កីឡាជាតិ
ជាតិ
កីឡា ១១ ប្រភេទនឹងបង្ហាញខ្លួននៅបុណ្យសមុទ្រនៅខេត្តកំពត
× កីឡាចំនួន១១ប្រភេទផ្សេងគ្នា នឹងដាក់ឲ្យចូលរួមប្រកួត និងសម្តែង បន្ថែមទៅលើការប្រគុំតន្ត្រីសម័យ សិល្បៈ ក្នុងកម្មវិធីបុណ្យសមុទ្រដែលនឹងធ្វើនៅខេត្តកំពត ពីថ្ងៃទី១១ដល់១៣ខែធ្នូចុងឆ្នាំនេះ ហើយរំពឹងថាបុណ្យសមុទ្រនៅឆ្នាំនេះ នឹងមានអ្នកចូលរួមច្រើនកុះករជាងបុណ្យសមុទ្រនៅខេត្តឆ្នាំមុន។
បើតាមកម្មវិធីបុណ្យសមុទ្រដែលទទួលបានកាលពីពេលថ្មីៗនេះ មានប្រភេទកីឡាត្រឹម១០ប៉ុណ្ណោះ ដាក់ឲ្យប្រកួត និងសម្តែង ក្នុងនោះមានការរត់ប្រណាំង (Fun Run) ចម្ងាយ៣ទៅ៥គីឡូម៉ែត្រ ប្រកួតចំបាប់បុរាណខ្មែរ ប្រណាំងទូកប្រពៃណីចំណុះពី១៥នាក់ទៅ២០នាក់ សម្តែងកីឡាល្បុក្កតោ ប្រណាំងទូកក្តោង ប្រដាល់ក្បាច់បុរាណខ្មែរ ប្រកួតបាល់ទះលើឆ្នេរខ្សាច់ ប្រណាំងទូកកានូ កាយ៉ាក់ កីឡាឆត្រយោង និងប្រកួតកីឡាអេឡិចត្រូនិច(E-Sport)។
នឹងមានបន្ថែមការប្រកួតអុកមួយទៀតទៅលើប្រភេទកីឡាទាំង១០ សម្រាប់ការប្រកួតម្ចាស់ជ័យលាភីអុកក្នុងបុណ្យសមុទ្រខេត្តកោះកុង កាលពីឆ្នាំមុន ត្រួវប្រកួតជាមួយអ្នកលេងអុកជើងខ្លាំង ដែលបានឆ្លងផុតវគ្គជម្រុះនៅខេត្តកំពត ឆ្នាំនេះ។ នេះបើតាម លោក វ៉ាត់ ចំរើន អគ្គលេខាធិការ NOCC និងជាប្រធានរៀបចំការប្រកួតបុណ្យសមុទ្រ។
ប្រសិនបើមិនមានការប្រែប្រូលទេ នឹងដាក់កីឡាចំនួន១១ប្រភេទឲ្យចូលរួមការប្រកួត។ កីឡាទាំងអស់នេះនឹងមិនកាត់បន្ថយទេ មានតែដាក់បន្ថែម ពីព្រោះកីឡាជាផ្នែកដ៏សំខាន់ក្នុងកម្មវិធីបែបទេសចរណ៍នេះ៕
© រក្សាសិទ្ធិដោយ thmeythmey.com