កីឡាជាតិ
បឹងកេតអង្គរនាំមុខគេ ខណៈអាស៊ឺអឺរ៉ុប ស៊ីម៉ាក វេស្ទើន និងគិរីវង់ អស់ផ្លូវប្រជែងពាន
×![]()
ក្រុមកីឡាបាល់ទាត់ភ្នំពេញក្រោន បានរងបរាជ័យលើកដំបូងក្នុងទឹកដីរបស់ខ្លួន ដោយសារក្រុមបាតតារាង គិរីវង់សុខសែនជ័យ ខណៈបឹងកេតអង្គរដែលជាគូប្រជែងដ៏ធំរបស់ខ្លួនបន្តទទួលជ័យជម្នះរបស់ខ្លួនលើណាហ្គាវើល ដើម្បីឡើងទៅឈរនៅលើកំពូលតារាងនៃក្របខណ្ឌមិត្តហ្វូនខេមបូឌានលីក ឆ្នាំ២០១៥ ។
ភ្នំពេញក្រោន បានខកឱកាសរក្សាខ្លួនដោយឈរពីលើបឹងកេតអង្គរសម្រាប់សប្តាហ៍ទី១៨នៃក្របខណ្ឌមិត្តហ្វូនខេមបូឌានលីកឆ្នាំ២០១៥ បន្ទាប់ពីពួកគេរងនូវការខកចិត្តយ៉ាងខ្លាំង ក្រោយចាញ់ក្រុមបាតតារាង គិរីវង់សុខសែនជ័យ ២-១ នៅកីឡដ្ឋាន RSN របស់ខ្លួន កាលពីរសៀលថ្ងៃព្រហស្បតិ៍។ នេះជាបរាជ័យលើកទីពីររបស់ភ្នំពេញក្រោនប្រចាំរដូវកាល និងជាការខកចិត្តលើកដំបូងផងដែរសម្រាប់ក្រុមម្ចាស់ការពារតំណែងជើងឯកមួយនេះនៅក្នុងទឹកដី។
ស្របពេលនៃការបរាជ័យរបស់ភ្នំពេញក្រោន ក្រុមបឹងកេតអង្គរ បានក្តោបក្តាប់ឱកាសក្នុងការឡើងទៅឈរលើកំពូលតារាងវិញ ជាមួយនឹងជ័យជម្នះ ២-១ លើណាហ្គាវើលនៅពហុកីឡដ្ឋាន។ បឹងកេតអង្គរមាន៤២ពិន្ទុស្មើភ្នំពេញក្រោន ប៉ុន្តែក្រុមដែលមានមូលដ្ឋាននៅខេត្តកំពង់ចាមមួយនេះ នៅសល់មួយប្រកួតតាមពីក្រោយ។
ខេមបូឌានថាយហ្គឺររក្សាចំណាត់ទីបីលើតារាងដោយមាន៣១ពិន្ទុ បើទោះបីជាពួកគេបានចាញ់ស្វាយរៀង ៣-០ ក៏ដោយ។ ជាមួយគ្នានេះផងដែរ ជ័យជម្នះបាននាំឲ្យស្វាយរៀងឡើងទៅកាន់ចំណាត់ថ្នាក់លេខ៤ ដោយមាន២៩ពិន្ទុស្មើ ណាហ្គាវើល អគ្គស្នងការដ្ឋាននគរបាលជាតិ និងក្រសួងការពារជាតិ។ ក្រសួងការពារជាតិដែលកូដជាបន្តបន្ទាប់ អាចមានឱកាសដណ្តើមយកលេខ៤ ដោយសារតែពួកគេនៅសល់មួយប្រកួតតាមពីក្រោយ។
បៀលប្រាយយូណាយធីតដែលបានចាញ់ម្ចាស់ផ្ទះក្រសួងការពារជាតិ ៤-១ មាន២១ពិន្ទុ ដែលនៅមានឱកាសប្រជែងយកតំបន់ក្រុមខ្លាំងទាំង៤ ខណៈអាស៊ីអឺរ៉ុបយូណាយធីត ស៊ិម៉ាក់យូណាយធីត ដែលមាន១៤ពិន្ទុ វេស្ទើនភ្នំពេញដែលមាន១៣ពិន្ទុ និងគិរីវង់សុខសែនជ័យ ដែលមាន៨ពិន្ទុ បានត្រឹមតែប្រជែងគ្នាឲ្យផុតពីតំបន់គ្រោះថ្នាក់ប៉ុណ្ណោះ។
៤ក្រុមកំពូលនឹងឈានទៅដល់ការប្រកួតវគ្គខ្វែងប្រជែងយកពានប្រចាំរដូវកាលថ្មី ប៉ុន្តែក្រុមដែលបញ្ចប់ចំណាត់ថ្នាក់លេខមួយក្រោយការប្រកួតវិលជុំទាំង២២សប្តាហ៍ នឹងក្លាយជាតំណាងរបស់កម្ពុជាសម្រាប់ព្រឹត្តិការណ៍ប្រកួតជម្រុះ Mekong Toyoka Cup នៅប្រទេសឡាវ។
ចំពោះកីឡាករដែលរកគ្រាប់បាល់បញ្ចូលទីបានច្រើនជាងវិញ កីឡាករ ចាន់ វឌ្ឍនាកានៃក្លិបបឹងកេតអង្គររក្សាការនាំមុខគេដោយមាន២៨គ្រាប់ ខណៈ Dzarma Bata របស់ស្វាយរៀងរកបាន២០គ្រាប់ កីឡាករភ្នំពេញក្រោន Bisan George និង Booysen Shane រកបាន១៩គ្រាប់ និង George Kelichi របស់អាស៊ីអឺរ៉ុប រកបាន១៧គ្រាប់៕
Tag:
MCL2015
© រក្សាសិទ្ធិដោយ thmeythmey.com
«មជ្ឈការ»មានន័យខុសពី«វិមជ្ឈការ»ដូចម្តេច?
1 សប្តាហ៍
