ជាតិ
នយោបាយជាតិ
បាតុកររំសាយចេញពីមុខផ្ទះលោក កឹម សុខា ដោយគ្មានការប៉ះទង្គិច និងបង្កការខូចខាត
× ភ្នំពេញ៖ ទោះបីជាបាតុករមួយចំនួន បានយកគប់ដុំថ្ម និងដបទឹកសុទ្ធគប់ចូលផ្ទះលោក កឹម សុខា អនុប្រធានគណបក្សសង្គ្រោះជាតិក្តី បាតុករ បានរំសាយទៅវិញ ដោយពុំមានការបង្កឲ្យមានការខូចខាតគេហដ្ឋាន និងប៉ះទង្គិចជាមួយកម្លាំងរក្សាសន្តិសុខ ឬអង្គរក្សដែលអង្គុយយាម នៅមុខគេហដ្ឋានរបស់លោក កឹម សុខា ឡើយ។
បាតុកម្មបានចាប់ផ្តើម នៅវេលាជាង ១២ថ្ងៃចន្ទនេះ ដែលមានមនុស្សចូលរួមជាង ២០០នាក់មកពីបណ្តាខណ្ឌនានា ក្នុងរាជធានីបានមកដល់មុខគេហដ្ឋានលោក កឹម សុខា ដើម្បីតវ៉ា ទាមទារឲ្យលោក កឹម សុខា ចុះចេញពីតំណែងអនុប្រធានទីមួយ នៃរដ្ឋសភា។ ក្រុមបាតុករបានចោទអនុប្រធានទីមួយរដ្ឋសភា និងជាអនុប្រធានគណបក្សសង្គ្រោះជាតិថា ជាមនុស្សចូលចិត្តបង្កបញ្ហា និងញុះញង់ឲ្យស្អប់រដ្ឋាភិបាល។ ហើយពួកគេស្រែកថា លោក កឹម សុខា ជាអ្នកសន្យាខ្យល់ និងជាមេ«បោកប្រាស់»។ មិនត្រឹមតែស្រែកទេ តែគេសង្កេតឃើញថា បាតុករមួយចំនួន បានចាប់ផ្តើមគប់ដុំថ្ម និងដបទឹកសុទ្ធចូលគេហដ្ឋានរបស់លោក កឹម សុខា។
តែយ៉ាងណា បាតុករទាំងអស់ បានឡើងជិះម៉ូតូរំសាយគ្នាទៅវិញ នៅវេលាប្រមាណ ៣រសៀល ថ្ងៃទី២៦នេះ ដោយពុំមានបង្កហិង្សាគប់ដុំថ្ម និងដបទឹកសុទ្ធចូលទៅក្នុងគេហដ្ឋានលោក កឹម សុខា ស្ថិតក្នុងតំបន់ទួលគោក បង្កឲ្យមានការខូចខាតនោះទេ។ រហូតមកដល់ពេលនេះ គេមិនទាន់ដឹងថា តើលោក កឹម សុខា នៅទីណានោះទេ៕
Tag:
បាតុកម្មប្រឆាំង-លោក កឹម សុខា
© រក្សាសិទ្ធិដោយ thmeythmey.com