សេដ្ឋកិច្ច
អន្តរជាតិ
Global Witnessទំលាយព័ត៌មានស្តីពីការជួញដូរថ្លើមថ្មនៅមីយ៉ាន់ម៉ា
× អង្គការ ប្រឆាំងអំពើពុករលួយ Global Witness បានចុះផ្សាយ កាលពីថ្ងៃសុក្រ នូវរបាយការណ៍អង្កេត ទាក់ទងនឹងពាណិជ្ជកម្មថ្លើមថ្មនៅមីយ៉ាន់ម៉ា។ ជារបាយការណ៍ទំលាយថា មីយ៉ាន់ម៉ា រកបានចំណូលសន្ធឹកសន្ធាប់ពីធនធានថ្លើមថ្មក្នុងស្រុក ដល់ទៅ៣១ពាន់លានដុល្លារ ក្នុងមួយឆ្នាំ។ ហើយអតីតមេដឹកនាំរបបសឹក និងក្រុមជួញដូរគ្រឿងញៀន សុទ្ធតែជាអ្នកទទួលចំណូលពីថ្លើមថ្មមីយ៉ាន់ម៉ា។
របាយការណ៍ នេះរៀបរៀងឡើងដោយលោក Mike Davis និងក្រុមការងាររបស់អង្គការGlobal Witness ដែលបានចុះទៅអង្កេតច្រើនខែនៅមីយ៉ាន់ម៉ា។ យោងតាមរបាយការណ៍ ការជួញដូរថ្លើមថ្មបាននាំចំណូលរាប់ពាន់លានដុល្លារដល់ភូមា ក្នុងមួួយឆ្នាំៗ លើសពីការជួញដូរធនធានរ៉ែផ្សេងៗទៀត។ ក្នុងឆ្នាំ២០១៤ ថ្លើមថ្មបានផ្តល់ចំណូល៣១ពាន់លានដុល្លារដល់មីយ៉ាន់ម៉ា គឺស្មើនឹង៤៨ភាគរយនៃផលិតផលសរុបក្នុងស្រុក។ រីឯចំណូលបានមកពីការនាំចេញឧស្ម័ន មានតែ៤១០០លានដុល្លារប៉ុណ្ណោះ គឺតិចតួចប្រៀបនឹងថ្លើមថ្ម។
ប៉ុន្តែ សម្រាប់អង្គការGlobal Witness មានតែក្រុមមនុស្សមួយក្តាប់តូចប៉ុណ្ណោះដែលទទួលប្រយោជន៍ពីការជួញដូរ ថ្លើមថ្ម ក្នុងនោះមានកូនប្រុស២នាក់របស់អតីតមេដឹកនាំផ្តាច់ការThan Shwe។ ពួកគាត់ជាប់ពាក់ព័ន្ធនឹងបណ្តាក្រុមហ៊ុនដែលរកចំណូលបានជាង ២០០លានដុល្លារ ពីពាណិជ្ជកម្មថ្លើមថ្ម។
មេក្លោងគ្រឿងញៀន ដែលអាមេរិកចំណាំមុខទុកនៅអាស៊ីអាគ្នេយ៍ ដូចជាWei Hsueh-Kangក៏មានចំណែកក្នុងថ្លើមថ្មក្នុងតំបន់ដែរ។ របាយការណ៍Global Witnessក៏ចោទបន្ថែម ទៅលើក្រុមហ៊ុនធំៗដូចជា Coca-Cola និងក្រុមហ៊ុន Caterpillar ផងដែរ។ យោងតាមអង្គការ កូកាកូឡាមានជាប់ពាក់ព័ន្ធនឹងការជួញដូរថ្លើមថ្ម ដែលទាហានមីយ៉ាន់ម៉ាកាន់កាប់។ ហើយក្រុមហ៊ុនCaterpillarវិញ បានផ្តល់សម្ភារៈការដ្ឋានសំខាន់ៗ ដល់ក្រុមហ៊ុនចំនួន៥របស់ស្តេចជួញដូរគ្រឿងញៀន Wei Hsueh-Kang៕
Tag:
ថ្លើមថ្ម
Global Witness
មីយ៉ាន់ម៉ា
© រក្សាសិទ្ធិដោយ thmeythmey.com