អង្គការយូនីសេហ្វកាលពីថ្ងៃទី២៦ ខែតុលា បានប្រកាសផ្តល់ថវិកាចំនួន ៤០ម៉ឺនដុល្លារអាមេរិក ដល់អង្គការដៃគូចំនួន៦ សម្រាប់ពួកគេផ្តល់សេវាកម្មសហគមន៍ប្រកបដោយគុណភាពដល់ជនពិការជាពិសេសដល់ស្ត្រី និងកុមារនៅក្នុងខេត្តចំនួន១២និងរាជធានីភ្នំពេញ។
ថវិកាថ្មីផ្តល់ឲ្យអង្គការទាំង៦នេះ គឺជាផ្នែកមួយនៃមូលនិធិអភិវឌ្ឍន៍ដែលមានដាក់បញ្ចូលពិការភាពនៅកម្ពុជា (CDIDF) ដែលជាមូលនិធិសម្រាប់គាំទ្រអង្គការមិនមែនរដ្ឋាភិបាល។ មូលនិធិនេះត្រូវបានគាំទ្រដោយអង្គការយូនីសេហ្វ ក្រោមការឧបត្ថម្ភថវិកាពីរដ្ឋាភិបាលអូស្ត្រាលី ដែលជាផ្នែកមួយនៃយុទ្ធសាស្ត្រអភិវឌ្ឍន៍សម្រាប់ទាំងអស់គ្នាឆ្នាំ២០១៥-២០២០។
អង្គការទទួលថវិកាទាំងនេះរួមមាន អង្គការការីតាសកម្ពុជា អង្គការជនពិការអន្តរជាតិ អង្គការមូលនិធិកុមារពិការ អង្គការគ្រួសារថ្មី អង្គការអភិវឌ្ឍន៏សមត្ថភាពជនពិការតាមសហគមន៏ និងមជ្ឈមណ្ឌលជីវិតរស់នៅឯករាជ្យនៃជនពិការភ្នំពេញ។ ពួកគេត្រូវបានជ្រើសរើសតាមរយៈដំណើរការប្រកបដោយភាពប្រកួតប្រជែង ក្រោមការវាយតម្លៃផ្អែកទៅតាមគោលបំណងនៃមូនិធិ រួមទាំងបទពិសោធន៍និងជំនាញរបស់អង្គការទាំងនោះក្នុងការផ្តល់សេវាកម្ម ក៏ដូចជាធ្វើការងារជាមួយជនពិការ។
លោកស្រី អាលីសុន ប៊ើររ៉ូ ឯកអគ្គរាជទូតអូស្ត្រាលីប្រចាំកម្ពុជាបានមានប្រសាសន៍ថា “ជំនួយនេះគឺផ្នែកមួយដ៏សំខាន់នៃការគាំទ្ររបស់យើងទៅដល់វិស័យពិការភាពនៅក្នុងប្រទេសកម្ពុជា។”
កម្មវិធីជំនួយគាំទ្រនេះ នឹងផ្តល់នូវប្រយោជន៍ផ្ទាល់និងដោយប្រយោលទៅដល់ប្រជាពលរដ្ឋពិការប្រមាណ១២ម៉ឺននាក់នៅក្នុងរយៈពេល២ឆ្នាំខាងមុខ។ មូលនិធិ CDIDF នេះក៏មានគោលបំណងពង្រឹងកិច្ចសហការរវាងអង្គការមិនមែនរដ្ឋាភិបាល ស្ថាប័នរដ្ឋាភិបាល និងសហគមន៍មូលដ្ឋាននានា ដើម្បីធានាឲ្យគ្រប់អ្នកពាក់ព័ន្ធទាំងអស់អាចធ្វើការរួមគ្នាក្រោមកិច្ចសម្របសម្រួលមួយដ៏ល្អ ដើម្បីផ្តល់នូវការគាំទ្រល្អបំផុតដែលអាចធ្វើបានជូនជនពិការ។
លោកស្រី ដេបូរ៉ា កូមីនី តំណាងអង្គការយូនីសេហ្វប្រចាំប្រទេសកម្ពុជាបានមានប្រសាសន៍ថា “អង្គការយូនីសេហ្វប្តេជ្ញាផ្តល់នូវបរិយាកាសសុវត្ថិភាពនិងប្រកបដោយក្តីស្រទ្បាញ់ដល់កុមារពិការ ដើម្បីឲ្យពួកគេអាចអភិវឌ្ឍសក្តានុពលរបស់គេបានពេញលេញ”។
លោកស្រីបានបន្តទៀតថា “ជនពិការប្រមាណជា៥០ម៉ឺននាក់កំពុងរស់នៅក្នុងប្រទេសកម្ពុជា។ ជាមួយនឹងមូលនិធិឧបត្ថម្ភដោយរដ្ឋាភិបាលប្រទេសអូស្ត្រាលីនេះ អង្គការយូនីសេហ្វអាចសហការជាមួយនឹងអង្គការដែលមានបទពិសោធន៍ ដើម្បីផ្តល់សេវាគាំទ្រដល់កុមារនិងគ្រួសារជនពិការ ជួយពួកគេឲ្យទទួលបានសិទ្ធិនិងជម្រុញពួកគេឲ្យចូលរួមយ៉ាងសកម្មនៅក្នុងសង្គម”។
អង្គការដៃគូដែលទើបនឹងទទួលថវិកាទាំងនេះ នឹងផ្តល់នូវសេវាកម្មគាំទ្រដល់ជនពិការផែ្នកទំនាក់ទំនងនិងបញ្ហាលេបចំណី គាំទ្រដល់កុមារនិងក្មេងជំទង់ដែលមានបញ្ហាសុខភាពខួរក្បាល ពិការប្រព័ន្ធប្រសាទ ពិការបញ្ញាស្មារតី និងពិការខាងចិត្តសាស្ត្រសង្គម។ ពួកគេក៏នឹងពង្រឹងនូវការការកំណត់រកករណីកុមារតូចដែលមានពិការភាពឲ្យបានទាន់ពេលវេលាផ្តល់ការថែទាំតាមសហគមន៍ដល់កុមារពិការ និងពង្រឹងសិទ្ធិអំណាចដល់កុមារដែលមានបញ្ហាស្តាប់និងមើល តាមរយៈសកម្មភាពកីឡានិងការទទួលបានការអប់រំថ្នាក់ឧត្តមសិក្សា។
មូលនិធិអភិវឌ្ឍន៍ដែលមានដាក់បញ្ចូលពិការភាពនៅកម្ពុជា (CDIDF) នេះគឺជាយន្តការមូលនិធិប្រចាំឆ្នាំ គ្រប់គ្រងដោយអង្គការយូនីសេហ្វដើម្បីផ្តល់ការគាំទ្រដោយផ្ទាល់ដល់អង្គការសង្គមស៊ីវិលក្នុងការផ្តល់នូវសេវាកម្មដល់កុមារនិងគ្រួសារជនពិការដែលកំពុងត្រូវការការគាំទ្រចាំបាច់។ នៅក្នុងឆ្នាំ២០១៤ មានអង្គការមិនមែនរដ្ឋាភិបាលចំនួន៩បានទទួលថវិកាពីមូលនិធិនេះ ហើយបានគាំទ្រទៅដល់ប្រជាពលរដ្ឋពិការចំនួន ៣៨០០នាក់ ដែលក្នុងនោះមានកុមារចំនួនជាងពាក់កណ្តាល។
មូលនិធិអភិវឌ្ឍន៍ដែលមានដាក់បញ្ចូលពិការភាពនៅកម្ពុជា (CDIDF) គឺជាផ្នែកមួយនៃកម្មវិធីលើកកម្ពស់សិទ្ធិជនពិការនៅកម្ពុជា (DRIC) ដែលជាកម្មវិធីរយៈពេល៥ឆ្នាំ (២០១៤-២០១៨) ក្រោមការឧបត្ថម្ភថវិកាពីក្រសួងការបរទេសនិងពាណិជ្ជកម្ម (DFAT) នៃរដ្ឋាភិបាលប្រទេសអូស្ត្រាលី។ កម្មវិធីនេះត្រូវបានអនុវត្តដោយទីភ្នាក់ងារអង្គការសហប្រជាជាតិចំនួន៣ គឺកម្មវិធីអភិវឌ្ឍន៍សហប្រជាជាតិ (UNDP) អង្គការយូនីសេហ្វ (UNICEF) និងអង្គការសុខភាពពិភពលោក (WHO)៕