ជាតិ
សង្គមជាតិ
ក្រសួងវប្បធម៌ប្រកាសស្រាវជ្រាវនិងចុះបញ្ជីបេតិកភណ្ឌវប្បធម៌អរូបីនៅទូទាំងប្រទេស
×![]()
ដោយ: ថ្មីៗ
ក្រសួងវប្បធម៌ និងវិចិត្រសិល្បៈ បានចាប់ផ្តើមស្រាវជ្រាវ និងការចុះបញ្ជីបេតិកភណ្ឌវប្បធម៌អរូបីនានានៅទូទាំងប្រទេស ដើម្បីចងក្រងជាឯកសារថែរក្សាការពារ និងអភិរក្សធនធានវប្បធម៌ដ៏មានតម្លៃមិនអាចកាត់ថ្លៃបានឲ្យស្ថិតនៅគង់វង្សសម្រាប់មនុស្សជំនាន់ក្រោយ។
លោក សំរាំង កម្សាន្ត រដ្ឋលេខាធិការក្រសួងវប្បធម៌ និងវិចិត្រសិល្បៈមានប្រសាសន៍ថា ក្រសួងត្រៀមចុះស្រង់ស្ថិតិរាល់ទម្រង់វប្បធម៌អរូបីទាំងអស់នៅគ្រប់មូលដ្ឋានទូទាំងប្រទេស ដើម្បីចងក្រងទៅជាទិន្នន័យថ្នាក់ជាតិទុកប្រើប្រាស់ជាប្រយោជន៍រួម សម្រាប់ជាឯកសារស្រាវជ្រាវ ការថែរក្សាការពារ និងការផ្ទរបន្តទៅអ្នកជំនាន់ក្រោយ។លោកថា នៅពេលចុះបញ្ជីរួចរាល់ហើយ ចំពោះបេតិកភណ្ឌវប្បធម៌អរូបីណាដែលមានវ័យចំណាស់ហើយប្រឈមនឹងការបាត់បង់នោះ ក្រសួងលើកទឹកចិត្តឲ្យមានការបណ្តុះបណ្តាលដល់អ្នកជំនាន់ក្រោយដើម្បីកុំឲ្យរលាយសាបសូន្យ។ ការថ្លែងរបស់លោក សំរាំង កម្សាន្ត ធ្វើឡើងនៅក្នុងពិធីបើកវគ្គបណ្តុះបណ្តាលវិធីសាស្ត្រការចុះបញ្ជីបេតិកភណ្ឌវប្បធម៌អរូបីថ្នាក់ជាតិ កាលពីថ្ងៃទី០១ ខែតុលា ឆ្នាំ២០១៥ នៅទីស្ដីការក្រសួងវប្បធម៌។
លោកស្រី អាន ឡឺមេស៍ (Anne Lemaistre) តំណាងអង្គការយូណេស្កូប្រចាំកម្ពុជា បានបញ្ជាក់ថា ផែនការចុះបញ្ជីបេតិកភណ្ឌវប្បធម៌អរូបីនៅកម្ពុជានេះ គឺជាការបើកទំព័រប្រវត្តិសាស្ត្រដ៏សំខាន់ បន្ទាប់ពីកម្ពុជាបានផ្តល់សច្ចាប័នក្លាយជាប្រទេសសមាជិករបស់អង្គការយូណេស្កូ ក្នុងការការពារ ថែរក្សា បេតិកភណ្ឌវប្បធម៌អរូបី ដែលមាននៅក្នុងប្រទេសកម្ពុជា។ លោកស្រី បន្តថា ការចងក្រងបាននូវទន្និន័យទាំងអស់នេះ វាមិនត្រឹមតែបានបង្ហាញពីតម្លៃវប្បធម៌ខ្មែរប៉ុណ្ណោះទេ ប៉ុន្តែវាបានបណ្តុះគំនិតឱ្យកូនខ្មែរទាំងអស់ចេះស្រឡាញ់ការពារកុំឱ្យមានការបាត់បង់។
សូមបញ្ជាក់ថា មកទល់ពេលនេះ កម្ពុជាបានទទួលចុះបញ្ជីបេតិកភណ្ឌអរូបីនៃមនុស្សជាតិពីអង្គការយូណេស្កូបានចំនួនពីរទម្រង់ហើយ គឺរបាំព្រះរាជទ្រព្យនៅឆ្នាំ២០០៣ និងល្ខោនស្រមោលស្បែកធំនៅឆ្នាំកាលពីឆ្នាំ២០០៥៕
ប្រភពពី៖AKP
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
1 សប្តាហ៍
