អន្តរជាតិ
ការជួបជុំកូរ៉េ៖ ប្តីប្រពន្ធវ័យជាង៨០ឆ្នាំ លាគ្នា ដោយនិយាយថា «ចាំជួបជាតិក្រោយម្តងទៀត»
× ថ្វីដ្បិតវាមិនមែនជាការព្រាត់ស្លាប់ ប៉ុន្តែសម្រាប់គូស្នេហ៍មួយគូដែលមានអាយុជាង៨០ឆ្នាំរៀងៗខ្លួនទៅហើយនោះ វាជាការព្រាត់រស់ដែលមិនអាចមានថ្ងៃជួបជុំគ្នាវិញ។ លោក Oh In Se ដែលក្លាយជាពលរដ្ឋកូរ៉េខាងជើង និងលោកស្រី Lee Soon-kyu ដែលរស់នៅកូរ៉េខាងត្បូង ជាគូស្វាមីភរិយា ដែលបានបែកគ្នាតាំងពីសង្គ្រាមកូរ៉េឆ្នាំ១៩៥៣។ នៅថ្ងៃចុងក្រោយនៃជំនួប ពួកគាត់ បានសន្យាថានឹងជួបគ្នានៅជាតិក្រោយម្តងទៀត។ នេះបើយោង តាមសារព័ត៌មាន The World Post។
ម្សិលមិញនេះ គឺជាថ្ងៃកំណត់ចុងក្រោយនៃការជួបជុំក្រុមគ្រួសារបងប្អូនកូរ៉េទាំងពីរនៅជុំទីមួយ ដែល បានធ្វើឡើងនៅឯរមណីយដ្ឋានកូរ៉េខាងជើងចាប់តាំងពីថ្ងៃទី២០ខែតុលា ក្រោមកិច្ចព្រមព្រៀងដែលបានធ្វើឡើងដោយរដ្ឋាភិបាលកូរ៉េទាំងពីរ កាលពីថ្ងៃទី២៥ ខែសីហា។
រឿងគួរឲ្យក្តុកក្ដួលចិត្តនោះ មានប្តីប្រពន្ធមួយគូដែលបែកគ្នាដោយសារតែសង្គ្រាមកូរ៉េឆ្នាំ១៩៥០-១៩៥៣ ទើបតែបានជួបគ្នា ហើយ ក៏ត្រូវដល់ថ្ងៃបែកគ្នាម្តងទៀត។ នោះគឺលោក អូ អ៊ិនសែ (Oh In Se) គឺជាប្តីដែលជាប្រជាជនកូរ៉េជើងបច្ចុប្បន្នដែលមានអាយុ៨៣ឆ្នាំ។ ប្រពន្ធលោកដែលជាជនជាតិកូរ៉េខាងត្បូងគឺលោកស្រី លី ស៊ូនឃ្យូ (Lee Soon-kyu) ដែលបច្ចប្បន្នមានអាយុ៨៥ឆ្នាំ។ ពួកគេទាំងពីរ បានអះអាងថា តែងតែសុបិន្ត និង នឹកគ្នារៀងរាល់ថ្ងៃ។
ដោយសារតែការជួបជុំមានកំណត់ គូរស្នេហ៍មួយគូនេះ ត្រូវតែបង្ខំចិត្តបែកគ្នា ដោយមិនសង្ឃឹមថា នឹងអាចនឹងជួបគ្នាម្តងទៀតឡើយ។ ក្នុងវ័យជាង៨០ឆ្នាំហើយនោះ លោក អូ អ៊ិនសែ បានផ្តែផ្តាំទៅ កាន់ភរិយារបស់លោកថា «ចាំជួបគ្នាម្តងទៀតនៅជាតិក្រោយ។ សូមថែរក្សាកូនប្រុសរបស់យើងឲ្យ បានល្អ និង បើកចិត្តឲ្យទូលាយផង« លោកស្រី លី ស៊ូនឃ្យូ ក៏បានឆ្លើយតបទៅនឹងលោក អ៊ិនសែថា «សូមឲ្យមានសុខភាពល្អ និង អាយុវែង«។
សូមរម្លឹកផងដែរថា មានប្រជាជនកូរ៉េជាច្រើននាក់ បានបែកបាក់គ្នាដោយសារតែសង្គ្រាមឧបទ្វីបកូរ៉េ ឆ្នាំ១៩៥០-១៩៥៣ដែលជាសង្គ្រាមមួយដែលផ្ទុះឡើងដោយសារការប្រកួតប្រជែងមនោគមវិជ្ជាអំឡុង សង្គ្រាមត្រជាក់។ កន្លងមកក្រសួងរួបរួមកូរ៉េខាងត្បូង បានអះអាងថា គិតចាប់ពីឆ្នាំ១៩៨៨ប្រជាជនកូរ៉េខាងត្បូងប្រមាណ ជាងដប់ម៉ឺននាក់ បានចុះឈ្មោះដើម្បីសុំជួបជុំគ្រួសារ។ ក៏ប៉ុន្តែមកទល់ពេលនេះ មានប្រជាជនប្រមាណជាងប្រាំម៉ឺននាក់តែប៉ុណ្ណោះដែលកំពុងមានជីវិត និង ទន្ទឹងរង់ចាំការជួបជុំនេះ៕
© រក្សាសិទ្ធិដោយ thmeythmey.com