Diego Costa ជាប់ពិន័យ៣ប្រកួតឲ្យ Chelsea ដោយសារប្រើអំពើហិង្សាក្នុងពេលប្រកួត

កីឡាអន្តរជាតិ

អន្តរជាតិ

Diego Costa ជាប់ពិន័យ៣ប្រកួតឲ្យ Chelsea ដោយសារប្រើអំពើហិង្សាក្នុងពេលប្រកួត

23, Sep 2015 , 10:27 am

រូបភាព

ដោយ: ទេព ពិទូរ្យ

ខ្សែប្រយុទ្ធ Diego Costa នឹងត្រូវអាក់ខាន៣ប្រកួតឲ្យក្រុម Chelsea បន្ទាប់ពីសហព័ន្ធកីឡាបាល់ទាត់អង់គ្លេស ហៅកាត់ថា (FA) រកឃើញថាបានបង្កអំពើហិង្សាក្នុងពេលប្រកួត។

មូលហេតុនៃការពិន័យនេះដោយសារ Costa បានប្រើអាកប្បកិរិយាមិនសមរម្យដោយការពើងទ្រូង និងយកដៃគ្រវាសទៅលើមុនរបស់ កីឡាករ Laurent Koscielny មុនពេលប៉ះទង្គិចគ្នាជាមួយ Gabriel របស់ Arsenal ដោយត្រូវបានកាតក្រហមបណ្តេញចេញក្នុងអំឡុងពេលប្រកួតក្របខណ្ឌកំពូលអង់គ្លេស ដែល Chelsea យកឈ្នះ Arsenal ២-០ កាលពីសប្តាហ៍មុន។

ការពិន័យខាងលើនេះ ខ្សែប្រយុទ្ធវ័យ ២៦ឆ្នាំរបស់អេស្ប៉ាញក៏ដូចជាក្រុមតោខៀវទាំងមូល បានបដិសេធដោយចេញសេចក្តីថ្លែងការណ៍មួយថា «យើងមានការខកចិត្តជាខ្លាំងជាមួយនឹងការសម្រេចនេះ ចំពោះការដាក់ពិន័យលើកីឡាកររបស់យើង»។

ក្រោយការពិន័យ៣ប្រកួត Diego Costa នឹងត្រូវអវត្តមានក្នុងការប្រកួតពានរង្វាន់ League Cup រវាង Chelsea ជាមួយ Walsall នៅយប់ថ្ងៃពុធនេះ និងពីរប្រកួតទៀតពេលប៉ះក្រុម Newcastle និង Southampton ក្នុងក្របខណ្ឌកំពូលអង់គ្លេស។