ជាតិ
សិស្សនិទ្ទេស A សាលា AIS ៥នាក់ប្រាប់ពីកត្តាជោគជ័យក្នុងការសិក្សា សិស្សចំនួន៥នាក់ នៃសាលារៀនអន្តរទ្វីប អាមេរិកាំង (AIS) បានទទួលនិទ្ទេស A ក្នុងការប្រឡងជាប់សញ្ញាបត្រមធ្យមសិក្សា ទុតិយភូមិ (បាក់ឌុប) ឆ្នាំសិក្សា២០១៤-២០១៥ ។ក្នុងចំណោមសិស្សទាំង៥នាក់នេះ មានប្រុស២នាក់ និងស្រី៣នាក់។
វាមិនមែនជារឿងចៃដន្យឡើយសម្រាប់សិស្ស ៥នាក់នៃសាលារៀនអន្តរទ្វីបអាមេរិក ដែលស្ថិតក្នុងចំណោមសិស្ស ១០៨នាក់ ទទួលបានទទួលនិទ្ទេស A ពីការប្រឡងសញ្ញាបត្រមធ្យមសិក្សាទុតិយភូមិ តែវាជាការខិតខំប្រឹងប្រែងយកចិត្តទុកដាក់ក្នុងការរៀនសូត្រយ៉ាងប្តូរផ្តាច់របស់ពួកគេ គួបផ្សំនឹងការយកចិត្តទុកពីសំណាក់មាតាបិតា និងស្ថាប័នអប់រំរបស់ពួកគេ។
បេក្ខជន និងបេក្ខនារីនិទ្ទេស A ទាំង៥នាក់នោះគឺ ១. យុវជន សុខ សៀវឈូង ២. យុវជន ឈួ អាំងឡេង ៣. យុវតី ជិន ច័ន្ទដាលុច្ស ៤. យុវតី ល័ក្ខ សុផាវត្ដី ៥. យុវតី សុង លូស្ស៊ី។ តើមានមូលហេតុ និងវិធីសាស្ត្រអ្វីខ្លះ ដែលធ្វើឲ្យយុវជន យុវតីទាំង៥នាក់នេះអាចមានសមត្ថភាពទទួលបាននិទ្ទេស A?
យុវតី សុង លូហ្ស៊ី បានលើកឡើងថា៖ «កត្តាដែលជំរុញឲ្យខ្ញុំទទួលបានជោគជ័យ និងលទ្ធផលដូចថ្ងៃនេះ គឺមានកត្តាច្រើន។ ទីមួយគឺកត្តាខ្ញុំខ្លួនឯង ដែលខ្ញុំបានដាក់ចិត្តថាខិតខំរៀនសូត្រ។ ហើយមួយទៀតគឺកត្តាឪពុកម្តាយ បើមិនមានពួកគាត់ ខ្ញុំក៏មិនមានភាពជោគជ័យនៅថ្ងៃនឹងដែរ។ ចំណែកឯកត្តាដ៏សំខាន់មួយទៀតនោះគឺ សាលារៀន។ ដោយសារតែសាលាមានវិន័យតឹងរឹង លោកគ្រូ អ្នកគ្រូមានភាពហ្មត់ចត់ក្នុងបង្ហាត់បង្រៀន ដល់សិស្សានុសិស្ស។ លើសពីនេះទៅទៀត ការបែងចែកពេលវេលាក្នុងការសិក្សា ក៏ជាកត្តាចាំបាច់ដែរ»។
ស្រដៀងគ្នានេះដែរ យុវជន ឈួ អាំងឡេង យល់ថា កត្តាដែលជំរុញឲ្យខ្លួនឯងទទួលបានជោគជ័យយ៉ាងត្រចះត្រចង់ដូច្នេះ គឺអាស្រ័យលើកត្តា ៤យ៉ាង គឺខ្លួនឯង គ្រួសារ សាលារៀន និងសង្គម។ ឈួ អាំងឡេងពន្យល់ទាំងញញឹមថា៖ «ចំពោះខ្ញុំផ្ទាល់ មូលហេតុដែលនាំឲ្យខ្ញុំទទួលបានជោគជ័យនៅពេលនេះ គឺមានកត្តា៤យ៉ាង។ ទី១ គឺកត្តាខ្លួនខ្ញុំផ្ទាល់ ដែលខ្ញុំបានតាំងចិត្តតាំងពីដើមមក ថាយកនិទ្ទេស A ឲ្យបាន។ កត្តាទី២ គឺឪពុកម្តាយខ្ញុំ ដែលគាត់តែងតែឧបត្ថម្ភឲ្យខ្ញុំរៀនសូត្រ នៅសាលាល្អ រហូតអញ្ជើញគ្រូមកបង្រៀនដល់ផ្ទះទៀត។ ហើយកត្តាទី៣ គឺសាលារៀន និងលោកគ្រូ អ្នកគ្រូ។ ដោយសារតែ សាលារៀនមានវិន័យតឹងរឹង ផ្តោតលើគុណភាពជាចម្បង រួមផ្សំនឹងលោកគ្រូ អ្នកគ្រូ ដែលមានសមត្ថភាព និងភាពហ្មត់ចត់ ក្នុងការបង្រៀន ផ្តល់នូវដំបូន្មានដ៏ល្អៗ ព្រមទាំងជួយជ្រោមជ្រែង និងជួយខ្ញុំនៅពេលដែលខ្ញុំមានបញ្ហាក្នុងសិក្សា ទើបធ្វើឲ្យខ្ញុំអាចប្រឡងជាប់និទ្ទេស A នេះ។ បើគ្មានពួកគាត់ទេ ខ្ញុំក៏មិនអាចប្រឡងបាននិទ្ទេស A នេះដែរ ។ រីឯកត្តាទី៤ គឺកក្តាសង្គម ដែលខ្ញុំចង់ក្លាយជាពលរដ្ឋល្អម្នាក់ ដូច្នេះខ្ញុំត្រូវព្យាយាមរៀនសូត្រនូវអ្វីដែលនៅជុំវិញខ្លួន ក្រៅពីការសិក្សានៅក្នុងសាលា។
ក្រៅពីការលើកឡើងនូវកត្តាផ្សេងៗរបស់អ្នកទាំងពីរ ដែលបណ្តាលឲ្យពួកគេទទួលបានជោគជ័យដ៏ធំធេងនេះ យុជន យុវតីបីរូបទៀតដែលទទួលបាននិទ្ទេស A ដូចគ្នា ក៏បានលាតត្រដាងនូវវិធីសាស្ត្ររៀងៗខ្លួន ក្នុងការសិក្សាដើម្បីទទួលបានភាពជោគជ័យ។
យុវជន សុខ សៀវឈូង បានបកស្រាយពីវិធីសាស្ត្ររបស់ខ្លួនថា៖ «វិធីសាស្ត្រក្នុងការរៀនរបស់ខ្ញុំ គឺទី១ ខ្ញុំត្រូវខំធ្វើលំហាត់ឲ្យបានច្រើន ព្រោះថា ពេលណាយើងធ្វើលំហាត់ច្រើន យើងស្គាល់ប្រភេទនៃប្រធានលំហាត់។ អីចឹងយើងមានដំណោះស្រាយច្រើនក្នុងការធ្វើលំហាត់ទាំងអស់នោះ។ ជាងនេះទៅទៀត យើងក៏ត្រូវតែស្គាល់វិធីសាស្ត្រជាច្រើនក្នុងការដោះស្រាយលំហាត់មួយ ព្រោះថា លំហាត់មួយមិនអាចមានវិធីតែមួយនោះទេ អីចឹងយើងត្រូវចេះច្រើនវិធីក្នុងការដោះស្រាយ។ ហើយមួយទៀត យើងត្រូវខិតខំស្រាវជ្រាវដោយខ្លួនឯង ក្រៅពីការសិក្សាជាមួយលោកគ្រូ អ្នកគ្រូនៅក្នុងសាលា។ ចំណែកឯវិធីសាស្ត្រមួយទៀត គឺយើងមិនត្រូវដាក់សម្ពាធខ្លួនឯងទៅលើការសិក្សាពេកនោះទេ។ យើងត្រូវចេះបែងចែកពេលវេលាលំហែកាយ និងសម្រាក់ខួរក្បាលខ្លះ។ នៅពេលណាដែលយើងរៀនគឺរៀន ហើយនៅពេលណាដែលយើងលេង គឺលេង ដើម្បីបន្ធូរអារម្មណ៍តឹងតែង»។
ចំណែកឯ យុវតី ល័ក្ខ សុផាវត្តី បានពន្យល់ពីវិធីសាស្ត្ររបស់ខ្លួនថា៖ «វិធីសាស្ត្រនៃការរៀននោះ ខ្ញុំយល់ថា ទីមួយយើងត្រូវស្វែងយល់ពីខ្លួនឯងជាមុនសិន ថាតើរបៀបរៀនបែបម៉េច ដែលធ្វើឲ្យយើងរៀនបានជោគជ័យ។ ព្រោះវិធីសាស្ត្រខ្លះ អ្នកដទៃអនុវត្តទៅបានជោគជ័យ តែមិនប្រាកដថាយើងអាចធ្វើខ្លួនឯងឲ្យជោគជ័យនោះទេ ព្រោះមនុស្សគ្រប់គ្នាសុទ្ធតែមានលក្ខណៈខុសៗគ្នា។ ហើយម្យ៉ាងទៀត ចំពោះខ្ញុំវិញ ក្នុងការរៀន ខ្ញុំតែងតែជំរុញទឹកចិត្តខ្លួនឯងជានិច្ច ខ្ញុំមិនងាយបាក់ទឹកចិត្តក្នុងការសិក្សានោះទេ។ លើសពីនេះទៅទៀត នៅពេលខ្ញុំមានចម្ងល់ចំពោះលំហាត់ ឬមេរៀនណាមួយ ខ្ញុំតែងតែសួរមិត្តភក្តិខ្ញុំឲ្យជួយពន្យល់»។
រីឯ កញ្ញា ជិន ច័ន្ទដាលុច្ស វិញ មានទស្សនៈ និងវិធីសាស្ត្រខុសពីនាក់ទាំងពីរ ដោយយុវតីរូបនេះ អនុវត្តតាមអង្គរបស់អ្នកសិក្សា ពោលគឺ សុ ចិ បុ លិ។ បេក្ខនារីនិទ្ទេស A រូបនេះបញ្ជាក់ដូច្នេះថា៖ «ចំពោះខ្ញុំវិញ ដើម្បីរៀនឲ្យបានពូកែ និងទទួលបានលទ្ធផល្អ អ្វីដែលសំខាន់បំផុតនោះគឺ ស្តាប់ គិត សួរ កត់ត្រា។ មិនថារៀននៅសាលាផ្លូវការ ឬក៏រៀនគួរនោះទេ សំខាន់បំផុតគឹ ស្តាប់ គិត សួរ កត់ត្រា នឹងហើយ ឥតមានអ្វីក្រៅពីនឹងទេ។ កាលណាយើងមិនបានយកចិត្តទុកដាក់ជាមួយគ្រូ ចំពោះអ្វីដែកគាត់បានពន្យល់ យើងប្រាកដជាមិនយល់ ហើយត្រូវចំណាយពេលមកមើលមេរៀនដដែលនៅផ្ទះឡើងវិញទៀត។ ជាងនេះទៅទៀត ពេលមកផ្ទះវិញត្រូវអនុវត្តលំហាត់ឲ្យបានច្រើន មិនថាលំហាត់ក្នុងសៀវភៅ លំហាត់គ្រូដាក់ឲ្យ ឬក៏លំហាត់ដែលយើងរៀនគួរនោះទេ។ ជាពិសេស ពេលជិតប្រឡង យើងត្រូវប្រឹងរៀនឲ្យមែនទែន និងប្រឹងធ្វើលំហាត់ចាស់ឡើងវិញ»។
ការប្រឡងជាប់និទ្ទេស A របស់ពួកគេទាំង៥នាក់ពិតជាធ្វើឲ្យក្រុមគ្រួសារមានអារម្មណ៍រំភើបឥតឧបមា ព្រមទាំងនាំកិត្តិយស និងមោទនភាពដល់សាលារបស់ពួកគេទៀតផង។ ឥឡូវយើង ក្រឡេកទៅមើលឪពុកម្តាយ ព្រមទាំងអាព្យាបាលរបស់ពួកគេម្តង ដែលបានសម្តែងអារម្ភរំភើបចំពោះសមត្ថភាពកូនៗរបស់ខ្លួនដែលទទួលបាននិទ្ទេស A។
លោកស្រី យី សុភ័ក្ត្រ ដែលជាអ្នកម្តាយរបស់ លូស្ស៊ី បានសម្តែងនូវអារម្មណ៍សប្បាយរីករាយថា៖ «ខ្ញុំតែងតែតាមដានសកម្មភាពរបស់លូស្ស៊ី។ ខ្ញុំសង្កេតឃើញថាកូនខ្ញុំខំរៀន ហើយខ្ញុំគិតថាកូនខ្ញុំប្រាកដជាអាចទទួលបានលទ្ធផលល្អនៃការប្រឡង។ ឥឡូវលូស្ស៊ី ទទួលបាននិទ្ទេស A ដូចការរំពឹងទុកមែន។ គ្រាន់តែខ្ញុំ និងប៉ាលូស្ស៊ីដឹងដំណឹងនឹងភ្លាម ពួកយើងពិតជាសប្បាយចិត្ត សប្បាយចិត្តមែនទែន នៅពេលដែលឃើញកូនទទួលបានលទ្ធផលល្អដូច្នេះ»។
ចំណែកឯ លោក សុខ ហួត ដែលជាលោកប៉ារបស់ សៀវឈូង ក៏មានប្រសាសន៍ទាំងញញឹមថា៖ «តាមសមត្ថភាពរបស់សៀវឈូង ខ្ញុំធ្លាប់រំពឹងថា គាត់អាចទទួលបានលទ្ធផលល្អ ព្រោះគាត់ប្រឹងរៀន ខ្ញុំតែងតែតាមដានសកម្មភាពសិក្សារបស់គាត់។ ពេលឃើញកូនទទួលបានជោគជ័យអីចឹង ខ្ញុំពិតជាត្រេកអរណាស់ ហើយខ្ញុំបានសន្យាថានឹងរៀបចំពិធីអបអរគាត់ ដើម្បីជាការលើកទឹកចិត្តគាត់»។
រីឯ លោកស្រី ស៊ា សុគន្ធាវី ដែលជាម្តាយធំ របស់ អាំងឡេង ក៏បានសម្តែងការអបអរសាទរថា៖ «មិនថាតែម៉ាក់អាំងឡេងទេដែលត្រេកអរ សូម្បីតែខ្ញុំជាម្តាយធំ ក៏ខ្ញុំសប្បាយដែរ សប្បាយចិត្តមែនទែន ដែលឃើញក្មួយគាត់បានទទួលលទ្ធផលល្អដូច្នេះ»។ ថ្វីដ្បិតខ្ញុំជាម្តាយធំមែន តែខ្ញុំរស់នៅជាមួយគ្រួសារអាំងឡេង ដូចជាគ្រួសារតែមួយអីចឹង។ ខ្ញុំសង្កេតឃើញថា អាំងឡេងគឺជាកូនល្អ ស្រួលអប់រំ មិនពិបាកណែនាំរឿងរៀនសូត្រនោះទេ គឺគាត់ខិតខំដោយខ្លួនឯងតែ ម្តង យើងមិនដែលជំរុញច្រើននោះទេ»។
តាមពិតទៅលទ្ធផលដ៏ត្រចះត្រចង់របស់សិស្សទាំងនេះ ក៏អាស្រ័យលើប្រព័ន្ធអប់រំរបស់សាលាមួយផ្នែកធំដែរ។ មិនថាលោកគ្រូ អ្នកគ្រូនោះទេ សូម្បីពួកគេទាំង ៥នាក់ផ្ទាល់ក៏ទទួលស្គាល់ថា ស្ថាប័នអប់រំនេះ គឺ មានវិន័យតឹងរឹង និងផ្តោតលើគុណភាពជាចម្បង។
លោក អ៊ី ប៊ុនលី ជាគ្រូបង្រៀនផ្នែកប្រវត្តិវិទ្យា ដែលមានបទពិសោធជិត១០ឆ្នាំ ក្នុងការបង្រៀននៅសាលារៀនអន្តរទ្វីបអាមេរិកាំង បានលើកថា ប្រព័ន្ធអប់រំរបស់សាលារៀនអន្តរទ្វីបអាមេរិកាំង គឺមានវិន័យល្អ និងផ្តោតទៅលើគុណភាពជាធំ។ លោកបញ្ជាក់ដូច្នេះថា៖ «នៅទីនោះមិនចាំបាច់តែថ្នាក់ទី១២ បានយើងខំប្រឹងពង្រឹងនោះទេ តែវិន័យសាលាគឺមានតាំងពីថ្នាក់ក្រោមមក។ ហើយជាពិសេសនោះ មុនពេលប្រឡង គ្រូៗទាំងអស់សុទ្ធតែផ្តល់អនុសាសន៍ ដល់សិស្សានុសិស្ស ឲ្យត្រៀមខ្លួន ដើម្បីទទួលបានជោគជ័យ។ ដូច្នេះហើយបានជាសាលាយើង ទទួលបានជោគជ័យដូចការរំពឹងទុកមែន»។
លោក អ៊ី ប៊ុនលី បន្ថែមទៀតថា៖ «ការប្រឡងជាប់និទ្ទេស A នេះ គឺវាសាកសមនឹងអ្វីដែលពួកគេទាំង ៥នាក់ បានខិតខំប្រឹងប្រែង ព្រមទាំងមានការជំរុញពីសំណាក់លោកគ្រូ អ្នកគ្រូគ្រប់រូប។ មុនប្រឡង ខ្ញុំក៏បានរំពឹងទុកដែរថា សិស្សរបស់ខ្ញុំនឹងទទួលបាននិទ្ទេស A »។
លើសពីនេះទៀត លោកស្រី ម៉ែន ភក្តី ជាគ្រូផ្នែកជីវវិទ្យា ដែលមានបទពិសោធ ៨ឆ្នាំក្នុងការបង្រៀននៅស្ថាប័នមួយនេះ ក៏បានលើកឡើងដែរថា លោកគ្រូ អ្នកគ្រូទាំងអស់ បានខិតខំព្យាយាមណាស់ ក្នុងការផ្តល់ជាគំនិតដល់សិស្សានុសិស្សថាត្រូវត្រៀមខ្លួន និងធ្វើយ៉ាងម៉េចក្នុងការប្រឡង។
អ្នកគ្រូរូបនេះបន្ថែមដូច្នេះថា៖ «សិស្សានុសិស្សនៅទីនេះ ភាគច្រើន គឺពួកគាត់ មានការភ្ញាក់រឭកដោយខ្លួនឯង អីចឹងហើយបានជាពួកគាត់ចាប់បានលឿនតែម្តង នូវអ្វីដែលលោកគ្រូ អ្នកបានណែនាំ។ ជាពិសេសនោះ លោកគ្រូ អ្នកគ្រូគ្រប់រូប មានការសហការ និងទំនាក់ទំនងគ្នាយ៉ាងជិតស្និទ្ធជាមួយសិស្សានុសិស្ស»។
សូមបញ្ជាក់ថា ចំនួនសិស្សប្រឡងសញ្ញាបត្រមធ្យមសិក្សាទុតិយភូមិនៅសាលារៀនអន្តរទ្វីបអាមេរិកាំង មានចំនួន ៣៣៩នាក់ ក្នុងនោះមានចំនួន ២៩៦នាក់ដែលប្រឡងជាប់។ ចំនួនអ្នកប្រឡងជាប់ទាំង ២៩៦នាក់ មាន៥នាក់ទទួលបាននិទ្ទេស A ២០នាក់បាននិទ្ទេស B ៣៣នាក់ បាននិទ្ទេស C ៦០នាក់ បាននិទ្ទេស D និង ១៧៨នាក់ បាននិទ្ទេស E៕
© រក្សាសិទ្ធិដោយ thmeythmey.com