អន្តរជាតិ
នយោបាយអន្តរជាតិ
ប្រធានាធិបតីបារាំងច្រឡំមាត់បន្ទន់ជំហររកប្រធានាធិបតីស៊ីរី?
×
កាលពីថ្ងៃពុធកន្លងទៅ ប្រធានាធិបតីរុស្ស៊ី Vladimir Poutine បានលើកឡើងថា ប្រធានាធិបតីបារាំង François Hollande បានស្នើទៅលោកនូវគំនិតដ៏គួរអោយចាប់អារម្មណ៍មួយ។ គំនិតនោះ គឺថា លោកហូឡង់ចង់ឃើញសម្ព័ន្ធភាពរវាងលោកអាសាដ និងចលនាសេរីស៊ីរី ដែលជាក្រុមប្រឆាំង។ យោងតាមលោកពូទីន លោកហូឡង់ចង់ឃើញមានការប្រឹងប្រែងរួមគ្នារវាងកងទ័ពរដ្ឋាភិបាលលោក Bachar el-Assad និងក្រុមប្រឆាំង។ រដ្ឋាភិបាលបារាំងបានបដិសេធនូវការលើកឡើងរបស់លោកពូទីន។ ខណៈរុស្ស៊ីកំពុងបង្ហាញសក្តានុពលយោធានៅស៊ីរី ដោយជំនួយពីកងទ័ពស៊ីរី និងអ៊ីរ៉ង់ ក្នុងយុទ្ធនាការកំទេចក្រុមរដ្ឋអ៊ីស្លាម គេមិនដឹងថា តើលោកហូឡង់ពិតជាចង់បន្ទន់ជំហរ ទៅរកលោកអាសាដវិញរឺយ៉ាងណា?
អ្នកស្រី ព្រំសឿន សូលីណា លម្អិតព័ត៌មាននេះ
បើយោងតាមលោកពូទីន ប្រធានាធិបតីបារាំង ហ្វ្រង់ស៊័រ ហូឡង់ (François Hollande) បានស្នើលោក នូវគំនិតចង់អោយមានការប្រឹងប្រែងរួមគ្នារវាងកងទ័ពលោកអាសាដ និងកងកម្លាំងក្រុមប្រឆាំងស៊ីរី។ លោកហូឡង់បានស្នើដូច្នេះ កាលពីថ្ងៃសុក្រ ក្នុងពេលមានជំនួបកំពូលក្រុងប៉ារីស ស្តីពីសន្តិភាពអ៊ុយក្រែន។ ប៉ុន្តែ ក្រុមជំនិតប្រធានាធិបតីបារាំងបានបដិសេធសម្តីលោកពូទីន។ ពួកគេតបទៅវិញថា ប្រធានាធិបតីហូឡង់បានជជែកជាមួយលោកពូទីន ពីការស្វែងរកដំណោះស្រាយនយោបាយស៊ីរី ដើម្បីអាចអោយរដ្ឋាភិបាលស៊ីរី និងក្រុមប្រឆាំងចរចាព្រមព្រៀងគ្នា បង្កើតចេញនូវរដ្ឋាភិបាលមួយ។
ស្តាប់ការបកស្រាយរបស់បារាំងដល់ឃ្លាប្រយោគនេះ ស្តាប់ចុះ ស្តាប់ឡើង ជាមួយនឹងពាក្យថា "បារាំងចង់ឃើញរដ្ឋាភិបាលស៊ីរី និងក្រុមប្រឆាំងព្រមព្រៀងគ្នា បង្កើតរដ្ឋាភិបាល" យើងហាក់ច្របូកច្របល់ ពិបាកយល់ថា តើបារាំងចង់អោយក្រុមលោកអាសាដ និងក្រុមប្រឆាំងរួបរួមគ្នា វិលទៅរកការចរចាម្តងទៀត ដើម្បីសម្រេចបានរដ្ឋាភិបាលរួបរួមគ្នាមួយ រឹយ៉ាងណា? បើដូច្នេះមែន មិនមានន័យថា លោកហូឡង់ចង់បន្ទន់ជំហរទៅរកលោកអាសាដវិញទៅហើយទេរឺ? បើដូច្នេះមែន យើងមិនពិបាកឆ្ងល់នូវការលើកឡើងរបស់លោកពូទីន ថាលោកហូឡង់ចង់អោយកងទ័ពលោកអាសាដ និងក្រុមប្រឆាំងប្រឹងប្រែងរួមគ្នានោះទេ។
បើបារាំងចង់បន្ទន់ជំហររកប្រធានាធិបតីអាសាដមែនក៏មិនមានអ្វីត្រូវឆ្ងល់ដែរ ព្រោះពេលនេះ គេឃើញថា ក្នុងយុទ្ធនាការកំចាត់ក្រុមរដ្ឋអ៊ីស្លាម រុស្ស៊ីកំពុងបង្ហាញសក្តានុពលយោធាយ៉ាងសម្បើមដៃ នៅស៊ីរី ធ្វើអោយអង្គការណាតូ និងអាមេរិកភ័យញាក់សាច់។ មិនត្រឹមតែប៉ុណ្ណោះ អ៊ីរ៉ង់ដែលជាប្រទេសដ៏ខ្លាំងមួយក្នុងតំបន់បូព៌ា ហើយដែលរួបរួមជាមួយអាមេរិក ក្នុងយុទ្ធនាការកំចាត់ក្រុមជីហាតដែរនោះ ក៏បានសហការជាមួយរុស្ស៊ីនិងស៊ីរី ក្នុងការកំចាត់ក្រុមនេះដែរ។
អ៊ីរ៉ង់ ស៊ីរី រុស្ស៊ី ហាក់កំពុងបង្អួតឆាកអន្តរជាតិ នូវសក្តានុពលទ័ពរៀងៗខ្លួន។ ពិសេសសម្ព័ន្ធមិត្តរវាងប្រទេសទាំង៣នេះ ធ្វើអោយគេអាចគិតថា បើអនាគត ក្រុមជីហាតត្រូវបានកំចាត់អស់ហើយនោះ ប្រទេសទាំងនេះពិតជាទទួលការអបអរពីពិភពលោកមិនតិចទេ។ គួរបញ្ជាក់ថា នៅតំបន់បូព៌ា មេដឹកនាំធំៗ នៅតាមប្រទេសដូចជាអ៊ីរ៉ាក់ រឺក៏លីប៊ី ត្រូវបានគេផ្តួលរលំយ៉ាងងាយ។ ប៉ុន្តែ បើមើលទៅស៊ីរីវិញ លោកអាសាដរឹងមាំណាស់ មិនងាយដួលស្រួលៗឡើយ។ កងទ័ពលោកអាសាដខ្លាំងដូចខ្លា ហើយរបបលោករឹងមាំដូច្នេះ ក៏អាចថាលោកបានទទួលការគាំទ្រពីរុស្ស៊ីដែរ។ ស៊ីរី អ៊ីរ៉ង់ ជាប្រទេសខ្លាំងក្នុងតំបន់ ហើយក្លាយជាសម្ព័ន្ធមិត្តដ៏អស្ចារ្យជាមួយរុស្ស៊ីទៀត បារាំងប្រហែលចង់មានចំណែកជាមិត្តដ៏៏ធំនឹងគេដែរទេដឹង បានជាលោកហូឡង់អាចច្រឡំមាត់ ចង់អោយមានការប្រឹងប្រែងរួមគ្នារវាងកងទ័ពលោកអាសាដ និងកងកម្លាំងក្រុមប្រឆាំង?
ក្រុមជំនិតប្រធានាធិបតីបារាំងបានព្យាយាមចៀសមិនអោយមានការយល់ច្រឡំដូច្នេះ ដោយបានលើកឡើងថា លោកហូឡង់បានលើកឡើងជាថ្មីម្តងទៀត នៅសភាអឺរ៉ុប កាលពីថ្ងៃពុធ នូវគោលបំណងលោក ចង់ឃើញប្រធានាធិបតីអាសាដ ចុះចេញពីអំណាច ដើម្បីអនាគតស៊ីរី។ ដោយឡែក សម្រាប់ដំណោះស្រាយនយោបាយ បារាំងនៅតែចង់ឃើញវត្តមានក្រុមប្រឆាំងស៊ីរី ក្នុងតុចរចាដដែល។ ប្រមុខការទូតបារាំង លោកឡូរ៉ង់ ហ្វាប៊ីយុស (Laurent Fabius) ឯណោះវិញ បានខំលើកឡើងពីជំហរបារាំងជាថ្មីថា ដរាបណាលោកអាសាដ នៅតែកាន់អំណាច គឺពិបាកមានការរួបរួមគ្នាណាស់ ដោយសារតែលោកអាសាដបានបង្កបទឧក្រិដ្ឋ។ លោកហ្វាប៊ីយុសចង់សំដៅពីបទឧក្រិដ្ឋសង្គ្រាមនោះឯង។
តែបើទោះជាលោកហូឡង់បានច្រឡំមាត់បន្ទន់ជំហររកលោកអាសាដវិញ ក៏អាចថាលោកចង់ការពារក្រុមប្រឆាំង មិនអោយរងគ្រោះដោយប្រការណាមួយ ពីសំណាក់រុស្ស៊ីដែរ។ ពេលនេះ គេកំពុងតែបារម្ភថា កងទ័ពរុស្ស៊ីអាចឆ្លៀតឱកាសយកលេសកំទេចក្រុមឧទ្ទាម ដើម្បីកំទេចក្រុមប្រឆាំងស៊ីរីទៅវិញទេ។ ក្រុមប្រឆាំងស៊ីរីនេះ រួមទាំងក្រុមឧទ្ទាមអាល់ណូស្រា កំពុងតែប្រយុទ្ធជាមួយកងទ័ពស៊ីរី។ ក្រុមប្រឆាំងស៊ីរីកំពុងចុះខ្សោយ។ ដូច្នេះ លោកហូឡង់អាចចង់ធ្វើជាច្រឡំមាត់ចង់ឃើញសម្ព័ន្ធភាពរវាងក្រុមប្រឆាំងស៊ីរី និងលោកអាសាដ ដើម្បីអោយរុស្ស៊ីអនុគ្រោះក្រុមប្រឆាំងស៊ីរី ក្នុងសមរភូមិក៏ថាបាន៕
© រក្សាសិទ្ធិដោយ thmeythmey.com