អន្តរជាតិ
នយោបាយអន្តរជាតិ
អាមេរិកមិនខ្វល់ខ្វាយពីការព្រមានពីចិន ដោយបន្តបញ្ជូននាវាចម្បាំងជារៀងរាល់ត្រីមាស
×![]()
បន្ទាប់ពីការបញ្ជូននាវាចម្បាំងជាលើកដំបូងមកកាន់តំបន់ជម្លោះសមុទ្រចិនខាងត្បូងដោយជោគជ័យរដ្ឋាភិបាលក្រុងវ៉ាស៊ីនតោន បានប្រកាសនឹងបញ្ជូននាវាចម្បាំងបន្ថែមទៀតទៅ កាន់តំបន់ជម្លោះរៀងរាល់ ត្រីមាសក្រោមក្របខណ្ឌច្បាប់អន្តរជាតិ។ ការប្រកាសរបស់រដ្ឋាភិបាលក្រុងវ៉ាស៊ីនតោន ហាក់ដូចជាមិនសូវខ្វល់ខ្វាយពីការព្រមានរបស់រដ្ឋាភិបាលក្រុងប៉េកាំងពីការផ្ទុះសង្គ្រាមនៅក្នុងតំបន់សមុទ្រនោះទេ។
មន្ត្រីជាន់ខ្ពស់ក្រសួងការពារជាតិអាមេរិក បានអះអាងថា រដ្ឋាភិបាលអាមេរិក នឹងបញ្ជូននាវាចម្បាំងយ៉ាងតិចមួយដងក្នុងមួយត្រីមាសមកក្បែរកោះសិប្បនិម្មិតដែលចិនបានសាងសង់នៅក្នុងតំបន់ជម្លោះសមុទ្រចិនខាងត្បូង។ ការបញ្ជូននាវាបន្ថែមរបស់អាមេរិក គឺដើម្បីបង្ហាញចិន និង រដ្ឋផ្សេងទៀតពីការ អនុវត្តច្បាប់អន្តរជាតិ ឬ សិទ្ធិសេរីភាពនៃការចរាចរតាមដែនសមុទ្រអន្តរជាតិ។
សូមរម្លឹកផងដែរថា កាលពីចុងខែតុលាកន្លងទៅនេះ អាមេរិក បានបញ្ជូននាវាចម្បាំងរបស់ខ្លួនទៅកាន់តំបន់ជម្លោះសមុទ្រចិនខាងត្បូងដែលស្ថិតមិនឆ្ងាយប៉ុន្មាននោះទេពីកោះសិប្បនិម្មិតរបស់ចិន។ វត្តមានលើកដំបូងនោះ មិនមែនការប៉ះទង្គិចគ្នាតាមរយៈយោធានៅក្នុងតំបន់ជម្លោះនោះទេ។
ប្រតិបត្តិជោគជ័យនេះ បានជុំរុញឲ្យអាមេរិកប្រកាសត្រៀមបញ្ជូននាវាចម្បាំងបន្ថែមទៀតមកកាន់តំបន់ ជម្លោះសមុទ្រចិនខាងត្បូង។ តាមការអះអាងរបស់មន្ត្រីការពារជាតិអាមេរិក ប្រតិបត្តិការក្នុងតំបន់ ជម្លោះ នឹងត្រូវធ្វើឡើងដោយទៀងទាត់ តែ មិនមែនជាសកម្មភាពនៃការប្រកួតប្រជែងនោះទេ។
លោក Ben Rhodes អនុប្រធានប្រឹក្សាសន្តិសុខជាតិអាមេរិក ក៏បានបញ្ជាក់បន្ថែមទៀតថា នឹងមានសកម្មភាពជាច្រើនបន្ថែមទៀតរបស់យោធាអាមេរិកក្នុងការការពារនូវសិទ្ធិនៃការចរាចរដោយសេរីនៅក្នុងតំបន់។ ហើយនេះ គឺជាផលប្រយោជន៍របស់អាមេរិកក្នុងការអនុវត្តគោលការណ៍នៃសិទ្ធិសេរីភាព នៃការចរាចរក្នុងដែនសមុទ្រ។
គោលនយោបាយនេះ បានកើតឡើងបន្ទាប់ពីមន្ត្រីយោធាជាន់ខ្ពស់អាមេរិក និងចិន បានបរាជ័យក្នុងការចរចាលើវត្តមានលើកដំបូងរបស់អាមេរិកមកកាន់សមុទ្រចិនខាងត្បូង។ តាមពិតទៅ អ្វីដែលអាមេ រិក ចង់បានពិតប្រាកដនោះគឺ ចិន ត្រូវបញ្ឈប់សកម្មភាពនៅក្នុងតំបន់ជម្លោះសមុទ្រចិនខាងត្បូង និង ងាកទៅរកការដោះស្រាយក្រោមច្បាប់អន្តរជាតិវិញ។
ថ្វីដ្បិត អាមេរិក អះអាងថាសកម្មភាពខ្លួនគឺស្ថិតក្រោមច្បាប់អន្តរជាតិក៏ដោយ វត្តមានអាមេរិកជាច្រើន ដងក្នុងតំបន់ជម្លោះ នឹងក្លាយជាក្តីបារម្ភសម្រាប់សន្តិសុខសម្រាប់ប្រទេសនៅក្នុងតំបន់ជាពិសេសនៅ អាស៊ីអាគ្នេយ៍។ នោះ ក៏ព្រោះតែបើចិន មិនចុះញមចំពោះវត្តមានអាមេរិក ហើយ ជំនួសមកវិញនូវការ ប្រើប្រាស់កងកម្លាំងយោធាដូចទៅនឹងការព្រមានរបស់រដ្ឋាភិបាលក្រុងប៉េកាំងកន្លងមកនោះ សន្តិសុខ នឹងត្រូវបានគំរាមកំហែងជាក់ជាពុំខាន៕
Tag:
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com
