អន្តរជាតិ
ភាពខុសគ្នាពិតប្រាកដរវាងអ្នកមាន និងអ្នកក្រមិនមែនចំនួនទឹកប្រាក់ដែលរកបានទេ
× « ពិភពលោកនៅរង់ចាំអ្នកឲ្យក្លាយជាសេដ្ឋីជានិច្ច » នេះជាអ្វីដែលលោក Robert Kioyosaki អ្នកជំនាញផ្នែកទ្រឹស្តីអភិវឌ្ឍន៍ខ្លួនឯង បានសរសេរក្នុងសៀវភៅរបស់លោកដែលមានចំណងជើងថា Rich Dad Poor Dad (ឪពុកអ្នកមាន និងឪពុកអ្នកក្រ) ។
ប៉ុន្តែ មនុស្សជាច្រើនមិនអាចក្លាយជាអ្នកមានទ្រព្យសម្បត្តិហូរហៀបាន ដោយសារតែភាពមិនជឿជាក់ និងការភ័យខ្លាច។ « ភាពខុសគ្នាសំខាន់បំផុតរវាងអ្នកមាន និងអ្នកក្រ គឺការចេះគ្រប់គ្រងការភ័យខ្លាច » នេះជាការលើកឡើងរបស់លោក Kiyosaki ។ លោកបានបញ្ជាក់ថា លោកធំធាត់ឡើង ដោយសង្កេតមើលឃើញលក្ខណៈខុសគ្នារវាងឪពុកអ្នកមានដែលបានចាប់ផ្តើមដោយការយកប្រាក់កាសដែលខ្លួនមានបន្តិចបន្តួចទៅប្រថុយ និងឪពុកអ្នកក្រដែលជាឪពុករូបលោកផ្ទាល់។ ឪពុកលោកបានបាត់បង់ជីវិត ដោយមានបំណុលជាច្រើនរុំកោះដោះស្រាយមិនចប់ ។
មនុស្សគ្រប់រូបទាំងអស់ សូម្បីតែមហាសេដ្ឋីក៏ដោយ ត្រូវតែប្រឈមមុខនឹងការភ័យខ្លាចចំពោះភាពបរាជ័យ និងការចាញ់។ នេះជាអារម្មណ៍ដែលចៀសមិនផុត ជាពិសេសចំពោះបញ្ហាទាក់ទិននឹងលុយកាក់។ ចំណុចសំខាន់គឺ មិនត្រូវភ័យខ្លាចចំពោះបញ្ហាដែលអាចនឹងកើតឡើងទេ។ « អ្នកចេះគ្រប់គ្រងអារម្មណ៍ភ័យខ្លាចរបស់ខ្លួនចំពោះការចាញ់ និងការបរាជ័យបានប៉ុណ្ណា នេះហើយគឺជារឿងដែលធ្វើឲ្យជីវិតខុសគ្នារវាងអ្នកមាន និងអ្នកក្រ »។
លោកបានសរសេរទៀតថា៖ « អ្នកមានដឹងថា តើគេត្រូវប្រឈមមុខនឹងការបរាជ័យយ៉ាងដូចម្តេច ដើម្បីប្រែក្លាយវាឲ្យទៅជាជ័យជម្នះវិញ។ ឪពុកអ្នកមានដឹងថា ភាពបរាជ័យនោះនឹងធ្វើឲ្យគាត់រឹងមាំ និងវៃឆ្លាតជាងមុន។ ពេលដែលបរាជ័យ គាត់ដឹងថា ហេតុអ្វីបានជាគាត់បរាជ័យ ហើយគាត់នឹងធ្វើយ៉ាងណាដើម្បីទទួលបានជោគជ័យវិញ »៕
© រក្សាសិទ្ធិដោយ thmeythmey.com