អន្តរជាតិ
ចិនមិនអាចទទួលបានការទុកចិត្តពីរដ្ឋអាស៊ានទេ បើខ្លួននៅតែបន្តបំពាននៅក្នុងតំបន់ជម្លោះ
× ជម្លោះសមុទ្រចិនខាងត្បូង មិនមែនត្រឹមតែជាបញ្ហាដែលត្រូវបានគេចាប់អារម្មណ៍នៅក្នុងតំបន់នោះទេ តែបញ្ហានេះ កំពុងតែក្លាយប្រធានបទរសើបមួយដែលគេយកទៅជជែកនៅឆាកអន្តរជាតិ ដ្បិតជម្លោះកំពុងតែវិវត្តទៅរកស្ថានភាពមួយគួរព្រួយបារម្ភ។ ជាមួយគ្នានេះដែរ គេសង្កេតឃើញថា ចិន បានសន្យា ក្នុងការចរចាជាមួយអាស៊ានដើម្បីដោះស្រាយជម្លោះ ក៏ប៉ុន្តែខ្លួននៅតែបន្តសកម្មភាពនៃការ សាងសង់នៅក្នុងកោះសិប្បនិម្មិត។ រដ្ឋអាស៊ានមួយចំនួន បានក៏ព្រលះចិនជាបន្តបន្ទាប់ ព្រោះចិន មិនដែលធ្វើអ្វីដូចទៅនឹងការសន្យារបស់ខ្លួននោះទេ។
សូមស្ដប់ពត៌មានលម្អិត៖
មេបញ្ជាការកងទ័ពម៉ាឡេស៊ី លោក Tan Sri Zulkefli Mohd Zin បានព្រលះចិនមួយប្រាវពីសកម្មភាព នៅក្នុងតំបន់ជម្លោះសមុទ្រចិនខាងត្បូង។ ក្នុងសេចក្តីថ្លែងការណ៍មួយដ៏កម្រ លោក បានចាត់ទុកសកម្មភាពចិន គឺជាសកម្មភាពមួយដែលមិនអាចទុកចិត្តបាននោះទេ។ ការលើកឡើងនេះ កើតឡើង ក្រោយតែ៣ថ្ងៃបន្ទាប់ពីចិន បានលើកឡើងពីសំណើនៃការធ្វើលំហាត់យោធាជាមួយអាស៊ានតែ ប៉ុណ្ណោះ ។
សូមរម្លឹកថា កាលពីថ្ងៃទី១៦ តុលាកន្លងទៅនេះ លោក Chang Wanquan រដ្ឋមន្ត្រីការពារជាតិចិនបានប្រាប់ទៅកាន់សមភាគីទាំងដប់រដ្ឋរបស់អាស៊ាននៅក្នុងកិច្ចប្រជុំក្រៅផ្លូវការមួយនៅក្រុងប៉េកាំង ថា ចិនពិតជាត្រូវការភាគីទាំងអស់ដើម្បីជំរុញឲ្យមានចំណងនៃការអភិវឌ្ឍន៍មួយដ៏ត្រឹមត្រូវ។ ក្នុងនោះលោក បានលើកឡើងពីសំណើនៃការធ្វើសមយុទ្ធនៅឆ្នាំក្រោយ ដើម្បីអនុវត្តគោលការណ៍មួយចំនួនក្នុងការប្រឆាំងនិងទប់ស្កាត់នូវហនិភ័យផ្សេងៗដែលអាចកើតឡើងនៅក្នុងតំបន់ជម្លោះក្នុងពេលប្រតិបត្តិរុករកឬសង្គ្រោះដែលកន្លងមកបានកើតឡើងហើយធ្វើឲ្យមានការយល់ច្រលំគ្នារហូតឈានដល់ការប៉ះទង្គិចគ្នាទៀតផង។
យ៉ាងណាក៏ដោយ ការចេញមុខរិះគន់របស់ម៉ាឡេស៊ីភា្លមៗគ្នានេះ បានបង្ហាញយ៉ាងច្បាស់ថា ចិន មិនអាចបង្កើនទំនុកចិត្តជាមួយនឹងរដ្ឋអាស៊ាន ជាពិសេសភាគីពាក់ពន្ធ័នៃជម្លោះនោះទេ។ នោះ ក៏ព្រោះតែ ការសន្យាខ្យល់របស់ចិន បានក្លាយជាទម្លាប់មួយដែលមិនអាចកែប្រែបានទៅហើយ។ នោះ គឺចិននៅតាមបន្តសកម្មភាពនៅក្នុងការសាងសង់កោះសិប្បនិម្មិត ដែលត្រូវបានគេជឿជាក់ថា វាកំពុង តែបំលែងទៅជាមូលដ្ឋានទ័ពដ៏សំខាន់របស់ចិន។ បើយោងតាមរបាយការណ៍របស់អាមេរិក តាមរយៈ ផ្កាយរណប ចិន ចូលទៅកាន់កាប់តំបន់ជម្លោះប្រមាណជាងប្រាំបីរយហិចតា ដែលត្រូវបានគេស្គាល់ ថាកោះសិប្បនិម្មិតនោះឯង។
តាមពិតទៅ វាមិនមែនជារឿងដែលថ្មីនៃការចេញមុខរិះគន់របស់មេដឹកនាំអាស៊ាននោះទេ ពោលគឺ សកម្មភាពនេះ បានកើតឡើងជាបន្តបន្ទាប់។ ក្នុងនោះគេឃើញថា កាលពីពេលថ្មីនេះ ហ្វីលីពីន ដែល ជារដ្ឋអាស៊ានមួយដ៏ខ្លាំងក្លាដែលបានប្រកួតប្រជែងជាមួយចិន ក៏បានរិះគន់ខ្លាំងៗ និង ថែមទាំងចំអកទៅកាន់ចិនចំពោះការលើកឡើងពីការចរចាទ្វេភាគី ផងដែរ។
ងាកមកចាប់អារម្មណ៍ស្ថានភាពសន្តិសុខសមុទ្រចិនខាងត្បូងបន្តិច គេឃើញថា ភាពតានតឹងកំពុងតែ ផ្ទុះឡើងជាថ្មី រវាងអាមេរិក និងចិន ។ ហើយនោះគឺ សហរដ្ឋអាមេរិក រួមជាមួយសមភាគីរបស់ខ្លូន អូស្ត្រាលី បានអះអាងពីគម្រោងចុងក្រោយរបស់ខ្លួន ក្នុងការត្រៀមបញ្ជូននាវាចម្បាំងមកកាន់តំបន់ ជម្លោះសមុទ្រចិនខាងត្បូងដោយយោងតាមច្បាប់អន្តរជាតិ។
យ៉ាងណាមិញ បើតាមការបញ្ជាក់របស់ ប្រមុខការពារជាតិអាមេរិក ការបញ្ជូននាវាចម្បាំង នឹងធ្វើឡើងតាមស្ថានភាព និង ពេលវេលាចាំបាច់ បានបង្ហាញរូបភាពពិតជាស្រេចហើយថា អាមេរិកនឹងអន្តរាគមន៍ ប្រសិនបើ ចិនមានវិធានក្តៅណាមួយ នៅក្នុងតំបន់ជម្លោះ។ តែចិន បានអះអាងខ្លួន នឹងមិនប្រើកងកម្លាំងជាជម្រើសចុងក្រោយនៃដំណោះ ស្រាយ ខណៈដែលខ្លួនកំពុងតែសាងសង់មូលដ្ឋានយោធានៅក្នុងតំបន់ជម្លោះ។
សូមបញ្ជាក់ថា ភាគីជម្លោះសមុទ្រចិនខាងត្បូង រាប់បញ្ចូលរដ្ឋអាស៊ានបួនរួមមាន ព្រុយណេ ម៉ាឡេស៊ី ហ្វីលីពីន វៀតណាម និង ចិន។ ក៏ប៉ុន្តែបច្ចុប្បន្ន គេសង្កេតឃើញថា មានភាគីច្រើនបន្ថែមទៀត កំពុងតែចង់ពាក់ពន្ធ័ ក្រោមស្លាកនៃការគំរាមកំហែងសន្តិសុខ៕
© រក្សាសិទ្ធិដោយ thmeythmey.com