជាហិង្សាដាក់គ្នាតែប៉ុណ្ណោះ។ ហេតុអ្វីបានជាមនុស្សពិបាកគ្រប់គ្រងកំហឹងខឹងក្រោធខ្លាំងម្ល៉េះ? តើត្រូវដោះស្រាយអារម្មណ៍ខឹងក្រោធនេះ ដោយរបៀបណា?
មូលហេតុធ្វើឲ្យមនុស្សមានការឈឺចាប់ ខឹងក្រោធ រំជើបរំជួលនឹងពាក្យសម្តីរបស់គេ រហូតឈានទៅដល់ការស្អប់ និងការប្រើហិង្សាដាក់គ្នាយ៉ាងដូច្នេះ គឺមកពីបុគ្គលនោះចូលចិត្តយកភាសាបេះដូងមកប្រើច្រើនជាងយកសមត្ថភាពនៃគំនិតមកពិចារណា ពោលគឺពួកគេចូលចិត្តផ្តេកផ្តួលទៅលើអារម្មណ៍ខ្លាំងពេក និងយកចិត្តមកគ្រប់ដណ្តប់លើខួរក្បាល និងលើគំនិតមិនឲ្យគិតអ្វីៗទាំងអស់ ហើយចាប់ផ្តើមយកអារម្មណ៍មកដោះស្រាយកំហឹងជំនួសខួរក្បាលវិញ។
ការឈឺចាប់ខឹងសម្បានឹងអ្នកដទៃ គឺមិនមែនមកពីការទទួលរងនូវប្រតិកម្ម ឬពាក្យសម្តីអសីលធម៌ណាមួយរបស់អ្នកដទៃជិះមកលើអ្នកនោះទេ។ ប៉ុន្តែការខឹងសម្បានេះអាចកើតឡើង លុះត្រាតែបុគ្គលនោះខ្សោយផ្នែកការគិតពិចារណា ដែលធ្វើឲ្យអំណាចនៃការគិតបែបអវិជ្ជមានមកគ្របសង្កត់លើអារម្មណ៍របស់ខ្លួនវិញ។
ដូច្នេះ ដំណោះស្រាយនៃកំហឹងខឹងក្រោធ គឺគំនិតបែបវិជ្ជមាន។ គំនិតនេះ ដើរតួនាទីយ៉ាងសំខាន់ក្នុងការទប់អារម្មណ៍ខឹងក្រោធ និងដោះស្រាយបញ្ហានៅពេលដែលអ្នកទទួលរងនូវការប៉ះទង្គិច ជិះឥទ្ធិពលទៅដល់ចិត្ត និងខ្លួនប្រាណ។ ដូចពាក្យមួយឃ្លាបានលើកឡើងថា «ធ្វើអ្វីត្រូវធ្វើតាមការគិត កុំធ្វើតាមចិត្ត» ព្រោះចិត្តមិនមានលទ្ធភាពបែងចែកល្អឬអាក្រក់ ខុសឬត្រូវបានទេ គឺមានតែគំនិត និងការគិតពិចារណាប៉ុណ្ណោះ ដែលអាចបែងចែកបានថាអ្វីល្អ អ្វីអាក្រក់ អ្វីខុស និងអ្វីត្រូវ។
ទោះបីជាយ៉ាងណាក៏ដោយ ទាំងចិត្តនិងគំនិតមិនអាចបាត់បង់មួយណាបានទេ វាត្រូវតែមានអន្តរទំនាក់ទំនងជាមួយគ្នាជានិច្ច ព្រោះចិត្តធ្វើឲ្យមនុស្សកើតមាននូវសេចក្តីស្រឡាញ់ មនោសញ្ចេតនា និងការខឹងស្អប់។ ប៉ុន្តែគំនិតជួយគ្រប់គ្រង់អារម្មណ៍ និងការប្រព្រឹត្តិរបស់ចិត្ត៕
© រក្សាសិទ្ធិដោយ thmeythmey.com