អន្តរជាតិ
នយោបាយអន្តរជាតិ
×![]()
ដោយ: តន ចាន់រិទ្ធារ៉ា
រដ្ឋាភិបាលអាមេរិកបានប្រកាសថា ខ្លួននឹងមិនទាន់ដកកងកម្លាំងទាំងអស់ចេញពីប្រទេសអាហ្វហ្គានីស្ថានក្នុងឆ្នាំ២០១៦នោះទេ។ កងទ័ពរបស់អាមេរិកជិត១ម៉ឺននាក់ នឹងនៅបន្តជួយកងទ័ពអាហ្វហ្គានីស្ថាន ក្នុងការប្រយុទ្ធប្រឆាំងនឹងពួកឧទ្ទាមតាលីបង់ដែលកំពុងអុកឡុកពាសពេញប្រទេស ខណៈកងកម្លាំងអាហ្វហ្គានីស្ថាននៅតែទន់ខ្សោយនៅឡើយ។
ប្រធានាធិបតីអាមេរិកលោកបារ៉ាក់ អូបាម៉ា បានប្រកាសថា កងទ័ពចំនួន៥៥០០នាក់ នឹងបន្តស្ថិតនៅក្នុងប្រទេសអាហ្វហ្គានីស្ថានរហូតដល់ដើមឆ្នាំ២០១៧។ លោកថា៖ ក្នុងនាមជាមេបញ្ជាការកងទ័ពអាមេរិក លោកនឹងមិនអនុញ្ញាតឱ្យអាហ្វហ្គានីស្ថានក្លាយជាទីកន្លែងវាយប្រហារអាមេរិកនោះទេ។ ការបន្តរក្សាទុកកងទ័ពក្នុងអាហ្វហ្គានីស្ថាន ជារឿងដ៏ត្រឹមត្រូវ ហើយលោកបានទទួលស្គាល់ថា កងកម្លាំងអាហ្វហ្គានីស្ថាននៅខ្សោយនៅឡើយ។
ជាមួយការប្រកាសនេះ កងទ័ពអាមេរិកនឹងបន្តស្ថិតនៅទីតាំងចំនួន៤ គឺ ទីក្រុងKabul ,មូលដ្ឋានអាកាស Bagram ខេត្ត Jalalabadនៅភាគខាងកើត និងខេត្តKandaharនៅភាគខាងត្បូង ស្របពេលកងកម្លាំងអាហ្វហ្គានីស្ថាននឹងពង្រីកការគ្រប់គ្រងរបស់ខ្លួននៅបណ្ដាខេត្តសំខាន់ៗដ៏ទៃទៀត។
‹‹ប្រតិបត្តិការប្រយុទ្ធរបស់យើងនឹងត្រូវបញ្ចប់។ បេសកកម្មបន្តទៀតគឺ ការជួយហ្វឹកហ្វឺននិងផ្ដល់ប្រឹក្សាបច្ចេកទេសដល់កងកម្លាំងអាហ្វហ្គានីស្ថាន›។ នេះជាការបញ្ជាក់របស់រដ្ឋមន្ត្រីការពារជាតិអាមេរិកលោក Carter។ លោកបន្តថា អាមេរិកនឹងជួយពង្រឹងស្ថិរភាពក្នុងអាហ្វហ្គានីស្ថានរយៈពេលវែង។
ចំណែកឯប្រធានាធិបតីអាហ្វហ្គានីស្ថានលោកAshraf Ghani បានប្រកាសស្វាគមន៍គម្រោងការនេះ ដោយលោកបានលើកឡើងថា ការសម្រេចចិត្តនេះធ្វើឡើងក្រោយមានការពិភាក្សាគ្នាជាច្រើនខែរវាងលោកនិងលោកអូបាម៉ា។ លោក Ghaniបន្ថែមថា នេះជាការពង្រឹងភាពជាដៃគូ ក៏ដូចជាទំនាក់ទំនងរវាងអាហ្វហ្គានីស្ថាននិងអាមេរិក។
ដោយឡែកក្រុមឧទ្ទាមតាលីបង់ក៏បានប្រកាសដែរថា ខ្លួននឹងបន្តការប្រយុទ្ធរហូតដល់ពេលអាមេរិកដកកងទ័ពទាំងអស់ចេញពីអាហ្វហ្គានីស្ថាន។ បើតាមអ្នកនាំពាក្យរបស់ក្រុមនេះ បានឱ្យដឹងថា ពួកគេសម្រេចចិត្តឈ្លានពានយើង ប៉ុន្តែយើងជាអ្នកសម្រេចចិត្តថា ពួកគេចាកចេញនៅពេលណា។
គួរបញ្ជាក់ដែរថា អាមេរិកបានឈ្លានពានចូលអាហ្វហ្គានីស្ថាន ក្រោយមានព្រឹត្តិការណ៏ថ្ងៃ១១ ខែកញ្ញា ឆ្នាំ២០០១ដើម្បីវាយកម្ចាត់ក្រុមអាល់កៃដា។ ជម្លោះនេះបានបណ្ដាលឱ្យទាហានអាមេរិកប្រមាណ២០០០នាក់បាត់បង់ជីវិត និងជនស៊ីវិលអាហ្វហ្គានីសា្នរាប់មឺុននាក់បានស្លាប់និងរបួស។
© រក្សាសិទ្ធិដោយ thmeythmey.com
