ពីនេះ ពីនោះ
ទស្សនវិទូ៖ តើសេរីភាពនយោបាយមានព្រំដែនដែរឬទេ?
×
មនុស្សជាអ្នកប្រព្រឹត្ត ឥទ្ធិពលពិតកើតមានចំពោះសង្គម។ ក្នុងនាមជាទស្សនវិទូនយោបាយ ជាប្រវត្តិវិទូ ជាសង្គមវិទូ និងជាអ្នកនិពន្ធប្រលោមលោកជនជាតិបារាំងលោក ម៉ុងតេសគីយើ ( Montesquieu)បានលើកឡើងថា «ក្នុងលទ្ធិប្រជាធិបតេយ្យ ប្រជាជនធ្វើសកម្មភាពទៅតាមអ្វីដែលខ្លួនពេញចិត្ត។ ប៉ុន្តែសេរីភាពនយោបាយមិនអាចនឹងកើតមានសេរីភាពឥតព្រំដែននោះទេ»។
ជាការពិតការរស់នៅមានសិទ្ធិ មានសេរីភាពគឺជាអ្វីមួយដែលមនុស្សទូទៅចង់បាន។ ក្នុងនោះផងដែរបុគ្គលគ្រប់រូបតែងយល់ថា រហូតមកដល់សម័យនេះហើយ គឺសម័យដែលសង្គមមួយត្រូវបានគ្រប់គ្រងដោយប្រព័ន្ធដឹកនាំបែបប្រជាធិបតេយ្យហើយ ហេតុអីនៅមានការបំបិទសិទ្ធិ បំបិទសេរីភាពមនុស្សទៀត។ គេតែងនាំគ្នាគិតថា ខ្ញុំមានមាត់ខ្ញុំត្រូវតែនិយាយ ខ្ញុំមានដៃមានជើងត្រូវតែធ្វើសកម្មភាព ខ្ញុំមានក្បាលត្រូវតែគិតវិភាគ និងរិៈគន់បានដោយសេរី ព្រោះនេះជាអ្វីដែលលទ្ធិប្រជាធិបតេយ្យបានផ្ដល់ឲ្យខ្ញុំ។ ជាពិសេសនៅក្នុងសកម្មភាពនយោបាយតែងមានការលើកឡើងដូចៗគ្នា ទាំងអ្នកនយោបាយ ទាំងអ្នកគាំទ្រអ្នកនយោបាយគឺចង់បានសិទ្ធិ ចង់បានសេរីភាពនៅក្នុងសកម្មភាពនយោបាយរបស់ខ្លួន។ តែផ្ទុយទៅវិញបុគ្គលទាំងនោះបែរជាមិនដឹងថាតើព្រំដែនដែលខ្លួនចង់បាននៅក្នុងលក្ខខណ្ឌបែបណាឲ្យពិតប្រាកដនោះទ?
ចំណែកឯនៅក្នុងរដ្ឋាភិបាលក៏ដូចនៅក្នុងសង្គមដែលដឹកនាំដោយច្បាប់ សេរីភាពមិនអាចចេះតែកើតមានទៅតាមឆន្ទៈរបស់យើងគ្រប់រូបភាពបានទេ។ ព្រោះនេះជាកិច្ចសន្យាសង្គមមួយដែលមនុស្សបាន ចុះកិច្ចព្រមព្រៀងជាមួយគ្នាដើម្បីឲ្យមានសង្គមមួយមានច្បាប់ មានទម្លាប់ត្រឹមត្រូវ ច្បាស់លាស់ដើម្បីគ្រប់គ្រងសង្គម។ ចុះបើមនុស្សទូទៅ ឬអ្នកនយោបាយចេះតែប្រើប្រាស់សេរីភាពដែលធម្មជាតិបានផ្ដល់ឲ្យខ្លួននោះ វាពិតជាគ្មានន័យនោះទេដើម្បីរៀបចំសង្គមឲ្យមាននីតិរដ្ឋ។
ជារួមចំពោះគំនិតរបស់ ម៉ុងតេសគីយើ បើទោះបីជាសង្គមបែបប្រជាធិបតេយ្យ សេរីភាពត្រូវផ្ដល់ជូនមនុស្សគ្រប់រូបក៏ពិតមែន តែជាសេរីភាពដែលបុគ្គលគ្រប់រូបអាចធ្វើបានលុះត្រាណាច្បាប់អនុញ្ញាត។ ហើយរាល់ការប្រើប្រាស់សិទ្ធិ និងសេរីភាពនេះទៀតសោតគឺត្រូវតែយកគោលការណ៍ច្បាប់ជាមូលដ្ឋាន។
សរុបមកយើងអាចទាញសន្និដ្ឋានយ៉ាងខ្លីថា សង្គមមានច្បាប់ គ្រួសារមានវិន័យ នោះសេរីភាពគ្រប់បែបយ៉ាងក៏ត្រូវតែមានដែនកំណត់។ ភាពអនាធិបតេយ្យនៃសេរីភាពនយោបាយក៏ត្រូវតែបញ្ចប់។ ប៉ុន្តែវាក៏មិនអាចមានសេរីភាពបានដែរ ប្រសិនបើស្ថាប័នអំណាចតុលាការ មិនអាចកាត់ផ្ដាច់ចេញពី អំណាចនីតិបញ្ញត្តិ និង នីតិប្រតិបត្តិ ហើយគ្មានច្បាប់ល្អដើម្បីគ្រប់គ្រងសង្គម។
© រក្សាសិទ្ធិដោយ thmeythmey.com