ពីនេះ ពីនោះ
ទំពាំងរលួយ អាចស្នងឫស្សីបានទេ?
× ខ្មែរមានពាក្យស្លោកមួយឃ្លា ថា« ទំពាំងស្នងឫស្សី» ជាឃ្លាធៀបមួយ ដើម្បីបង្ហាញ និងដាស់តឿនក្រើនរំលឹកដល់មនុស្សសម័យថ្មីដែលជាផ្នែកមួយដ៏សំខាន់ដើម្បីកសាងសង្គមជាតិពេលអនាគត។ ចុះបើទំពាំងខ្ញុំរលួយហើយ តើគេអាចសង្ឃឹមលើខ្ញុំទេ?
បើទំពាំងពន្លកមកស្អុយ រលួយ ដីខ្វះជីជាតិ គ្មានអ្នកយកចិត្តទុកដាក់ ឬទំពាំងខ្លះគ្រាន់តែដុះមកស្រាប់តែត្រូវគេកាត់ គេជីកបាត់ តើអាចនឹងមានឫស្សីល្អនៅពេលខាងមុនបានដោយរបៀបណា? ទំពាំងទាំងនេះមួយចំនួនប្រៀបបីដូច ក្មេងខិលខូច ក្មេងមិនខិតខំរៀនសូត្រ ក្មេងពាល ក្រុមក្មេងញៀនល្បែង ញៀនអាភៀន ស្រី ស្រា ដែលធ្វើឲ្យសង្គមបាត់នូវធនធានជួយស្រោចស្រង់សង្គមដ៏សំខាន់។
កត្ដានេះហើយទើបបញ្ហានេះបានក្លាយជាបញ្ហាមួយដែលនាំឲ្យក្រសួងអប់រំចាប់ផ្ដើមចាក់ទឹក ស្រោចគល់ ដាក់ជី បោចស្មៅ ជ្រោយដីដើម្បីធ្វើឲ្យទំពាំងមានសុខភាពល្អ មានគុណភាពផ្នែកអប់រំ ឲ្យក្លាយជាក្ដីសង្ឃឹមចំពោះអនាគតប្រទេស ដែលបានដេកលក់ផ្នែកវិស័យអប់រំជាង២០ឆ្នាំ។
ជាការពិតបើយុវជនស្អុយហើយ ចង់មិនចង់សង្គមមិនអាចមានភាពរឹងមាំ ឬខ្លាំងបានយូរអង្វែងទេ។ ក្នុងនាមជាឫស្សីឃុំគ្រង ក្នុងនាមជាអ្នកដឹកនាំ ក្នុងនាមជាអ្នកបណ្ដុះបណ្ដាល ក្នុងនាមជាជនគំរូ ត្រូវតែជួយធ្វើយ៉ាងណាឲ្យទំពាំងដែលទូលដីចេញជាទំពាំង ដែលលូតត្រដរដុះចេញជាទំពាំង ឲ្យក្លាយជាឫស្សីដ៏ល្អ ក្លាយជាយុវជនសសរទ្រូងរបស់ប្រទេសជាតិ។ យុវជនខ្លួនឯង ក៏ត្រូវតែប្រឹងប្រែងតស៊ូអភិវឌ្ឍន៍ខ្លួនឲ្យសមជាយុវជនសម័យថ្មី មានគំនិតថ្មី កុំដេកចាំតែស្រែកថា គ្រួសារក្រីក្រ គ្មានលទ្ធភាព មិត្តភក្កិអួសទាញ ឬបន្ទោសរដ្ឋថាមិនយកចិត្តទុកដាក់ ចោទសង្គមមិនខ្វល់ពីខ្លួន ទាំងខ្លួនមិនទាន់បានចាប់ផ្ដើមពីខ្លួនឯងផងនោះ។
© រក្សាសិទ្ធិដោយ thmeythmey.com