លោក ហ៊ុន សែន ថ្លែងប្រាប់កិច្ចប្រជុំកំពូល UN ថា កម្ពុជាទទួលកំណើនសេដ្ឋកិច្ចខ្ពស់ និងស្ថិរភាពល្អ

ជាតិ

សេដ្ឋកិច្ច

នយោបាយជាតិ

លោក ហ៊ុន សែន ថ្លែងប្រាប់កិច្ចប្រជុំកំពូល UN ថា កម្ពុជាទទួលកំណើនសេដ្ឋកិច្ចខ្ពស់ និងស្ថិរភាពល្អ

27, Sep 2015 , 10:39 am

រូបភាព

រូបថត៖ ទំព័រហ្វេសប៊ុក Samdech Hun Sen, Cambodian Prime Minister

ដោយ: លីម តុលា

ភ្នំពេញ៖ នៅក្នុងសុន្ទរកថាថ្លែងទៅកាន់មហាសន្និបាតអង្គការសហប្រជាជាតិកាលពីម្សិលមិញនៅក្នុងទីក្រុង New York សហរដ្ឋអាមេរិក, លោក ហ៊ុន សែន នាយករដ្ឋមន្ត្រីនៃប្រទេសកម្ពុជាបង្ហាញពីសមិទ្ធផលសេដ្ឋកិច្ច និងសន្តិសុខរបស់កម្ពុជាជូនសមាជិកនៃអង្គការសហប្រជាជាតិ។

នៅចំពោះមុខសមាជិកនៃអង្គការសហប្រជាជាតិ ប្រមុខរាជរដ្ឋាភិបាលនៃព្រះរាជាណាចក្រកម្ពុជា បានថ្លែងដោយមោទនភាពថា កម្ពុជាទទួលបានសុខសន្តិភាព និងកំណើនសេដ្ឋកិច្ចខ្ពស់។ «ខ្ញុំរីករាយនឹងជម្រាបជូនអង្គប្រជុំថា ក្នុងរយៈពេល២ទសវត្សរ៍កន្លងមកនេះ កម្ពុជាសម្រេចបាននូវការវិវត្តប្រែប្រួលគួរជាទីមោទនៈ ជាពិសេស ការរក្សាបាននូវសន្តិភាពពេញលេញ ស្ថិរភាពនយោបាយរឹងមាំ សន្តិសុខ និងសណ្តាប់ធ្នាប់សាធារណៈល្អប្រសើរ»។ នេះគឺជាសាររបស់លោក ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

បន្ទាប់ពីលើកឡើងរឿងសន្តិសុខល្អរួចហើយ លោក ហ៊ុន សែន បានរំលេចឲ្យឃើញពីកំណើនសេដ្ឋកិច្ចនៅក្នុងប្រទេសកម្ពុជាដែលទទួលបានជាមធ្យមចំនួនជិត៨%ក្នុងមួយឆ្នាំ។

ផ្អែកលើមូលដ្ឋានកំណើននេះ អត្រានៃភាពក្រីក្រនៅក្នុងប្រទេសកម្ពុជាបានថយចុះយ៉ាងលឿនពី៥៣%ក្នុងឆ្នាំ២០០៤មកនៅត្រឹម១៦%កាលពីឆ្នាំ២០១៣កន្លងមក។ លោក ហ៊ុន សែន បានបន្តទៀតថា៖«បច្ចុប្បន្ន កម្ពុជាកំពុងឆ្លងទៅក្នុងដំណាក់កាលបន្ទាប់នៃការអភិវឌ្ឍ, នោះ គឺកម្ពុជាកំពុងឈានឡើងជាប្រទេសមានប្រាក់ចំណូលមធ្យមកម្រិតទាបនៅឆ្នាំ២០១៦ខាងមុខនេះ»។