ជាតិ
សេចក្ដីណែនាំពីការជ្រើសរើសជំនាញ «វិទ្យាសាស្ត្រកសិកម្ម» សិក្សាថ្នាក់ឧត្ដមសិក្សា
×![]()
ដោយ: ថ្មីៗ
យោងតាមសៀវភៅ «មគ្គុទេសក៍ សម្រាប់ការជ្រើសរើសគ្រឹះស្ថានសិក្សា និង មុខជំនាញបន្តការសិក្សានៅកម្រិតឧត្ដមសិក្សា» របស់ក្រសួងអប់រំ យុវជននិងកីឡាបានផ្ដល់ការណែនាំដល់យុវជនដែលមានបំណងចង់សិក្សា ជំនាញវិទ្យាសាស្ត្រកសិកម្ម ដូចខាងក្រោម៖
ដើម្បីសិក្សាជំនាញវិទ្យាសាស្ត្រកសិកម្ម យុវជនត្រូវមានចំណេះដឹងមូលដ្ឋានលើមុខវិជ្ជាៈ គីមីវិទ្យា និងជីវវិទ្យា។ ក្នុងនោះផងដែរ ដើម្បីទទួលបានសញ្ញាបត្រថ្នាក់បរិញ្ញាបត្រលើកមុខជំនាញនេះនិស្សិតត្រូវសិក្សារយៈពេល៤ឆ្នាំ ស្មើនឹង១៦០ក្រេឌីត។
ពេលបញ្ចប់បរិញ្ញាបត្រលើមុខជំនាញនេះ និស្សិតនឹងទទួលបានចំណេះដឹង៖ ទី១. ផ្នែកវិទ្យាសាស្ត្រដី គឺដឹងពីប្រភពកំណរកំណើត និងវិភាគលើលក្ខណៈរូប-គីមីនៃដី យល់ដឹងពីការប្រើប្រាស់ដីកសិកម្ម និងប្រព័ន្ធកសិកម្មចំរុះ យល់ដឹងពីការប្រើប្រាស់ជីគីមី នីជីធម្មជាតិតាមរយៈបច្ចេកទេសផលិតកម្មដំណាំ យល់ដឹងពីលក្ខណៈជីវសាស្ត្រ និងសារធាតុចិញ្ចឹមរបស់ដំណាំបច្ចេកទេសដាំដុះ ការរក្សាទុក និងការកែច្នៃផលិតផល យល់ដឹងពីបច្ចេកទេសបង្កាត់ពូជ ការផ្សាំ និងការរក្សាគ្រាប់ពូជ យល់ដឹងពីការជ្រើសរើសដំណាំតាមស្ថានភាពដី និងអាកាសធាតុ។ ទី២. ការការពារដំណាំ គឺយល់ដឹងពីលក្ខណៈជីវសាស្ត្ររបស់សត្វល្អិត ស្គាល់ពីសត្វមានប្រយោជន៍ និងសត្វបំផ្លាញដំណាំ ដឹងពីជំងឺរុក្ខជាតិ វិធានការការពារ និងកំចាត់សត្វល្អិតចង្រៃ និងដឹងពីបច្ចេកទេសប្រើប្រាស់ថ្នាំពុលគីមី និងថ្នាំពុលធម្មជាតិ
និស្សិតដែលសិក្សាជំនាញវិទ្យាសាស្ត្រកសិកម្ម ឬបរិញ្ញាបត្រវិទ្យាសាស្ត្រកសិកម្ម នេះអាចទៅបម្រើការងារនៅតាមអង្គភាពឬមុខនាទីនៅតាមក្រសួងស្ថាប័នរដ្ឋ(ក្រសួងកសិកម្ម រុក្ខាប្រមាញ់និងនេសាទ) អង្គការ និងក្រុមហ៊ុននានា អ្នកបណ្ដុះបណ្ដាលសាស្ត្រាចារ្យតាមវិទ្យាស្ថានឬសាកលវិទ្យាល័យ អ្នកស្រាវជ្រាវនិងផ្សព្វផ្សាយបច្ចេកទេសកសិកម្ម ចូលរួមការងារអភិវឌ្ឍនសហគមន៍និងធ្វើអាជីវកម្មផ្ទាល់ខ្លួន។
ប្រភព៖ សៀវភៅ «មគ្គុទេសក៍ សម្រាប់ការជ្រើសរើសគ្រឹះស្ថានសិក្សា និង មុខជំនាញបន្តការសិក្សានៅកម្រិតឧត្ដមសិក្សា», មីនា.២០១៥. នាយកដ្ឋានឧត្ដមសិក្សា៕
© រក្សាសិទ្ធិដោយ thmeythmey.com
