បទយកការណ៍ / បទសម្ភាសន៍
នយោបាយជាតិ
លោក សួស យ៉ារ៉ា៖ «យុវជនCPP ត្រូវមានគុណធម៌ ដើម្បីទទួលអម្រែកពីចាស់ទុំ»
×![]()
ក្នុងនាមជាអ្នកនាំពាក្យនៃគណបក្សប្រជាជនកម្ពុជាដែលកំពុងដឹកនាំរដ្ឋាភិបាល លោក សួស យ៉ារ៉ា បានផ្តល់បទសម្ភាសន៍ដល់សារព័ត៌មានថ្មីៗ ដើម្បីនិយាយអំពីទស្សនៈទានរបស់គណបក្សកាន់អំណាចមួយនេះ។ អ្នកនាំពាក្យវ័យក្មេងបានពន្យល់អំពីភាពខ្លាំងរបស់គណបក្សលោក ដែលផ្តល់តម្លៃទៅលើការបង្កើតតំណភាពរវាងជំនាន់មនុស្សចាស់និងមនុស្សជំនាន់ថ្មី។ ជាងនេះទៅទៀត បើតាមការបញ្ជាក់របស់លោក សួស យ៉ារ៉ា ដដែល មនុស្សជំនាន់ថ្មីត្រូវមានគុណធម៌ខ្ពស់ ក្នុងការទទួលមរតកពីចាស់ទុំ ហើយរក្សា និងអភិវឌ្ឍមរតកទាំងនោះទៅអនាគតទៀតផង។
សូមលោកអ្នកអានបទសម្ភាសន៍រវាងលោក លាង ដឺលុច និពន្ធនាយកនៃសារព័ត៌មានអេឡិចត្រូនិកថ្មីៗ និងលោក សួស យ៉ារ៉ា តំណាងរាស្ត្រ និងជាអ្នកនាំពាក្យរបស់គណបក្សប្រជាជនកម្ពុជា ដូចតទៅ៖
លោក លាង ដឺលុច៖ លើសពីតួនាទីជាអ្នកតំណាងរាស្ត្រដែលជាតួនាទីមមាញឹកហើយនោះ លោកត្រូវបានគណបក្សប្រជាជនកម្ពុជាជ្រើសរើសឲ្យធ្វើជាអ្នកនាំពាក្យដែលមិនមែនជាតួនាទីតូចតាចទៀត។ សម្រាប់លោក តើតួនាទីអ្នកនាំពាក្យរបស់គណបក្សកាន់អំណាច វាបានធ្វើឲ្យមានមោទនភាព ឬក៏វាធ្វើឲ្យលោកបារម្ភទៅវិញ?
លោក សួស យ៉ារ៉ា៖ មនុស្សយើងរីករាយណាស់ នៅពេលថ្នាក់ដឹកនាំទុកចិត្ត ហើយប្រគល់ការងារឲ្យ។ បើការងារនោះមានការប្រឈមច្រើន យើងក៏បារម្ភដែរ ថាតើយើងអាចធ្វើការងារនោះបានដែរឬទេ? តើយើងអាចបំពេញការងារនោះ តបតាមការទុកចិត្ត និងការស្រឡាញ់របស់ថ្នាក់ដឹកនាំទាំងអស់បានដែរឬទេ? ខ្ញុំក៏ធ្លាប់សួរខ្លួនឯងដែរ។ ដូច្នេះ ជាអ្នកនាំពាក្យរបស់គណបក្សប្រជាជនកម្ពុជា ខ្ញុំយល់ថា វាជាការងារមួយដែលខ្ញុំត្រូវបំពេញដោយប្រយ័ត្នប្រយែងបំផុត។ សម្រាប់គណបក្សប្រជាជនកម្ពុជា នៅពេលយើងបញ្ជូនសារមួយទៅសាធារណៈជនហើយ សារនោះត្រូវតែអនុវត្ត ត្រូវតែជាការពិត និងផ្លូវការ។ មិនមែន ជាសារប្រជាភិថុតទេ។ ព្រោះសារប្រជាភិថុត នឹងអាចមានផលវិបាកត្រឡប់មកវិញ។ អ្វីដែលខ្ញុំប្រឹងរៀនសូត្របន្ថែម ក្នុងអាជីព គឺការកសាងជំនឿក្នុងចំណោមប្រជាជន មកលើគណបក្សប្រជាជនកម្ពុជា។
លោក លាង ដឺលុច៖ គណបក្សប្រជាជនកម្ពុជា ជាគណបក្សវ័យចំណាស់ជាងគេមួយនៅកម្ពុជា។ ថ្វីដ្បិតតែគណបក្សនេះកំពុងបន្តកាន់អំណាចក្នុងនីតិកាលទី៥នេះមែន ប៉ុន្តែក្រោយការបោះឆ្នោតចុងក្រោយដែលបង្ហាញពីការធ្លាក់ចុះប្រជាប្រិយភាពរបស់គណបក្សនេះ ការិយាល័យនយោបាយរបស់គណបក្សនេះបានបង្ហាញពីការលើកស្ទួយ និងជំរុញមនុស្សជំនាន់ក្រោយយ៉ាងខ្លាំង។ តើលោកអាចពន្យល់ប្រាប់បានទេថា គណបក្សប្រជាជនកម្ពុជាត្រូវការមនុស្សជំនាន់ក្រោយច្រើនប៉ុណ្ណាដើម្បីជួយស្តារប្រជាប្រិយភាពគណបក្សរបស់លោកនាយករដ្ឋមន្ត្រី ហ៊ុន សែន ឡើងវិញ?
លោក សួស យ៉ារ៉ា៖ ការកសាងគណបក្សមួយ យើងត្រូវការពេលវេលា និងដំណភាព។ ខ្ញុំចង់ជម្រាបថា ភាពខ្លាំងរបស់គណបក្សមួយ គឺមិនមែនការផ្លាស់ប្តូរទេ។ ភាពខ្លាំងរបស់បក្សមួយ គឺសំដៅលើតំណភាព។ បើសិនជាបក្សមួយអាចកសាងមរតកបានល្អ ហើយផ្ទេរមរតកនោះឲ្យអ្នកជំនាន់ក្រោយបាន ទើបជាជ័យជម្នះរបស់បក្ស។ មិនមែន ទាល់តែផ្លាស់ប្តូរទើបល្អនោះទេ។ ហេតុដូច្នេះហើយ បានជាគណបក្សប្រជាជនកម្ពុជាប្រើពាក្យថា កំណែទម្រង់។ គឺកំណែទម្រង់ ប្រកបដោយតំណភាព។ មានន័យថា រក្សាចាស់ បង្កើនថ្មី។ អ៊ីចឹងបានជាមិត្តភក្តិ ឬខ្ញុំ ពួកយើងធ្វើយ៉ាងម៉េចក៏ដោយ គឺយើងត្រូវរៀនសូត្រពីចាស់ៗ បូកជាមួយចំណេះដឹងរបស់យើងដែលមានស្រាប់។ យើងធ្វើឲ្យមានតំណភាព។ ការបង្កើតតំណភាពនេះហើយ ដែលធ្វើអោយគណបក្សទាំងមូល បានកាន់អំណាចរយៈពេលជិត៤០ឆ្នាំមកនេះ។ នឹងមានតំណភាពទៀត។ គណបក្សមានវ័យ៦៤ឆ្នាំហើយ ស្មើនឹង៣ ទៅ៤ជំនាន់ហើយ។ តើជំនាន់យើងត្រូវបន្តរបៀបម៉េច? ដូច្នេះមនុស្សជំនាន់ថ្មីរបស់គណបក្សប្រជាជនកម្ពុជា ត្រូវយល់ឲ្យច្បាស់ពីប្រវត្តិសាស្ត្ររបស់ខ្លួន ភារកិច្ច ម៉ឺងម៉ាត់ក្នុងផែនការសកម្មភាពរបស់ខ្លួន ដើម្បីនាំជំនឿរបស់ប្រជាជន មកលើគណបក្ស ដើម្បីគណបក្សមានឱកាសពង្រឹងទស្សនវិជ្ជានយោបាយ នាំប្រទេសទៅសុភមង្គល។ ក្នុងតំណភាពនេះ យុវជនត្រូវមានភាពក្លាហាន ប្រើប្រាស់ចំណេះវិជ្ជារបស់ខ្លួន ស្របនឹងនិន្នាការប្រទេស និងរបត់នយោបាយអន្តរជាតិ។
លោក លាង ដឺលុច៖ បើនិយាយអំពីតំណភាព តើលោកយល់ថាមនុស្សជំនាន់ក្រោយរបស់គណបក្សប្រជាជនកម្ពុជារបស់លោក ត្រូវមានសមត្ថភាពអ្វីខ្លះ ដើម្បីអាចទទួលមរតកពីចាស់ទុំបាន?
លោក សួស យ៉ារ៉ា៖ ការកសាងសង្គមមាន២កត្តា។ គឺនយោបាយ និងសេដ្ឋកិច្ច ត្រូវដើរទន្ទឹមគ្នា។ តែខ្ញុំថា នៅមានកត្តាមួយទៀត ដែលត្រូវហ្វឹកហ្វឺនតំណើរស្របគ្នាដែរ នោះគឺ ហ្វឹកហ្វឺនទស្សនៈមនុស្សនិយម។ ទស្សនៈមនុស្សនិយមនេះ គឺសំខាន់បំផុត។ ធ្វើអ្វីក៏ដោយ ទាំងសេដ្ឋកិច្ច និងនយោបាយ គឺត្រូវបម្រើមនុស្សជាតិ ត្រូវបម្រើគុណធម៌របស់មនុស្ស។ បើមនុស្សគ្មានគុណធម៌ហើយ ទោះពូកែទាំងសេដ្ឋកិច្ច និងនយោបាយ ក៏មិនអាចទទួលអម្រែកពីថ្នាក់ដឹកនាំដែលបានកសាងប្រទេសថ្មីមកនោះទេ។ ត្រូវធ្វើអ្វីដើម្បីគុណធម៌ ដើម្បីសីលធម៌ប្រទេស ធ្វើអ្វីដើម្បីមរតក ទើបប្រទេសអាចរឹងមាំបាន។
លោក លាង ដឺលុច៖ យើងគួរទទួលស្គាល់ថា អ្នកបោះឆ្នោតក្នុងពេលបច្ចុប្បន្ន និងនៅថ្ងៃខាងមុខ សុទ្ធតែមានការអប់រំខ្ពស់ និងមានការយល់ដឹងច្រើន។ ការចែកអំណោយប្រហែលវាលែងក្លាយជាវិធីតែមួយនៃការទាក់ទាញសម្មានចិត្តពលរដ្ឋអ្នកបោះឆ្នោតហើយ។ សំណួរចុងក្រោយរបស់ខ្ញុំគឺថា តើមនុស្សជំនាន់ថ្មីរបស់គណបក្សប្រជាជនកម្ពុជាមានយុទ្ធវិធីយ៉ាងណា ឬត្រូវធ្វើដូចម្តេចដើម្បីទទួលបានការគាំទ្រពីពលរដ្ឋ?
លោក សួស យ៉ារ៉ា៖ ក្នុងនាមអ្នកនយោបាយវ័យក្មេង ខ្ញុំយល់ថា ដើម្បីទាក់ទាញសម្មានចិត្តប្រជាជនក្នុងសម័យនេះ យើងត្រូវមាន៣យ៉ាង៖ ទី១ គឺការឆ្លើយតប។ ក្នុងនាមមន្ត្រី តើត្រូវឆ្លើយតបបែបណាចំពោះតម្រូវការរបស់ពលរដ្ឋ។ ប្រជាជនមិនត្រូវការអំណោយទៀតទេ។ តើឆ្លើយតបរបៀបម៉េច? ទី២ គឺការទទួខុសត្រូវ។ បើមានប្រធានស័ក តើការទទួលខុសត្រូវកម្រិតណាដើម្បីការរស់នៅរបស់ពលរដ្ឋ។ ទី៣ គឺបញ្ហាជាតិនិយម ដែលជាបញ្ហាក្តៅ។ តើអ្នកបានធ្វើអ្វីខ្លះ ដើម្បីលើកតម្លៃជាតិរបស់យើង ក្នុងអតីត និងបច្ចុប្បន្ន អោយឃើញខុសគ្នា។ ៣ចំនុចនេះ ដែលខ្ញុំគិតថា មនុស្សជំនាន់ថ្មីរបស់បក្សប្រជាជនអាចចូលរួមដើម្បីទាក់ទាញសម្មានចិត្តអ្នកបោះឆ្នោត៕
Tag:
សួស យ៉ារ៉ា
© រក្សាសិទ្ធិដោយ thmeythmey.com
