កីឡាជាតិ
បឹងកេត និងភ្នំពេញក្រោន ចង់បាន៣ពិន្ទុនៅល្ងាចនេះស្របពេលគីរីវង់កំពុងតែមានទំនុកចិត្ត
×
ក្រុមភ្នំពេញក្រោន និង បឹងកេតអង្គរ សុទ្ធតែត្រូវការ៣ ពិន្ទុពីប្រកួតវគ្គសន្សំពិន្ទុសប្ដាហ៍ទី១៩ នៃពានរង្វាន់មិត្តហ្វូនខេមបូឌានលីក ២០១៥ (Metfone Cambodian League 2015) នៅល្ងាចថ្ងៃសៅរិ៍ ទី ២៦ ខែ កញ្ញា នេះស្របពេលគីរីវង់សុខសែនជ័យ កំពុងតែមានកម្លាំងចិត្តខ្លាំង។
ភ្នំពេញក្រោន ត្រូវបើកទ្វាកីឡដ្ឋាន RSN Stadium របស់ខ្លួនដែលមានមូលដ្ឋាននៅខណ្ឌទួលគោក ប្រកួតជាមយយក្រុមវេស្ទើន វេលាម៉ោង ៦ ល្ងាច។ ក្រុមជើងឯកឆ្នាំចាស់មួយនេះបានធ្លាក់មកឈរនៅលេខ២ ក្នុងតារាងបណ្ដោះអាសន្ន ក្រោយប្រកួតចុងក្រោយចាញ់ក្រុមគីរីវង់សុខសែនជ័យ។ ចំពោះក្រុមវេស្ទើន ក៏ត្រូវការពិន្ទុចាំបាច់ដែរដើម្បីស្វែងរកកៅអីឱ្យផុតពីតំបន់បាតតារាង។
ចំណែកក្រុមបឹងកេតអង្គរ ត្រូវជួបក្រុមអាស៊ីអឺរ៉ុបយូណាយធីត នៅវេលាម៉ោង ៣:៣០ នាទីរសៀល លើទីលានកីឡដ្ឋានកងយោធពលខេមរភូមិន្ទ។ កៅអីឡើងទៅលេងក្នុងពានរង្វាន់អន្តរជាតិប្រចាំតំបន់ Toyota Mekong Championship 2015 កំពុងតែស្ថិតនៅក្នុងដៃក្រុមបឹងកេតអង្គរ បណ្ដោះអាសន្ន ព្រោះក្រុមមួយនេះកំពុងតែនាំមុខក្នុងតារាង គិតត្រឹមសប្ដាហ៍ទី១៨ នេះ។ អាស៊ីអឺរ៉ុប ក៏ត្រូវការពិន្ទុឱ្យឆ្លងផុតពីតំបន់បាតតារាងដែរ ក្រោយឈរនៅចំណាត់ថ្នាក់លេខ ៩ មាន ១៤ ពិន្ទុក្នុងដៃ។
ចំណែកក្រុមគីរីវង់សុខសែនជ័យ វិញត្រូវជួបក្រុមបៀលប្រាយយូណាធិត នៅវេលាម៉ោង ៦ ល្ងាចលើទីលានពហុកីឡដ្ឋាន ក្នុងរាជធានីភ្នំពេញ។ លោក ផាន់ ចាន់ផាត គ្រូបង្វឹកក្រុមគីរីវង់សុខសែនជ័យ បានលើកឡើងថា កម្លាំងចិត្តបានជួយជំរុញអោយក្រុមលោកឈ្នះក្រុមកំពូលតារាងភ្នំពេញក្រោន កាលពីពាក់កណ្ដាលសប្ដាហ៍កន្លងទៅ។ ចំណែកក្រុមបៀលប្រាយយូណាយធីត នៅមានឱកាសតិចណាស់ក្នុងប្រជែងយកកៅអី Top4 ខណៈការប្រកួតនៅសល់តែ៣ លើកទៀតប៉ុណ្ណោះ។
តើក្រុមណាអាចរកបាន ៣ ពិន្ទុនៅល្ងាចថ្ងៃសៅរ៍ នេះ?
© រក្សាសិទ្ធិដោយ thmeythmey.com