ព្រឹត្តិការណ៍បាល់ទាត់ប្រចាំឆ្នាំក្នុងពានរង្វាន់មិត្តហ្វូនខេមបូឌានលីក២០១៥ (Metfone Cambodian League 2015) បានធ្វើដំណើរដល់សប្ដាហ៍ទី ១៧ ហើយ ស្របពេលតារាងចំណាត់ថ្នាក់មានការប្រជែងគ្នាកាន់តែខ្លាំងក្រោយការប្រកួតចំនួន ៦ គូបញ្ចប់ទៅកាលពីចុងសប្ដាហ៍កន្លងទៅនេះ។
សម្រាប់លទ្ធផលប្រកួតដែលធ្វើឡើងនៅល្ងាចថ្ងៃសៅរ៍ ទី ១៩ កញ្ញា កន្លងទៅក្រុមក្រសួងការពារជាតិ បានយកឈ្នះក្រុមគីរីវង់សុខសែនជ័យ ដោយលទ្ធផល ៣ ទល់ ០ លើទីលានកីឡដ្ឋានកងយោធពលខេមរភូមិន្ទ (ស្ដាតចាស់)របស់ខ្លួន។ ៣ គ្រាប់របស់ក្រសួងការពារជាតិ រកបានដោយកីឡាករ Kim Jongho នៅនាទី ២៣ ហើយកីឡាករ Kazuki Tatsuta បានរកគ្រាប់ទី២ នៅនាទីទី ៣០ និងគ្រាប់ទី៣ នៅនាទី ៥។
នៅថ្ងៃជាមួយគ្នានោះដែរក្រុមម្ចាស់ផ្ទះវេស្ទើន បានប្រកួតឈ្នះក្រុមអាស៊ីអឺរ៉ុប ដោយលទ្ធផល ២ ទល់ ១ លើទីលានកីឡដ្ឋានវេស្ទើនរបស់ខ្លួន។ ដំបូងឡើយក្រុមអាស៊ីអឺរ៉ុប បានរកគ្រាប់បាល់នាំមុខ ១ ទល់ ០ នៅនាទី ៦៩ ដោយកីឡាករ Mohamed Hamzaabdel ប៉ុន្ដែកីឡាករ Tadakuni Tomoyuki បានទាត់បាល់ពិន័យ១១ ម៉ែត្រឱ្យក្រុមវេស្ទើន តាមបានស្មើវិញនៅនាទី ៨១ ហើយកីឡាករ Methew Osa បានរកគ្រាប់បាល់ទី២ ឱ្យក្រុមនៅនាទី ៨៨ មុនបញ្ចប់ការប្រកួត។
ចំណែកក្រុមភ្នំពេញក្រោន បានយកឈ្នះក្រុមមជ្ឍមណ្ឌលកំចាត់មីនកម្ពុជា (ស៊ីម៉ាក់) ដោយលទ្ធផល ១០ ទល់ ១ នៅទីលានពហុកីឡដ្ឋានជាតិ។ កីឡាករ Booysen Shane បានរកគ្រាប់បាល់ឱ្យក្រុមភ្នំពេញក្រោន បាន ៤ គ្រាប់ម្នាក់ឯង ហើយកីឡាករ កែវ សុខផេង និង Bisan George រកបានម្នាក់ ២ គ្រាប់ គួច ដានី រកបាន ១ គ្រាប់ និង ១ គ្រាប់ចុងក្រោយជាការធ្វេសប្រហែសធ្វើឱ្យចូលទីខ្លួនឯងរបស់កីឡាករខាងក្រុមស៊ីម៉ាក់។ ចំណែក ១ គ្រាប់របស់ស៊ីម៉ាក់ រកបានដោយកីឡាករ Okereke Timothy។
ចំពោះការប្រកួតនៅកីឡដ្ឋានខេត្តស្វាយរៀង ក្រុមម្ចាស់ផ្ទះស្វាយរៀងអែហ្វស៊ី បានប្រកួតស្មើគ្នា ២ ទល់ ២ ជាមួយក្រុមជើងឯករងឆ្នាំចាស់បឹងកេតអង្គរ។ ប្រធានក្រុម ប្រាក់ មុន្នីឧត្តម បានរកគ្រាប់បាល់ឱ្យស្វាយរៀងនាំមុខ ១ ទល់ ០ នៅនាទី ២១ ដោយបាល់ពិន័យ១១ម៉ែត្រ តែកីឡាករ អ៊ុំ កុម្ភៈ របស់បឹងកេត តាមបានស្មើ ១ ទល់ ១ វិញនៅនាទី ៤។ ចូលដល់នាទី៧៦ ខ្សែប្រយុទ្ធ Kipson របស់ស្វាយរៀង បានរកគ្រាប់បាល់នាំមុខក្រុមភ្ញៀវជាបន្ត ប៉ុន្ដែកីឡាករ ចាន់ វឌ្ឍនាកា របស់បឹងកេត បានរកគ្រាប់បាល់តាមស្មើជាលើកទី២ នៅនាទីទី៨។
ដោយឡែកសម្រាប់ជំនួបរវាងក្រុមខេមបូឌានថាយហ្គឺរ និងក្រុមបៀលប្រាយយូណាធីត លើទីលានកីឡដ្ឋានវេស្ទើន នៅថ្ងៃអាទិត្យ ទី ២០ ខែ កញ្ញា នេះបញ្ចប់ទៅដោយលទ្ធផល ១ ទល់ ។ ការប្រកួតបាន ២៧ នាទីកីឡាករ Privat បានរកគ្រាប់បាល់ខេមបូឌានថាយហ្គឺរ នាំមុខ ១ ទល់ ០ ប៉ុន្ដែការប្រកួតចូលដល់នាទី ៦២ ទើបកីឡាករ ស៊ឹម វុត្ថា ទើបតែផ្ទេរចេញពីក្រុមវេស្ទើន បានរកគ្រាប់បាល់តាមស្មើ១ ទល់ ១ វិញ។
នៅថ្ងៃអាទិត្យនេះផងដែរ ក្រុមណាហ្គាវើល និងក្រុមអគ្គស្នងការដ្ឋាននគរបាលជាតិ ក៏បញ្ចប់ទៅដោយលទ្ធផល ១ ទល់ ១ ដែរនៅលើទីលានពហុកីឡដ្ឋានជាតិ។ ក្រុមណាហ្គាវើល បានរកគ្រាប់បាល់នាំមុខមុន ១ ទល់ ០ ដោយកីឡាករ Masahiro Fukasawa ប៉ុន្ដែត្រូវបានកីឡាករ ស៊ុន វណ្ណដេត របស់អគ្គស្នងការដ្ឋាននគរបាលជាតិ តាមបានស្មើវិញ មុនបញ្ចប់ការប្រកួត។
សម្រាប់តារាងចំណាត់ក្រុមខ្លាំងទាំង៤ ប្រចាំសប្ដាហ៍ទី១៧ នេះលេខ១ នៅតែជាភ្នំពេញក្រោន មាន ៤២ ពិន្ទុ តាមពីក្រោយដោយក្រុមបឹងកេតអង្គរ មាន៣៩ ពិន្ទុតែនៅសល់១ប្រកួតក្នុងដៃ ហើយលេខ៣ ក្រុមខេមបូឌានថាយហ្គឹរ មាន៣១ ពិន្ទុ និងក្រុមណាហ្គាវើល ឈរលេខ ៤ មាន ២៩ ពិន្ទុ។ ស្វាយរៀង ក្រសួងការពារជាតិ និងអគ្គស្នងការដ្ឋាននគរបាលជាតិ មាន២៦ ពិន្ទុដូចគ្នា ស្របពេលក្រុមបៀលប្រាយនៅលេខ៨ មាន២១ ពិន្ទុ ក្រុមអាស៊ីអឺរ៉ុបលេខ៩ មាន១៤ ពិន្ទុ និងក្រុមវេស្ទើនលេខ១០ មាន១៣ពិន្ទុ។ ចំណែកក្រុម២ បាតតារាងមានក្រុមមជ្ឍមណ្ឌលកំចាត់មីនកម្ពុជា (ស៊ីម៉ាក់) នៅលេខ១១ មាន១១ ពិន្ទុ ហើយក្រុមគីរីវង់សុខសែនជ័យ លេខ១២ មាន៥ ពិន្ទុ៕