អន្តរជាតិ
នយោបាយអន្តរជាតិ
លោក អូបាម៉ា នឹងផ្តើមទស្សនកិច្ចពង្រីកទីផ្សារអាមេរិកក្នុងកិច្ចប្រជុំនៅតួកគី ហ្វីលីពីន និងម៉ាឡេស៊ី
×
ប្រធានាធិបតីសហរដ្ឋអាមេរិក លោក បារ៉ាក់ អូប៉ាម៉ា នឹងផ្តើមទស្សនកិច្ចដើម្បីចូលរួមកិច្ចប្រជុំកំពូល ប្រចាំឆ្នាំបីដាច់ដោយឡែកនៅពាក់កណ្តាលខែវិច្ឆិកាខាងមុខនេះ។ កិច្ចប្រជុំទាំងនោះ នឹងត្រូវធ្វើឡើងក្នុង ប្រទេស ទួកគី ហ្វីលីពីន និង ម៉ាឡេស៊ី។
បើយោងតាមសេចក្តីប្រកាសរបស់សេតវិមាន ប្រធានាធិបតីអាមេរិក លោក បារ៉ាក់ អូបាម៉ា នឹងផ្តើម ដំណើរទស្សនកិច្ចក្រៅប្រទេសចាប់ពីថ្ងៃទី១៤ដល់២២ ខែវិច្ឆិកាខាងមុខ។ លោក អូបាម៉ា នឹងមានវត្តមានក្នុងកិច្ចប្រជុំកំពូលក្រុមG20 នៅទួកគី កិច្ចប្រជុំកិច្ចសហប្រតិបត្តិសេដ្ឋកិច្ចអាស៊ីប៉ាស៊ីហ្វិក ដែលហៅកាត់ថាAPECនៅហ្វីលីពីន និង កិច្ចប្រជុំកំពូលនៅម៉ាឡេស៊ីដែលទាក់ ទងជាមួយអាស៊ាន និង អាមេរិក និងដៃគូសន្ទនារបស់អាស៊ានផងដែរ។
តាមការអះអាងរបស់សេតវិមានអាមេរិក ដំណើរទស្សនកិច្ចរយៈពេលជាងមួយសបា្តហ៍នេះ នឹងផ្តល់ ឱកាសដល់ លោក អូបាម៉ា ក្នុងការត្រួសត្រាយផ្លូវសម្រាប់អ្នកជំនួញ កម្លាំងពលកម្ម និង ការនាំចេញផលិតផលអាមេរិកនៅលើទីផ្សារអន្តរជាតិ។ ការអះអាងបែបនេះ គឺស្របពេលដែលកិច្ចព្រមព្រៀងភាពជាដៃគូអន្តរប៉ាស៊ីហ្វិកដែលដឹកនាំដោយអាមេរិក ទើបតែចុះហត្ថលេខាទទួលយកពីភាគី១២រដ្ឋកាលពីពេលថ្មីៗ។ រដ្ឋទាំង១២នោះ មានដូចជា សហរដ្ឋអាមេរិក អូស្ត្រាលី ព្រុយណេ កាណាដា ស៊ីលី ជប៉ុន ម៉ាឡេស៊ី ម៉ិកស៊ិក នូវែលហ្សេឡង់ ប៉េរូ សិង្ហបុរី និង វៀតណាម។
យ៉ាងណាក៏ដោយ ជុំវិញនៃវត្តមានរបស់ប្រធានាអាមេរិកលោក អូបាម៉ា ក្នុងកិច្ចប្រជុំកំពូលនៅម៉ាឡេស៊ី ដែលជាវិទិកាដឹកនាំដោយមេដឹកនាំអាស៊ាន គឺធ្វើឡើងស្របពេលដែលស្ថានភាពសមុទ្រចិនខាងត្បូង កំពុងតែមានភាពតានតឹងផងដែរ។ ក្នុងនេះមានន័យថា អាចនឹងការប្រឈមមុខគ្នារវាងមេដឹកនាំ អាមេរិក និង ចិនទាក់ទងនឹងបញ្ហាសមុទ្រចិនត្បូង ដ្បិត ចុងក្រោយនេះ អាមេរិក បានប្រកាសគម្រោង នៃ ការបញ្ជូននាវាចម្បាំងមកក្បែរកោះសិប្បនិម្មិតរបស់ចិនដែលសាងសង់នៅក្បែរតំបន់ជម្លោះ សមុទ្រ ចិនខាងត្បូង ខណៈចិនក៏បានព្រមានអាមេរិកមិនឲ្យលូកដៃផងដែរនោះ៕
© រក្សាសិទ្ធិដោយ thmeythmey.com