ពីនេះ ពីនោះ
ប្លាតុង៖ ចៅក្រមគឺជាគ្រូពេទ្យនៃព្រលឹង!
× ប្លាតុងជាទស្សនវិទូវិចារណញាណនិយម ជនជាតិក្រិកសម័យបុរាណហើយជាទស្សនវិទូមួយរូប ដែលឲ្យតម្លៃខ្ពស់ទៅលើសមត្ថភាពនៃគំនិតរបស់មនុស្ស បានលើកឡើងថា «ចៅក្រមគឺជាគ្រូពេទ្យនៃព្រលឹង»។ រាងកាយមានជំងឺ អាចព្យាបាលបានដោយថ្នាំពេទ្យ ចំណែកគំនិត និងព្រលឹងមានបញ្ហាត្រូវការអ្វីម្យ៉ាងដើម្បីព្យាបាល។ តើអ្វីជាអត្ថន័យពិត ចំពោះគំនិតរបស់ប្លាតុង?
បើយើងនិយាយពី ពាក្យថាចៅក្រមគឺអាចដឹងបានភ្លាមថាជាបុគ្គលដែលមានតួនាទីយ៉ាងសំខាន់នៅក្នុងតុលាការ ជាមន្ត្រីតុលាការ ជាមន្ត្រីអ្នកជម្រះក្ដី ក្នុងការធ្វើសេចក្ដីវិនិច្ឆ័យច្បាប់ ឬកាត់សេចក្ដីចំពោះបុគ្គលណាមួយកំពុងជំនុំជំរះក្ដីនៅក្នុងតុលាការដើម្បីឲ្យដឹងថាអ្នកណាខុស ឬក៏អ្នកណាត្រូវ។
តែជាទូទៅ យើងតែងតែឃើញថា អ្នកប្រព្រឹត្តខុស តែងតែប្រកែកប្រណាំង ជាមួយចៅក្រមជានិច្ច ដើម្បីបង្ហាញពីភាពស្អាតស្អំរបស់ខ្លួន បង្ហាញពីភាពត្រឹមត្រូវរបស់ខ្លួន ថាខ្លួនមិនមែនជាបុគ្គលដែលបានសាងកំហុសឬបទឧក្រិដ្ឋណាមួយជាដើម។ វិស័យដូចជាអ្នកជំងឺផ្នែកស្មារតី តែងតែប្រកែកប្រណាំងជាមួយគ្រូពេទ្យយ៉ាងដូច្នេះដែរ។ ជាទង្វើរមួយដែលមិនព្រមទទួលយកការពិតថាខ្លួនគឺជាអ្នកណា។
ហេតុនេះពាក្យមួយឃ្លារបស់ប្លាតុងនៅទីនេះគឺចង់សម្ដៅដល់តួនាទីរបស់ចៅក្រមគឺ ជាបុគ្គលដែលអាចព្យាបាលជំងឺមិនទទួលខុសត្រូវ ជំងឺមិនទទួលយកការពិត ជំងឺអយុត្តិធម៌ ជំងឺកុហកបោកប្រាស់ ជំងឺវង្វេងសតិអារម្មណ៍ក្នុងទង្វើខុសច្បាប់ជាដើម ដែលតែងកើតមាននៅក្នុងគំនិតរបស់បុគ្គលស្ទើរគ្រប់រូប។ ហើយជំងឺទាំងនេះសុទ្ធតែកើតឡើងពីព្រលឹងមិនបរិសុទ្ធ ហើយចៅក្រមត្រូវតែដើរតួនាទីជាគ្រូពេទ្យដ៏ល្អមួយរូប ជាគ្រូពេទ្យជំនាញមួយរូប គ្រូពេទ្យដ៏ប៉ិនប្រសប់ ដើម្បីព្យាបាលព្រលឹងអាក្រក់តាមរយៈការវិនិច្ឆ័យទោសដោយត្រឹមត្រូវ មានសុក្រឹតភាព និងសុចរិតត្រឹមត្រូវ ដែលអាចឲ្យអ្នកជំងឺទាំងនេះទទួលយកការពិតបាន។ តែបើចៅក្រមមិនបំពេញកាតព្វកិច្ចជាគ្រូពេទ្យដ៏ល្អទេ នោះអ្នកជំងឺនោះក៏មិនអាចក្លាយជាមនុស្សល្អបានដែរ។ បើចៅក្រមវិនិច្ឆ័យខុស គ្មានសច្ចភាព ក៏មិនអាចធ្វើឲ្យកូនក្ដីណាមួយអាចទទួលយកភាពអយុត្តិធម៌បានឡើយ។ បើទោះបីជាពេលខ្លះជននោះទទួលយកការសម្រេចរបស់ចៅក្រម តែនៅក្នុងចិត្ត និងគំនិតរបស់គាត់គឺមិនអាចទទួលបាននោះទេ។
សរុបមក ក្នុងនាមជាចៅក្រមគឺមានករណីកិច្ចដ៏សំខាន់ ដើម្បីសំអាតព្រលឹងរបស់មនុស្ស ព្យាបាលគំនិតអវិជ្ជមានរបស់មនុស្សនៅក្នុងសង្គម ដើម្បីឲ្យមនុស្សទូទៅក្លាយជាបុគ្គលដែលមានសុខភាពល្អផ្នែកព្រលឹង គំនិត និងវិញាណ។
© រក្សាសិទ្ធិដោយ thmeythmey.com