អន្តរជាតិ
សេដ្ឋីអេហ្ស៊ីបចិត្តធម៌ប្រកាសជួយជនភៀសខ្លួនដោយទិញកោះបង្កើតប្រទេស
× មហាសេដ្ឋីអេហ្ស៊ីបលោក Naguib Sawiris បានប្រកាសផ្តល់លុយចន្លោះពី១០ ទៅ ១០០លានដុល្លារដើម្បីទិញកោះពីអ៊ីតាលីឬក្រិកឲ្យជនជាតិភៀសខ្លួនរស់នៅ។ លោកចង់ទិញកោះនោះដើម្បីធ្វើជារដ្ឋមួយឲ្យជនភៀសខ្លួនដែលខំផ្សងព្រេងប្តូរជីវិតមកពីមជ្ឈិមបូព៌ា អាហ្វ្រិកឬអាស៊ីកណ្តាលរស់នៅ។លោកក៏មានគំនិតជួយធ្វើយ៉ាងណាផ្តល់ការងារដល់ប្រជាជនទាំងនោះដើម្បីឲ្យពួកអាចសង់ប្រទេសថ្មីនេះបាន។ នេះបើយោងតាមទីភ្នាក់ងារព័ត៌មាន AFP។
អាចថារឿងគួរឲ្យភ្ងាក់ផ្អើលមួយដែរ នៅពេលដែលមហាសេដ្ឋីជនជាតិអេហ្ស៊ីបម្នាក់គឺលោក Naguib Sawiri បានចេញមុខប្រកាសទិញកោះនៅក្នុងសមុទ្រម៉េឌីទែរ៉ាណេពីប្រទេសអ៊ីតាលី ឬកោះរបស់ក្រិកក៏បានសម្រាប់ឲ្យជនភៀសខ្លួនស្នាក់នៅ។
ការប្រកាសចំណាយលុយសន្ធឹកសន្ធាប់ក្នុងន័យមនុស្សធម៌នេះកើតឡើងក្រោយពេលដែលរូបភាពក្មេងប្រុសវ័យ៣ឆ្នាំជនជាតិស៊ីរីនិងក្មេងឯទៀតដែលលង់ទឹកនៅឆ្នេរតួកគីត្រូវបានគេចែកចាយពាសពេញសារព័តមានពិភពលោកនិងប្រព័ន្ធទំនាក់ទំនងសង្គម។ រូបភាពនោះបានធ្វើឲ្យពិភពលោកទាំងមូលតក់ស្លុតនិងអាសូរដល់ជីវិតជនភៀសខ្លូននិងជនអន្តោរប្រវេសន៍តាមទូកមកអឺរ៉ុបជាខ្លាំង។
លោក គ្រោងចំណាយលុយចន្លោះពី១០ ទៅ១០០លានដុល្លារដើម្បីទិញកោះ និងអាចបង្កើតរដ្ឋមួយជាទីស្នាក់អាស្រ័យរបស់ជនភៀសខ្លួនផងគ្នា។ ហើយគំនិតមួយទៀតគឺលោកចង់ជួយធ្វើយ៉ាងណាឲ្យជនភៀសខ្លួនទាំងនោះមានការងារល្មមអាចកសាងប្រទេសថ្មីនេះបានប្រកបដោយចីរភាព។ កោះដែលលោកចង់បង្កើតជារដ្ឋឯករាជ្យនោះមានឈ្មោះថា «ក្តីសង្ឃឹម»។ លោកសង្កត់ធ្ងន់ថា ជនភៀសខ្លួនទាំងនោះគ្រាន់តែស្នាក់នៅបណ្តោះអាសន្នសិនក៏បានទម្រាំស្រុកទេសខ្លួនមានស្ថិរភាពឡើងវិញ។
លោកដំបូងឡើយបានប្រកាសបែបនេះតាមប្រព័ន្ធទំនាក់ទំនងសង្គម Twitter ហើយមនុស្សមួយចំនួនបានហៅគំនិតរបស់លោកថាជាគំនិតឆ្គួតលីលាទៀតផង។ តែឆ្លើយតបសំណួរអ្នកសារព័ត៌មាន លោកបានលើកឡើងថា អាចថាជាគំនិតឆ្គួតក៏ថាបាន ប៉ុន្តែប្រទេសក្រិកក្តី អ៊ីតាលីក្តីមានកោះជាច្រើនទុកចោលដោយគ្រប់ដណ្តប់ដោយខ្សាច់។
ហើយលោកក៏បានលើកអំណះអំណាងថា ចុះបើយកវាមកប្រើប្រាស់ដើម្បីសង់លំនៅឲ្យជនភៀសខ្លួនដែលត្រូវការជម្រកស្នាក់នៅបណ្ណោះអាសន្ន ឬអាចជាអចិន្ត្រៃយ៍បើសិនជាអាចនោះ មានទាស់ខុសដែរមែនទេ?។ លោកឆ្លៀតទិតៀនអឺរ៉ុបផងថា វាពិតដែលគំនិតលោកហាក់ដូចជាប្លែកនិងពិបាកអនុវត្ត ប៉ុន្តែវាគ្រាន់ជាងទុកឲ្យជនភៀសខ្លួនទាំងនោះបាត់បង់ជីវិតនិងត្រូវគេធ្វើបាបដូចសត្វពាហនៈ។
លោកបន្ថែម យ៉ាងហោចណាស់នៅលើកោះនោះមិនមានវត្តមានលោក អាសាដ ហើយនិងក្រុមភេរវជនសាហាវឃោឃៅដូចជាក្រុមរដ្ឋឥស្លាមដែរ។ ពួកគេអាចកសាងជីវភាព ហើយបើមិនពេញចិត្តស្នាក់នៅយូរអង្វែង ពួកគេអាចត្រលប់ទៅស្រុកវិញបានផងដែរ។
ជុំវិញការជួយជនភៀសខ្លួននេះដែរ មានការសាកសួរលោក Naguib Sawiris ថាបើចង់ជួយជនភៀសខ្លួន ម្តេចមិនបង្កើតនៅក្នុងទឹកដីអេហ្ស៊ីបវិញ។ លោកបានអធិប្បាយថា វាពិបាកទៅរួចណាស់។ រដ្ឋាភិបាលអេហ្ស៊ីបនឹងមិនអនុញ្ញាឲ្យទទួលជនភៀសខ្លួនជាដាច់ខាត។
លោកNaguib Sawiris ជាមហាសេដ្ឋីលំដាប់ទី២នៅអេហ្ស៊ីប ដែលលោកមានទ្រព្យប្រហែល៣ពាន់លានដុល្លារអាមេរិក។ លោកជាម្ចាស់ក្រុមហ៊ុនទូរគមនាគមន៍ដ៏ធំឈ្មោះថា Orascom TMT ហើយក្រុមហ៊ុននេះផ្តល់បណ្តាញទូរសព្ទពាសពេញទ្វីបអាហ្វ្រិកនិងនៅមជ្ឈិមបូព៌ាផង៕
Tag:
ជនភៀសខ្លួន
ជនអន្តោប្រវេសន៍
© រក្សាសិទ្ធិដោយ thmeythmey.com