អន្តរជាតិ
នយោបាយអន្តរជាតិ
×![]()
នាយករដ្ឋមន្ត្រីជប៉ុន ស្ហ៊ីនសូ អាបេ និងតំណាងរដ្ឋាភិបាលចិន លោកYang Jiechi បានសន្យារួមគ្នា នៅថ្ងៃពុធម្សិលមិញនេះថា នឹងបន្តធ្វើអោយទំនាក់ទំនងទ្វេភាគីរវាងជប៉ុននិងចិន បានល្អប្រសើរឡើងវិញ ទោះជាប្រទេសទាំង២មានជម្លោះនឹងគ្នាក៏ដោយចុះ។ 
លោកYang Jiechi ជាទីប្រឹក្សារដ្ឋចិន បានចុះទៅទស្សនកិច្ចនៅក្រុងតូក្យូ ជួបជាមួយនាយករដ្ឋមន្ត្រីជប៉ុន ស្ហ៊ីនសូ អាបេ។ លោកអាបេ បានលើកឡើងទៅតំណាងរដ្ឋាភិបាលចិនថា លោកចង់លើកតំកើងទំនាក់ទំនងទ្វេភាគីជាមួយចិនឡើងវិញ ដោយលោកចង់អោយមានជំនួបពិភាក្សារវាងថ្នាក់ដឹកនាំកំពូលរវាងប្រទេសទាំងពីរ។
លោកអាបេ ថែមទាំងប្រាប់ថា លោកអន្ទះសាចង់ជួបប្រធានាធិបតីចិន ស៊ី ជីនពីង ជាថ្មីម្តងទៀត ក្នុងជំនួបកំពូលG20 និងApec ដែលត្រូវរៀបចំឡើងនៅខែវិច្ឆិកាខាងមុខទៀតផង។
មុននឹងជួបនាយករដ្ឋមន្ត្រីជប៉ុន ទីប្រឹក្សារដ្ឋចិន Yang Jiechi បានលើកឡើងរួចហើយដែរថា ចិននិងជប៉ុនជាប្រទេសជិតខាងសំខាន់នឹងគ្នា ចិនចង់ខិតទៅរកជប៉ុន ហើយក៏ចង់ធ្វើអោយទំនាក់ទំនងទ្វេភាគីជាមួយជប៉ុនបានប្រសើរឡើងផងដែរ។
គួរបញ្ជាក់ថា ក្រៅពីជម្លោះបូរណភាពដែនទឹកនៅសមុទ្រចិន ទំនាក់ទំនងរវាងចិននិងជប៉ុនក្នុងរយៈពេលចុងក្រោយនេះ បានកើនភាពតានតឹងនឹងគ្នាខ្លាំង ដោយសារតែសប្តាហ៍មុន យូណេស្កូបានកត់ត្រាចូលក្នុងបញ្ជីចងចាំពិភពលោក នូវព្រឹត្តិការណ៍សម្លាប់រង្គាលដែលកងទ័ពជប៉ុន បានបង្កឡើងក្នុងខែត្រណានជីង ប្រទេសចិន ក្នុងឆ្នាំ១៩៣៧។ ដោយសាររឿងនេះ ជប៉ុនបានគំរាមលែងឧបត្ថម្ភអង្គការយូណេស្កូតទៅទៀត៕
Tag:
ចិន
ជប៉ុន
© រក្សាសិទ្ធិដោយ thmeythmey.com
