×![]()
ដោយ: ថ្មីៗ
លោកនាយករដ្ឋមន្ត្រី ហ៊ុន សែន តាមរយៈទំព័រហ្វេសប៊ុករបស់ខ្លួននៅថ្ងៃនេះ បានសរសេរសរសើរមិនដាច់ពីមាត់កម្មវិធីប្រឡងចម្រៀង Cambodian Idol របស់ទូរទស្សន៍ហង្សមាស។ លោកបានអះអាងថា លោកនិងភរិយា តែងតែបោះឆ្នោតគាំទ្រជានិច្ច។
លោកនាយករដ្ឋមន្ត្រី បានរៀបរាប់ថា៖ «បន្ទាប់ពីរឿងនយោបាយយ៉ាងច្រើន ដោយថ្ងៃនេះជាថ្ងៃសុក្រចុងសប្តាហ៍ផង និងឈានដល់ជិតថ្ងៃបុណ្យភ្ជុំផង គឺខ្ញុំសូមយកនាទីនេះនិយាយអំពីសិល្បៈខ្មែរម្តង»។
តាមរយៈការលើកឡើងថា លោក និងភរិយាគាំទ្រដែលផលិតដោយទូរទស្សន៍ហង្សមាស ដូចជា The Voice of Cambodia និង Cambodian Idol លោក ហ៊ុន សែន បានបន្ថែមថា៖ «ខ្ញុំ និងភរិយា បានតាមដានកម្មវិធីល្អៗទាំង និងបានបោះឆ្នោតគាំទ្របេក្ខជនដែលខ្ញុំពេញចិត្តតាំងពីនៅទីក្រុងភ្នំពេញរហូតដល់ទីក្រុង New York»។
លោកនាយករដ្ឋមន្ត្រី បានសរសើរ និងសម្តែងការពេញចិត្តចំពោះសមត្ថភាពរបស់ចៅក្រម ដូចជាលោក ព្រាប សុវត្ថិ កញ្ញា ឱក សុគន្ឋកញ្ញា លោក ឆន សុវណ្ណរាជ និង លោក ណុប បាយ៉ារិទ្ឋ និងពិធីករ ពិធីការិនីក្នុងកម្មវិធី។
ជាមួយគ្នានេះ លោក ហ៊ុន សែន បានសម្តែងការសោកស្តាយដែលលោក និងភរិយា មិនអាចមានលទ្ឋភាពដើម្បីបោះឆ្នោតអោយបេក្ខជន និងបេក្ខនារីដែលខ្លួនពេញចិត្តនាថ្ងៃអាទិត្យខាងមុខ ដោយសារមានបេសកកម្មទៅប្រទេសចិន។
លោកបានសរសេរថា៖ «ខ្ញុំសូមជូនពរចំពោះបេក្ខជននិងបេក្ខនារីទាំង៦រូប ដែលនឹងបន្តក្នុងវគ្គ Live Show ក្នុងពេលខាងមុខទទួលបាននូវការគាំទ្រពីសំណាក់អ្នកនិយមកម្មវិធី Cambodia Idol ទាំងអស់គ្នា។ ខ្ញុំក៏មានការសោកស្តាយចំពោះក្មួយៗដែលបានចាកចេញពីកម្មវិធីរួចមកហើយ។ ទោះបីក្មួយៗចាកចេញមែនពិត តែសមត្ថភាពរបស់ក្មួយៗទាំងអស់ពិតជាខ្ពស់ដែលពូសង្ឃឹមថាក្មួយៗនឹងបន្តខិតខំ ដើម្បីក្លាយខ្លួនជាអ្នកចម្រៀងអាជីពនៅពេលខាងមុខ»៕
Tag:
Cambodian Idol
© រក្សាសិទ្ធិដោយ thmeythmey.com
