តំណាងអយ្យការស្នើតុលាការផ្តន្ទាទោស លោក យ៉ែម ជ្រិន ជាប់ពន្ធនាគារអស់មួយជីវិត

ជាតិ

សង្គមជាតិ

តំណាងអយ្យការស្នើតុលាការផ្តន្ទាទោស លោក យ៉ែម ជ្រិន ជាប់ពន្ធនាគារអស់មួយជីវិត

29, Oct 2015 , 7:22 pm

រូបភាព

រូបថតអគ្គស្នងការដ្ឋាននគរបាលជាតិ

ដោយ: ថ្មីៗ

ភ្នំពេញ៖ តំណាងអយ្យការបានស្នើតុលាការឲ្យផ្តន្ទាទោស លោក យ៉ែម ជ្រិន ជាប់ពន្ធនាគារអស់មួយជីវិត។ នេះបើតាមការផ្សាយរបស់អគ្គស្នងការដ្ឋាននគរបាលជាតិ ក្រោយពីសាលាដំបូងខេត្តបាត់ដំបងបានបញ្ចប់សវនាការជំនុំជម្រះលើរឿងក្តីគ្រូពេទ្យអត់អាជ្ញាប័ណ្ណ យ៉ែម ជ្រិន ពាក់ព័ន្ធនឹងករណីចម្លងជំងឺអេដស៍ពលរដ្ឋក្នុងឃុំរកាជាង ២០០នាក់ នៅថ្ងៃទី២៨ ខែតុលានេះ។ តុលាការនឹងប្រកាសសាលក្រម នៅព្រឹកថ្ងៃទី៣ ខែធ្នូ ឆ្នាំ២០១៥។

ស្របពេលលោក យ៉ែម ជ្រិន បដិសេធបទចោទប្រកាន់ ព្រះរាជអាជ្ញាបានស្នើសុំឱ្យតុលាការ ត្រូវផ្តន្ទាទោសជនជាប់ចោទ យ៉ែម ជ្រិន ដាក់ពន្ធនាគារអស់មួយជីវិត ក្រោមបទចោទ ប្រកាន់ចំនួន ៣ គឺ ទីមួយ, ការប្រព្រឹត្តរាលដាលមេរោគអេដស៍ក្នុងចេតនា ចម្លងអ្នកដទៃ តាមមាត្រា ១៨ និង៥០ នៃច្បាប់ស្តីពីការបង្ការ និងការប្រយុទ្ធទប់ស្កាត់ការរីករាលដាលមេរោគអេដស៍/ជំងឺអេដស៍,ទី ២ ឃាតកម្មដោយអំពើឃោរឃៅតាមមាត្រា ២០៥ នៃក្រមព្រហ្មទណ្ឌ និងទី៣ បើកកន្លែងពិគ្រោះព្យាបាលជំងឺដោយគ្មានការអនុញ្ញាតពីក្រសួង សុខាភិបាល។

សវនាការបានប្រព្រឹត្តអស់រយៈពេល ៥ថ្ងៃ ចាប់ពីថ្ងៃទី២០ ខែតុលានេះ។ បើតាមការផ្សាយរបស់អគ្គស្នងការដ្ឋាននគរបាលជាតិ ក្នុងសវនាការថ្ងៃចុងក្រោយថ្ងៃទី២៨ ចៅក្រមជំនុំជម្រះ តំណាងអយ្យការ និងមេធាវីការពារជនជាប់ចោទ បានធ្វើការសាកសួរដេញដោលជនរងគ្រោះដែលជាដើមបណ្តឹង តំណាងក្រសួងសុខាភិបាល ជនជាប់ចោទ និងសាក្សីខាងជនជាប់ចោទ ចាប់ពីម៉ោង ៣រសៀលរហូតដល់ម៉ោង ៧កន្លះយប់ ទើបតុលាការបិទបញ្ចប់នីតិវិធីសាកសួរទាំងស្រុង។

តាមប្រភពដដែល ក្រោយពីតំណាងអយ្យការបានបូកសរុបសេចក្តីសន្និដ្ឋានដោយយោងតាមពាក្យបណ្តឹងរបស់ជនរងគ្រោះជាង ១០០នាក់ និងឯកសារស្រាវជ្រាវរបស់ក្រុមការងារស៊ើបអង្កេតរបស់ក្រសួងសុខាភិបាល ព្រមទាំងការសាកសួរដេញដោលជនរងគ្រោះ ជនជាប់ចោទ និងសាក្សីពាក់ព័ន្ធ តំណាងអយ្យការបានស្នើតុលាការឲ្យផ្តន្ទាទោស ជនជាប់ចោទឈ្មោះ យ៉ែម ជ្រិន ដាក់ពន្ធនាគារអស់មួយជីវិត។

យ៉ាងណា មេធាវីការពារក្តីជនជាប់ចោទ លោក ឯម សុវណ្ណ បានស្នើសុំឱ្យតុលាការពិចារណាទំលាក់ចោលការចោទប្រកាន់ពីបទឃាតកម្មដោយអំពើឃោរឃៅតាមមាត្រា ២០៥ នៃក្រមព្រហ្មទណ្ឌ រីឯបទល្មើសចំនួន២ករណីទៀត លោកសុំឱ្យតុលាការពិចារណាអនុវត្តតាមច្បាប់ជាធរមានចុះ។

លោកមេធាវីអះអាងថា កូនក្តីរបស់លោកពុំមានចេតនាណាមួយ ចម្លងមេរោគអេដស៍ដល់ប្រជាពលរដ្ឋនោះទេ។ ហើយថា យ៉ែម ជ្រិន ជាមនុស្សមានសប្បុរសធម៌ ដែលតែងតែជួយ ព្យាបាលអ្នកជំងឺខ្លះមានជីវភាពក្រខ្សត់ ហើយអ្នកជំងឺខ្លះលោកមិនយកប្រាក់ ខ្លះជំពាក់ប្រាក់ក៏លោកមិនទាមទារផង។

ជនជាប់ចោទឈ្មោះ យ៉ែម ជ្រិន បាននិយាយក្នុងអង្គសវការ សុំឱ្យតុលាការបន្ធូបន្ថយទោសដល់រូបលោក ដោយលោកលើកឡើងថា លោកគ្មានចេតនាព្យាបាលជំងឺប្រជាពលរដ្ឋ ឱ្យឆ្លងមេរោគអេដស៍នោះឡើយ គឺលោកចង់តែព្យាបាលពួកគេជាសះស្បើយប៉ុណ្ណោះ។

គួរបញ្ជាក់ថា ករណីនៃការរីករាលដាលឆ្លងមេរោគអេសដស៍ដែលធ្វើឲ្យមានការភ្ញាក់ផ្អើលនៅឃុំរកា ស្រុកសង្កែ ខេត្តបាត់ដំបង បានផ្ទុះឡើងកាលពីខែធ្នូ ឆ្នាំ ២០១៤ ។ រហូតមកដល់ពេលនេះ មនុស្សចំនួន ២៩០ នាក់បានរកឃើញថា មានផ្ទុកមេរោគអេដស៍ ក្នុងចំណោមនោះ អ្នកស្លាប់មានចំនួន ១០នាក់ (ស្រី ៦នាក់)។

ករណីនេះ ក្រសួងសុខាភិបាល អង្គការសុខភាពពិភពលោក និងអង្គការយូអិនអេដស៍ បានចេញសេចក្តីប្រកាសព័ត៌មានរួម បញ្ជាក់ពីលទ្ធផលនៃការសិក្សាស្រាវជ្រាវរកប្រភពនៃការឆ្លងរាលដាលមេរោគអេដស៍ដែលរួមបញ្ចូលទាំងការសិក្សាលើករណីឆ្លង និងមិនឆ្លងមេរោគអេដស៍ថា អ្នកឆ្លងមេរោគអេដស៍ដែលបានចាក់ ថ្នាំ និងចាក់ស៊ីរ៉ូមមានកម្រិតខ្ពស់ជាងអ្នកមិនឆ្លងមេរោគអេដស៍៕