អន្តរជាតិ
ម៉ាឡេស៊ីចេញមុខធ្វើអ្នកសម្របសម្រួលការចរចាវាងរដ្ឋាភិបាលថៃនិងក្រុមឧទ្ទាមភាគខាងត្បូង
×![]()
អ្នកតំណាងរបស់រដ្ឋាភិបាលថៃ និង តំណាងក្រុមឧទ្ទាមភាគខាងត្បូង នឹងផ្តើមការចរចាជំហានដំបូង ដើម្បីកាត់បន្ថយការប្រឈមមុខគ្នា ក្រោមការសម្របសម្រួលដោយភាគីម៉ាឡេស៊ីនៅក្នុងក្រុងកូឡាឡាំពួរ។
តាមការគ្រោងទុកនៅថ្ងៃស្អែកនេះ អ្នកតំណាងរដ្ឋាភិបាលថៃ និង ក្រុមឧទ្ទាមភាគខាងត្បូង នឹងផ្តើម កិច្ចចរចា ដោយមានកិច្ចអន្តរាគមន៍ពីរដ្ឋាភិបាលម៉ាឡេស៊ី ជុំវិញបញ្ហាដែលបានកើតឡើងនៅក្នុងតំបន់ ភាគខាងត្បូងថៃកន្លងមក។ ជំនួបនេះ គឺជាលើកដំបូងហើយក្រោយពីលោកនាយករដ្ឋមន្ត្រី ណាជីប រ៉ាហ្សាក់ បានព្រមព្រៀងធ្វើជាអ្នកសម្របសម្រួលជាមួយលោកនាយករដ្ឋមន្ត្រី ប្រាយុទ្ធ ចាន់អូចា កាលពីឆ្នាំមុន។
យោងតាមលោក Ahmad Zamzamin Hashim ជាអ្នកសម្របសម្រួលម៉ាឡេស៊ី ជំនួបរវាងភាគីរដ្ឋា ភិបាលថៃ និង ក្រុមឧទ្ទាម មិនទាន់បានកំណត់ពីរបៀបវីរៈនៅឡើយនោះទេ ក៏ប៉ុន្តែជំនួបនេះ គឺជាការ ផ្សារភ្ជាប់ទំនាក់ទំនងភាគីទាំងពីរជាមុនសិន។ លោកសង្ឃឹមថា ជំនួបនេះ នឹងជួយត្រួសត្រាចផ្លូវ សម្រាប់ភាគីទាំងពីរ ដើម្បីឲ្យមានការយោគយល់គ្នាជារួមមួយលើបញ្ហា ដែលអាចជំរុញឲ្យការចរចាគ្នា នៅកម្រិតបន្តបន្ទាប់។
ក្នុងរយៈពេលចុងក្រោយនេះ អំពើឃាតកម្មនៃការបាញ់សម្លាប់ប្រជាជន និង ការប្រឈមមុខគ្នារវាង ក្រុមឧទ្ទាម និង ក្រុមប៉ូលីសនៅក្នុងតំបន់ភាគខាងត្បូងនៃប្រទេស បានមានការកើនឡើងជាបន្តបន្ទាប់។ សកម្មភាពនេះ ពិតជាបានគំរាមកំហែងដល់សន្តិសុខសម្រាប់ប្រជាជនស្លូតត្រង់ដែលរស់នៅ ទីនោះផងដែរ។
ជុំវិញបញ្ហានេះ លោកឧត្តមសេនីយ៍ Aksara Kerdpol ជាអ្នកតំណាងភាគីរដ្ឋាភិបាលថៃ បានអះអាងថា ការកំណត់តំបន់សុវត្ថិភាព គឺជាបញ្ហាអាទិភាពដែលនឹងលើកក្នុងរបៀបវារៈនេះ។
សូមរម្លឹកផងដែរ កាលពីចុងឆ្នាំ២០១៤ លោកនាយករដ្ឋមន្ត្រីថៃប្រាយុទ្ធ ចាន់អូចា បានធ្វើទស្សនកិច្ច ទៅកាន់ម៉ាឡេស៊ី ហើយក្នុងនោះ លោកបានព្រមព្រៀងជាមួយលោក ណាជីប ដើម្បីជួយធ្វើជាអ្នក សម្របសម្រួលក្នុងបញ្ហានេះ។
សូមរបញ្ជាក់ផងដែរថា ក្រុមឧទ្ទាមភាគខាងត្បូង ឬ Mara Patani គឺជាសម្ពន្ធ័នៃក្រុមឧទ្ទាមផ្តាច់ខ្លួន ប្រាំមួយក្រុម ដែលមានឥទ្ធិពលនៅតំបន់ភាគខាងត្បូងថៃ។ ហើយសកម្មភាពដែលពួកគេបានធ្វើកន្លង មកញឹកញាប់ គឺការបំផ្ទុះគ្រាប់បែកអត្តឃាត។ ចំពោះការចង់បានរបស់ពួកគេនិង តែងតែត្រូវបានរដ្ឋា ភិបាលថៃច្រានចោលជាបន្តបន្ទាប់នោះគឺ ការទាមទារស្វ័យភាពគ្រប់គ្រងនៅក្នុងតំបន់។
កន្លងមករដ្ឋាភិបាលថៃ បានចេញវិធានការជាច្រើនរួមមានទាំងការប្រើប្រាស់ហិង្សាដោយប្រដាប់អាវុធ និង បច្ចេកក្នុងការគ្រប់គ្រងDNA ដើម្បីងាយស្រួលក្នុងការកំណត់មុខសញ្ញាជនល្មើស ដែលបាន ប្រព្រឹត្តនៅតំបន់ភាគខាងត្បូង។ យ៉ាងណាមិញ យន្តការទាំងនេះ ត្រូវបានបរាជ័យជាបន្តបន្ទាប់ ក្នុងអាណត្តិរបស់រដ្ឋាភិបាលថៃ៕
Tag:
ម៉ាឡេស៊ី
© រក្សាសិទ្ធិដោយ thmeythmey.com
