ជាតិ
សង្គមជាតិ
សណ្ឋាគារផ្កាយប្រាំមួយបរិច្ចាគសម្ភារប្រើប្រាស់ដល់អង្គការចំនួន១៥
× សៀមរាប៖ សម្ភារប្រើប្រាស់មួយចំនួន មានស្រោមពូក ស្រោមខ្នើយ កន្សែងជាដើម ត្រូវបានថ្នាក់គ្រប់គ្រងនៃសណ្ឋាគារ វ៉ិចតូរីយ៉ា (Victoria Angkor) សៀមរាប រៀបចំពិធីប្រគល់ ដល់បណ្តាអង្គការសម្បុរសធម៌ចំនួន១៥ ។ ការបរិច្ចាគនេះ គឺក្នុងន័យការងារមនុស្សធម៌ ដែលកន្លងមក សណ្ឋាគារលំដាប់ផ្កាយប្រាំមួយនេះធ្លាប់ធ្វើជាហូរហែរ។
នាយកគ្រប់គ្រងផ្នែកទីផ្សារនៃសណ្ឋាគារ វ៉ិចតូរីយ៉ា លោក សុខុម សំអុល បានឲ្យដឹងថា យ៉ាងហោចណាស់មានសម្ភារចំនួន ១៥០០សម្រាប់ បានបរិច្ចាគដល់អង្គការចំនួន១៥ នៅខេត្តសៀមរាប។ លោក សំអុល បញ្ជាក់ថា សម្ភារទាំងនោះ គឺជាសម្ភាររបស់សណ្ឋាគារ ដែលប្រើប្រាស់រួចហើយ តែនៅមានគុណភាពល្អ ក្នុងនោះរួមមាន កំរាលពូក ស្រោមខ្នើយ និងកន្សែងជាដើម។
នេះជាលើកទី២ហើយ ដែលខាងសណ្ឋាគារ វ៉ិចតូរីយ៉ា បានរៀបចំកម្មវិធីបរិច្ចាគសម្ភារនេះឡើង ដោយលើកទី១ធ្វើឡើងនៅឆ្នាំ២០១១ ។ អង្គការដែលទទួលបានសម្ភារទាំងនេះភាគច្រើនជាអង្គការក្រៅស្រុក ហើយពួកគេផ្តោតសំខាន់លើការងារជួយសហគមន៍ក្រីក្រនៅតាមតំបន់ដាច់ស្រយាល ដើម្បីលើកកម្ពស់សេដ្ឋកិច្ច របស់ពលរដ្ឋ។ លោក សំអុល ពន្យល់បន្ថែម៖« អង្គការភាគច្រើន គាត់ធ្វើការចុះផ្ទាល់ទៅសហគមន៍។ ពួកគាត់អាចយកទៅបង្រៀនជំនាញកាត់ដេរដល់អ្នកក្រីក្រ និងចែកដល់អ្នកក្រីក្រប្រើប្រាស់ អាចបាំងជញ្ជាំង ដំបូលជាដើម...»។
កន្លងមកសណ្ឋាគារ វ៉ិចតូរីយ៉ា ធ្លាប់ធ្វើសកម្មភាពមនុស្សធម៌មួយចំនួន ដែលរួមមានជួយដល់អង្គការក្រៅរដ្ឋាភិបាល ជាពិសេសគឺជាការរៀបចំកម្មវិធីរាត្រីសមោស រៃអង្គាសថវិកាជួយដល់មន្ទីរពេទ្យកុមារអង្គរ កាលពីឆ្នាំ២០១៤ជាដើម។
គួរបញ្ជាក់ថា ពិធីប្រគល់សម្ភាររៀបចំឡើងនៅក្នុងសណ្ឋាគារ វ៉ិចតូរីយ៉ា នៅព្រឹកថ្ងៃទី ២៧ តុលា ដែលមានបណ្តាអង្គការចូលរួម។ អង្គការដែលទទួលបានសម្ភាររបស់សណ្ឋាគារ វ៉ិចតូរីយ៉ា ដើម្បីចែកបន្តដល់ជនក្រីក្រនោះ រួមមានអង្គការ HALO trust, The Global Child, Treak Community centre, The Lake Clinic, the life Cambodia,...៕
© រក្សាសិទ្ធិដោយ thmeythmey.com