អន្តរជាតិ
សហរដ្ឋអាមេរិក ៖ ត្រេកអរនឹងបានការងារធ្វើ បុរសម្នាក់ច្រឡំផ្ញើរូបថតប្រដាប់ភេទរបស់ខ្លួនទៅប្រធានផ្នែក HR
×
ហេតុតែត្រេកអរដែលទើបនឹងទទួលបានការងារធ្វើ យុវជនអាយុ ២៣ ឆ្នាំម្នាក់បានផ្ញើសារទៅមនុស្សច្រឡំ។ សារនោះគឺជារូបថតប្រដាប់ភេទរបស់ខ្លួនតែម្តង។ យុវជននេះមានបំណងផ្ញើសារទៅលេងសើចជាមួយមិត្តភក្តិ តែបែរជាច្រឡំផ្ញើទៅប្រធានផ្នែកធនធានមនុស្ស ដែលគេនឹងត្រូវជួបនៅថ្ងៃស្អែក ដែលជាថ្ងៃចូលធ្វើការជាលើកដំបូងរបស់ខ្លួនទៅវិញ។
ការច្រឡំលេខនេះធ្វើឲ្យរូបគេត្រូវបាត់បង់ការងារ។ ភ្លាមៗបន្ទាប់ពីបុរសវ័យក្មេងនេះទទួលបានកិច្ចសន្យាការងារនៅក្នុងក្រុមហ៊ុនមួយនៅរដ្ឋ Illinois សហរដ្ឋអាមេរិក គេក៏បានផ្ញើសារលេងសើចជាមួយមិត្តភក្តិ ដោយភ្ជាប់ជាមួយនូវរូបថតលិង្គរបស់ខ្លួនទៀតផង។ ដោយមិនបានទទួលសារឆ្លើយតប យុវជននេះបានផ្ញើសារជាលើកទីពីរទៅកាន់លេខដដែលទៀត នេះបើតាមការចុះផ្សាយរបស់សារព័ត៌មាន Chicago Tribune ។
ដោយក្តីងឿងឆ្ងល់ថា ហេតុអ្វីបានជាសម្លាញ់របស់ខ្លួនមិនឆ្លើយតបទាល់តែសោះ គេក៏បានហៅទូរស័ព្ទទៅកាន់លេខនោះផ្ទាល់តែម្តង ហើយក៏បានជួបនឹងប្រធានផ្នែកធនធានមនុស្សនៃក្រុមហ៊ុនដែលគេនឹងចូលធ្វើការ។ យុវជននេះភ្ញាក់ផ្អើល និងតក់ស្លុតជាខ្លាំងដែលបែរជាបាននិយាយជាមួយនឹងមេដែលខ្លួនត្រូវជួបនៅព្រឹកស្អែកនោះ សម្រាប់ថ្ងៃធ្វើការដំបូង។ គេសុំទោសយ៉ាងញាប់មាត់ តែវាមិនអាចជួយអ្វីបានទេ។
ប្រធានធនធានមនុស្សបានប្រាប់សារព័ត៌មានក្នុងស្រុកខាងលើនេះថា៖ « ពេលទទួលសារលើកទីមួយ ខ្ញុំគិតថា ជាការផ្ញើច្រឡំលេខ។ ខ្ញុំមិនយកចិត្តទុកដាក់ទេ »។ ប៉ុន្តែ បន្ទាប់ពីទទួលបានសារជាលើកទីពីរ និងការហៅទូរស័ព្ទទៀត គាត់សម្រេចចិត្តប្រាប់ហេតុការណ៍ដ៏អាក្រក់នេះដល់ប៉ូលិស។ ពិតមែនតែគាត់មិនបានដាក់ពាក្យបណ្តឹងប្រឆាំងនឹងអនាគតបុគ្គលិករបស់ខ្លួន តែស្អែកឡើង មុខតំណែងការងារនោះក៏ត្រូវបានប្រកាសរើសសាជាថ្មី៕
© រក្សាសិទ្ធិដោយ thmeythmey.com