ជាតិ
នយោបាយជាតិ
លោក ហ៊ុន សែន និងមេបក្សប្រឆាំង ប្រើប្រាស់ហ្វេសប៊ុកវាយប្រហារគ្នា
× ខណៈដែលបណ្ដាញសង្គមហ្វេសប៊ុក គឺជាកន្លែងដែលមនុស្សទូទៅចូលចិត្តប្រើប្រាស់ ដើម្បីបង្ហាញពីសកម្មភាព និងមតិយោបល់នោះ អ្នកនយោបាយក៏ចាប់ផ្ដើម យកបណ្ដាញហ្វេសប៊ុកមួយនេះ ដើម្បីបញ្ចេញសាររិះគន់វាយប្រហារគ្នាទៅវិញទៅមក។ ចុងក្រោយនេះ លោកនាយករដ្ឋមន្ត្រីលោក ហ៊ុន សែន ក៏បានវាយប្រហារលោក សម រង្ស៊ី និងលោក កឹម សុខា តាមបណ្ដាញសង្គមហ្វេសប៊ុកនេះមិនសំចៃនោះឡើយ។
ក្រោយពីប្រកាសទទួលស្គាល់គណនីហ្វេសប៊ុកផ្លូវការរបស់ខ្លួនហើយនោះ លោកនាយករដ្ឋមន្ត្រី ហ៊ុន សែន តែងតែយកបណ្ដាញសង្គមមួយនេះ រិះគន់ឬវាយប្រហារបកទៅលើ លោក សម រង្ស៊ី និងលោក កឹម សុខា វិញ ដូចទៅនឹងទង្វើដែលថ្នាក់ដឹកនាំគណបក្សប្រឆាំងទាំងពីរនេះ ធ្លាប់ធ្វើដាក់ខ្លួនកន្លងមក។ តាមពិតទៅ លោក កឹម សុខា និងលោក សម រង្ស៊ី បានដើរមួយជំហានមុនលោក ហ៊ុន សែន រួចហើយ ពោលគឺលោកទាំងពីរបានយកបណ្តាញសង្គមហ្វេសប៊ុករិះគន់រដ្ឋាភិបាល និងលោក ហ៊ុន សែន ជាបន្តបន្ទាប់។
សារនយោបាយរបស់មេដឹកនាំគណបក្សប្រឆាំង ដែលលើកឡើងពាក់ព័ន្ធនឹងការរៀបចំតុលាការឯករាជ្យ រក្សាមុខតំណែងរបស់មន្ត្រីរាជការ កងកម្លាំងប្រដាប់អាវុធ និងបញ្ហាអប់រំនៅកម្ពុជាប៉ុន្មានថ្ងៃនេះដែលបង្ហោះនៅលើគណនីហ្វេសប៊ុករបស់ខ្លួន ត្រូវបានលោក ហ៊ុន សែន វាយប្រហារតាមបណ្តាញសង្គមហ្វេសប៊ុកតបទៅវិញថា ជាសារនយោបាយដ៏គ្រោះថ្នាក់ នៅពេលដែលគណបក្សប្រឆាំងជាប់ឆ្នោត។
លោកនាយករដ្ឋមន្ត្រី ហ៊ុន សែន ក៏បញ្ជាក់ថា លោកនឹងប្រើប្រាស់បណ្ដាញសង្គមហ្វេសប៊ុកខ្លួន វាយបកទៅលើគណបក្សប្រឆាំងវិញ។ «ខ្ញុំនឹងបន្តធ្វើការអត្ថាធិប្បាយតាមរយៈហ្វេសប៊ុក(Facebook)ផ្ទាល់របស់ខ្ញុំលើបញ្ហាផ្សេងៗដែលអ្នកនយោបាយនានាលើកឡើងរាប់ទាំងប្រធានបក្សប្រឆាំង»។ នេះជាការបញ្ជាក់របស់ប្រមុខរដ្ឋាភិបាល។
ដើមឡើយលោក ហ៊ុន សែន មិនដែលប្រើប្រាស់បណ្ដាញហ្វេសប៊ុក ដើម្បីរិះគន់ ឬវាយប្រហារទៅគណបក្សប្រឆាំងនោះទេ ពោលគឺលោក ហ៊ុន សែន តែងតែចេញមុខវាយបកតបតដោយពាក្យសម្ដីខ្លាំងៗ តាមរយៈឧគ្ឃោសនសព្ទនៅក្នុងកម្មវិធីផ្សេងៗ ឬតាមទូរទស្សន៍ជាតិកម្ពុជា ទៅកាន់គណបក្សប្រឆាំងប៉ុណ្ណោះ។ តែពេលនេះទំនងជាបណ្ដាញហ្វេសប៊ុក ជាទីពេញនិយមដែលមានប្រសិទ្ធភាពច្រើននោះ ទើបបានជាលោក ហ៊ុន សែន ប្រើប្រាស់បណ្ដាញសង្គមមួយនេះសម្រាប់វាយប្រហារទៅលើលោក សម រង្ស៊ី និងលោក កឹម សុខា ដែលកំពុងមានប្រជាប្រិយភាពយ៉ាងខ្លាំងលើបណ្ដាញសង្គមហ្វេសប៊ុកនេះ៕
© រក្សាសិទ្ធិដោយ thmeythmey.com