ជាតិ
នយោបាយជាតិ
លោក ហ៊ុន សែន ថា ការទទួលសញ្ញាបត្របណ្ឌិតកិត្តិយស ជាកិត្តិយសរបស់ប្រជាជនកម្ពុជា
×
ភ្នំពេញ៖ លោកនាយករដ្ឋមន្ត្រី ហ៊ុន សែន បានបង្ហាញនូវអារម្មណ៍រំភើបរីករាយ និង មោទន ភាពបំផុត ក្នុងនាមជាមេដឹកនាំប្រទេស ដែលទទួលសញ្ញាបត្របណ្ឌិតកិត្តិយស«ភាពជា អ្នកដឹកនាំឆ្នើម»ពីសាកលវិទ្យាល័យ លីមកុកវីង នៃប្រទេសម៉ាឡេស៊ី នៅថ្ងៃទី០៩ ខែកញ្ញា ឆ្នាំ២០១៥នេះ នាវិមានសន្តិភាព។ លោកនិយាយថា កិត្តិយស ដែលលោកទទួលបានពេលនេះ គឺជាកិត្តិយសរបស់ប្រជាជនកម្ពុជាទាំងអស់។
ពីពិធីទទួលសញ្ញាបត្រកិត្តិយស «ភាពជាអ្នកដឹកនាំឆ្នើម» លោក ហ៊ុន សែន បានថ្លែងថា កិត្តិយស ដែលលោកទទួលបានថ្ងៃនេះ ជាកិត្តិយសរបស់ប្រជាជនកម្ពុជាទាំងអស់គ្នា ហើយលោកបន្តលើកឡើងថា កិច្ចខិតខំប្រឹងប្រែង និងពលីកម្មទាំងអស់ គឺនៅក្នុងបុព្វ ហេតុជាតិមាតុភូមិ និងប្រជាជនជាទីស្រលាញ់ទាំងអស់។ លោកបញ្ជាក់យ៉ាងនេះថា៖ «វាជាកិត្តិយសរបស់ប្រជាជនកម្ពុជា។ សញ្ញាបត្រនេះ ក៏បានលើកទឹកចិត្តបន្ថែមដល់រូបខ្ញុំ ក្នុងការបន្តនូវបុព្វហេតុ បម្រើប្រជាជន បម្រើជាតិមាតុភូមិ បន្តអភិវឌ្ឍសង្គមសេដ្ឋកិច្ចរបស់កម្ពុជា »។
ក្នុងឱកាសនោះដែរ នាយករដ្ឋមន្ត្រីដែលគេចាត់ទុកថាជាបុរសខ្លាំងរបស់កម្ពុជា ក៏បានថ្លែងអំណរគុណដល់សមាជិក សមាជិកា និងសហសេវិក នៃគណបក្សប្រជាជនកម្ពុជាទាំងអស់ ដែលបានលះបង់កម្លាំងកាយចិត្តដោយស្មោះស្ម័គ្រចូលរួមការងារបក្ស ក្នុងការដឹកនាំប្រទេសកម្ពុជា៕
© រក្សាសិទ្ធិដោយ thmeythmey.com