សៀមរាប៖ ប្រទេសចំនួន៧របស់អាស៊ាន បានចុះធ្វើកម្មសិក្សាបែបវិទ្យាសាស្ត្រមួយ នៅក្នុងរមណីយដ្ឋានអង្គរ។ ការស្រាវជ្រាវនេះដែរ គឺដើម្បីសិក្សាពីរបៀបគ្រប់គ្រង ការអភិវឌ្ឍ និងផែនការគ្រប់គ្រងតំបន់បេតិកភណ្ឌ ផ្សារភ្ជាប់នឹងវិស័យទេសចរណ៍ឲ្យមាននិរន្តរភាព។
អ្នកស្រាវជ្រាវ និងធ្វើការផ្នែកវិទ្យាសាស្ត្រមានគ្រូបង្រៀន និងសាស្ត្រាចារ្យជាដើម ប្រមាណ៦០នាក់ មកពីប្រទេសចំនួន៧ ក្នុងតំបន់អាស៊ាន បានចុះធ្វើកម្មសិក្សាជាទ្រង់ទ្រាយធំ នៅក្នុងរមណីយដ្ឋានអង្គរ ខេត្តសៀមរាប។ គោលបំណងនៃកម្មសិក្សានេះ គឺផ្តោតសំខាន់លើ ការអភិវឌ្ឍប្រកបដោយនិរន្តរភាព ហើយកន្លងមកពួកគេធ្លាប់ចុះទៅក្នុងតំបន់ផ្សេងៗរួចមកហើយ។
អនុប្រធាននាយកដ្ឋានមជ្ឈមណ្ឌលអន្តរជាតិស្រាវជ្រាវ និងតម្កល់ឯកសារ នៃអាជ្ញាធរអប្សរា លោក អ៊ឹម សុខរិទ្ធី បានឲ្យដឹងថា មូលហេតុដែលគេជ្រើសរើសខេត្តសៀមរាប ធ្វើជាគោលដៅដើម្បីធ្វើជាករណីសិក្សា ព្រោះថាការរៀបចំបេតិកភណ្ឌក្នុងរមណីយដ្ឋានអង្គរ គឺមានការទទួលស្គាល់ជាអន្តរជាតិ។ មានន័យថា ការរៀបចំតំបន់បេតិកភណ្ឌដែលមានទំនាក់ទំនងនឹងវិស័យទេសចរណ៍ របស់អាជ្ញាធរអប្សរាគឺបានល្អ ដែលអន្តរជាតិទទួលស្គាល់។ លោក សុខរិទ្ធី បន្តថា នៅតំបន់អង្គរ គេនឹងសិក្សាលើករណីចំនួន២ ទីមួយគឺនៅតំបន់ប្រាសាទ និងសហគមន៍រស់នៅតំបន់អង្គរ។
លោក សុខរិទ្ធី ពន្យល់បន្ថែមយ៉ាងដូច្នេះថា៖« នៅតំបន់ប្រាសាទ ទាក់ទងនឹងការរៀបចំ ការគ្រប់គ្រងប្រាសាទ និងវិស័យទេសចរណ៍ឲ្យមាននិរន្តរភាពនឹងគ្នា។ ធ្វើយ៉ាងម៉េចទើបយើងអាចធ្វើបាន។ ទីពីរ គឺនិយាយពីសហគមន៍ ប្រជាពលរដ្ឋនៅតំបន់អង្គរ តើការគ្រប់គ្រងមាននិរន្តរភាពជាមួយទេសចរណ៍ ឫក៏សមរស់ជាមួយគ្នា រវាងបេតិកភណ្ឌនិងសហគមន៍ដែរឫអត់»។
ប្រទេសចំនួន៧ ដែលចុះធ្វើកម្មសិក្សាស្រាវជ្រាវនៅតំបន់អង្គរនៅព្រឹកថ្ងៃសុក្រនេះ មានដូចជាប្រទេសម៉ាឡេស៊ី ឥណ្ឌូនេស៊ី ហ្វីលីពីន ថៃ វៀតណាម មីយ៉ាន់ម៉ា និងកម្ពុជា ដែលមានប្រទេសជាភ្ញៀវចំនួន៣ទៀត មានស៊ុយអែត ប៉ាគីស្ថាន និងអាល្លីម៉ង់។ អ្នកចូលរួមអស់ តម្រូវឲ្យរិះរកគំនិត ចុះស្រាវជ្រាវ និងអង្កេតផ្ទាល់នៅតាមទីតាំងផ្សេងៗ ដើម្បីរកវិធានការ ធ្វើយ៉ាងណា ឲ្យប្រាកដថា ការអភិវឌ្ឍដែលផ្សារភ្ជាប់នឹងវិស័យទេសចរណ៍ ត្រូវមាននិរន្តរភាព។
តាមការបញ្ជាក់របស់លោក អ៊ឹម សុខរិទ្ធី ការរៀបចំឲ្យមានផែនការគ្រប់គ្រងក្នុងរមណីយដ្ឋានអង្គរ គឺត្រូវបានអាជ្ញាធរអប្សរា គិតគូរតាំងពីឆ្នាំ២០០៤មកម្លេះ។ ចំពោះចំណុចនេះ លោក សុខរិទ្ធី មានសុទិដ្ឋិនិយមថា ការចុះសិក្សាស្រាវជ្រាវរបស់សិក្ខាកាមទាំងអស់ នឹងមានផលវិជ្ជមាន។ ពួកគេនឹងប្រមូលបាននូវអ្វីដែលពួកគេចង់បាន ហើយរៀនសូត្រ ស្រង់យកបទពិសោធន៍ពីអាជ្ញាធរអប្សរា សម្រាប់ចងក្រងជាឯកសារ ដើម្បីយកទៅអនុវត្តន៍នៅតំបន់ផ្សេងទៀត។ នេះជាការបញ្ជាក់បន្ថែមរបស់លោក សុខរិទ្ធី។
គួរបញ្ជាក់ថា ការចុះកម្មសិក្សាខាងលើនេះ រៀបចំឡើងដោយសកលវិទ្យាល័យបច្ចេកវិទ្យារបស់ម៉ាឡេស៊ី។ សកម្មភាពចុះសិក្សារបស់ក្រុមអ្នកស្រាវជ្រាវនៅព្រឹកមិញនេះដែរ ក្រៅពីចុះទៅប្រាសាទអង្គរវត្តហើយនោះ អ្នកស្រាវជ្រាវទាំងអស់ ក៏បានចុះទៅភូមិស្រះស្រង់ជើង និងភូមិរហាល សង្កាត់នគរធំ ក្រុងសៀមរាប។ នៅទីនោះ ពួកគេបានស្វែងយល់ពីការរស់នៅ និងស្វែងយល់ពីទេសចរណ៍សហគមន៍របស់អ្នកភូមិជាដើម៕