ប្លែកៗ
អន្តរជាតិ
Companion កម្មវិធីរក្សាសុវត្ថិភាពសម្រាប់ស្ត្រីធ្វើដំណើរពេលយប់តែម្នាក់ឯង
× ការធ្វើដំណើរពេលយប់តែម្នាក់ឯងលែងជារឿងគួរឲ្យព្រួយបារម្ភទៀតហើយ សម្រាប់ស្ត្រីនៅប្រទេសជាច្រើន។ កម្មវិធីទូរស័ព្ទដៃមួយអាចជួយឲ្យស្ត្រីមានអារម្មណ៍កក់ក្តៅ និងអាចបង្ការករណីរំលោភបំពានផ្លូវភេទទៀតផង។
កម្មវិធីទូរស័ព្ទធានាសុវត្ថិភាពនេះមានឈ្មោះថា « Companion » ។ វាត្រូវបានបង្កើតឡើងដោយនិស្សិតអាមេរិកាំង ៥ នាក់នៃសាកលវិទ្យាល័យ Michigan ដើម្បីទប់ស្កាត់អំពើរំលោភផ្លូវភេទ។ ដោយហេតុថា នៅសហរដ្ឋអាមេរិក បើតាមស្ថិតិ និស្សិតស្រីម្នាក់ក្នុងចំណោម ៥ នាក់រងគ្រោះដោយសារអំពើរំលោភផ្លូវភេទក្នុងបរិវេណសាកលវិទ្យាល័យ។
កម្មវិធីនេះងាយស្រួលប្រើប្រាស់ណាស់។ ដំបូង អ្នកប្រើប្រាស់ត្រូវជ្រើសរើស «ដៃគូរួមដំណើរ» ជាមុនសិន។ បន្ទាប់មក ត្រូវប្រាប់ពីទីតាំងបច្ចុប្បន្នដែលអ្នកកំពុងស្ថិតនៅ និងគោលដៅដែលត្រូវទៅ។ អ្នកធ្វើដំណើរតាមលំនាំផ្លូវដែលបានបង្ហាញក្នុងកម្មវិធីទូរស័ព្ទ ហើយមិត្តរួមដំណើរនោះនឹងតាមដានពីសកម្មភាពរបស់អ្នក។ បើសិនជាអ្នកដើរខុសពីគោលដៅកំណត់ អ្នកចាប់ផ្តើមរត់ ឬអ្នកដកកាសត្រចៀកចេញ កម្មវិធីនេះចាត់ទុកថា ជាប្រតិកម្មខុសធម្មតា រួចនឹងជូនដំណឹងទៅមិត្តរួមដំណើរ។ ដៃគូនេះអាចធ្វើអន្តរាគមន៍ភ្លាមៗ ដោយទូរស័ព្ទទៅកាន់ប៉ូលិស។ ឬមិនដូច្នោះទេ អ្នកប្រើប្រាស់កម្មវិធីនេះអាចចុចប៊ូតុងក្នុងកម្មវិធី ប្តឹងប៉ូលិសដោយខ្លួនឯងក៏បាន ប្រសិនបើយល់ថា ខ្លួនកំពុងស្ថិតក្នុងគ្រោះថ្នាក់។
Companion ជាកម្មវិធីដ៏មានប្រសិទ្ធភាពសម្រាប់បង្ការអំពើរំលោភផ្លូវភេទ។ សម្រាប់ពេលនេះ កម្មវិធីនេះមិនត្រឹមតែមានអ្នកប្រើប្រាស់នៅសហរដ្ឋអាមេរិកប៉ុណ្ណោះទេ នៅអឺរ៉ុបក៏ទទួលបានការគាំទ្រផងដែរ គឺដូចជានៅប្រទេសដាណឺម៉ាក និងហូឡង់ជាដើម។ អ្នកប្រើប្រាស់អាចទាញយកកម្មវិធីនេះតាមរយៈ Google Play និង App Store ៕
© រក្សាសិទ្ធិដោយ thmeythmey.com